Kạhtukko 24
24
1Bạṛicʼ hoṛko cetanre alom hiskạkʼa,
ar onko sãote tahen hõ alom hạ̃sakʼa.
2Ente onkoakʼ mon do jor julum reakʼe ponthaya
ar onkoakʼ luṭi do behok reakʼ kathakoe roṛa
(20)
3Ạkil reakʼ goṛote oṛakʼ do benaokʼ kana,
ar bud iạtege ṭarhao tahenkana.
4Ạkil reakʼ goṛote kandhako do
daman ar mońj mońj jisinkote perejokʼ kana.
(21)
5Ạkilan hoṛakʼ do maraṅ ektiạri menakʼa,
ar budan hoṛ do apnarakʼ daṛeko baḍhaotakoa.
6Lạṛhạiyem calakʼre buj sujtem calakʼa
ar ḍher solhako iạtege jit do hoyokʼtama.
(22)
7Ạkil do khaṭo budan hoṛko khon pharakre tahena;
nagraha reakʼ phaṭok duạr ṭhen mocage bae jhija.
(23)
8Okoe bạṛicʼakʼe goṭae
uni do phundi aṭaoyicʼko metaea.
9Khaṭo bujan hoṛakʼ soṛojontro do kại kana;
ar landa dhutʼicʼ do hoṛkoko hirkhạwaea.
(24)
10Gạr hilokʼrem lạbṛukʼena menkhan,
enḍekhan am dom lebṛecʼgea.
(25)
11Okoe gujukʼ lạgitʼko idi ocokʼkan
onko baṛe rukhiyạkom;
ar khun ocokʼ lạgitʼ okoe kinḍạ manḍeko idi ocokʼkan
onko hõ ruạṛ ạgukom.
12Amem menle khan, “Ale do cetʼge bale baḍaea,”
Menkhan okoe mone tulạ aṭkaretʼ
uni do cetʼ amakʼ katha bae baḍaea?
Okoe amakʼ jiwiye rukhiyạyetʼ
uni do cetʼ ona bae baḍaea?
Uni do mimitʼ manwako akoakʼ kạmi leka
kuṛại do cetʼ bae emakoa?
(26)
13E bạbu, dumur rasa jomme, ente ona do bhagegea;
ar chata khon rasa jomme, ona do amakʼ tạru lạgitʼ heṛemgea.
14Noa hõ baḍaeme, ạkil do amakʼ ontor lạgitʼ dumur rasa leka kana;
ạkilem hameṭ lekhan amakʼ tayom daram as do menakʼgetama,
ona as do baṅ berthakʼtama.
(27)
15E bedhorom hoṛ, dhorom hoṛakʼ oṛakʼ upạrte
alom tãṛãkʼgokʼa,
ar uniyakʼ tahen ṭhạ̃ire hat alom lagaoa;
16ente dhorom hoṛ do eae dhaoe leńjetʼlenre hõ uni do arhõe beretʼ ruạṛa,
menkhan bedhorom hoṛ do ghoṭna iạteko tohotʼ bhindạṛokʼa.
(28)
17Amren bạiriye gurokʼre alom rạskạkʼa;
are tohotʼ bhinḍạṛlenre hõ amakʼ mon do aloe hulạsokʼma.
18Arem onkale khan enḍekhan Probhu Isor do ona ńelteye edrekʼa,
ar bạiri cetan khon uniyakʼ raṅgaoe ocogtaea.
(29)
19Bạṛicʼ kạmi hoṛko iạte alom dur durạukʼa,
ar bedhoromko ńelte alom hiskạkʼa.
20Ente bạṛicʼ hoṛkoakʼ do cetʼ asge bạnukʼa,
ar bedhoromkoakʼ diuhe do ĩṛĩjokʼtakoa.
(30)
21E bạbu, Probhu Isor ar raj botorakinme,
ar huhulkan hoṛko tulucʼ do alom mesalokʼa;
22ente onko cetanre maraokʼ do acʼkage hijukʼa,
Probhu Isor ar raj ṭhen khon cetʼlekan muhin hijukʼ
ona do okoeye baḍaea?
Arhõ thoṛa sopolha
23Noako hõ ạkilan hoṛkoakʼ katha kana.
Bicạrre hoṛakʼ mẽtʼãhã beṅgetʼakʼ do baṅ bhagea.
24Bạṛicʼ hoṛ okoeye metae, “Am dom dhorom hoṛ kana,”
Jạt jạtrenko do uniko sarapaea.
ar disạm disạmrenko do uniko hirkhạwaea.
25Menkhan dusiko do okoe dusi menteko dusiyetʼko
onko cetanre do bạ̃ṛti bhor paṛaokʼa,
ar onko doko kusikʼa.
26Okoe ṭhik kathakoe ạcur ruạṛ,
uni do gate leka luṭitaye cokʼakʼ kana.
27Amakʼ khet baṛge ṭhik ṭhakme ar amakʼ bahre kạmi sạtme,
ar ona tayom do amakʼ oṛakʼ duạr benaojoṅme.
28Jãhãnakʼ begor baḍaete am aḍepaserenko upạrte goha alom ema,
ar eṛe alom roṛa.
29Noa katha alom mena, “Uni cetʼlekae ceka akawạdiń
iń hoń onkawaea;
ar cetʼlekae cekawakatʼ onkageń halawaea.”
30Iń do mitʼṭen asaṅpoḍa hoṛakʼ khet aṛeteń parom senlena,
khaṭo bujan hoṛakʼ darkha bagwan secʼtege;
31ńelkedạń sanam jaega do rạṅgạinite perecʼ akana,
ar rạṅgạinite baṛge hõ esetʼakana,
ar dhiri reakʼ pạcri hõ lạnduṛ akana.
32Ar okań ńelketʼ onań ạribạndhikeda,
ar ona ńelte noa cecetʼakʼiń ńamkeda,
33 #
Kạh 6.10,11 “‘Thoṛaganiń jạpitʼ hataṛ kakʼrege, arhõ thoṛaganiń giticʼ ńokʼlenge,
ar ti kukucʼkate mitʼ ghạṛiń kunḍlạṅ hataṛlenge.’
34Menkhan mitʼ talao peṛako hecʼamre
se ḍạkukoakʼ tire paṛaolenre cetʼleka okulạn hijukʼ,
ṭhik onkage amakʼ okulạn hõ hijukʼa.
Santali Bible © Bangladesh Bible Society, 2021.