Kạhtukko 23
23
1Am do tinre disạm calaoicʼ tulucʼ jojomem duṛupʼa,
unre am samaṅre cetʼko menakʼa ona mońjte ạri bạndhime.
2Arem hạbạitage khan enḍekhan sontorokʼme!
Ar apnar sambṛaokʼte jomme.
3Uniyakʼ damanakʼ jomakʼre alom lalocakʼa,
ente ona jomakʼ tayomre
disạm cakʼlaoicʼakʼ jãhãn monsubạ tahẽ botecʼkokʼa.
(7)
4Dhon lab lạgitʼ do alom dhãoṛa dhạ̃uṛi baṛaea;
ar noa lạgitʼ amakʼ budre hõ alom bhorsakʼa.
5Dhon secʼ amakʼ mẽtʼ calaolen khange ona do cabakʼa,
ente ona reakʼ phạ̃kṛạ̃kʼko do janamokʼa
ar pajhaṛ leka coṭ secʼe uḍạukʼa.
(8)
6Lalocan hoṛkoakʼ jomakʼ do alom joma;
ar uniyakʼ soṛom soṛom jomakʼko hõ alom hạ̃sakʼa;
7ente uni doe nonkan hoṛ kana okoe do sanam ghạṛicʼ
acʼakʼ jomakʼ reakʼ dame hisạb baṛayetʼ.
Uni doe metama, “Ne jomme ar ńũime,”
Menkhan uniyakʼ mon do am tulucʼ bạnukʼtaea.
8Ar amem lapetʼ akatʼakʼ dom ulạ giḍiya,
ar amakʼ jut jut kathako do ạuṛiyagokʼa.
(9)
9Khaṭo bujan hoṛko ṭhen alom galmaraoa;
onko do amakʼ ạkil reakʼ kathako nihạ̃t giḍiytama.
(10)
10Jug reakʼ simạ do alom ocoga
se ṭũạr amarkoakʼ khet baṛge hõ alom dokhol joṅa,
11ente onkoren chakʼḍaoicʼ doe daṛeangea;
unige am upạrte onkoakʼ mamblae
calaoa.
(11)
12Am do cecetʼakʼ secʼ mone lagaome,
ar ạkil reakʼ katha luturakʼme.
(12)
13Gidrạ ḍanṭaoko do alom ikạkakʼa;
ṭheṅgatem dal lere hõ uni do bae gujukʼa.
14Pãeṛãte uni do sạjại emaeme
inạ khan Sheol khon uniyakʼ jiwim bańcaotaea.
(13)
15E bạbu, amakʼ ontor do ạkilte perecʼlentam khan
enḍekhan ińakʼ mon hõ rạskạkʼtińạ.
16Amakʼ luṭikin ṭhik kathae roṛ lekhan
ińakʼ jiu hõ rạskạkʼtińạ.
(14)
17Amakʼ mon do kại hoṛko aloe hiskạwakoma,
bickom sanam ghạṛicʼ Probhu Isor botoraete
khemaome.
18Enḍekhan amakʼ tayom daram lạgitʼ as tahena,
ar ona as do baṅ berthakʼtama.
(15)
19E bạbu, katha ańjomme, ar ạkilan hoyokʼme,
ar amakʼ mon do ṭhik horte sen ocoyme.
20Okoe darkha rasa bạ̃ṛtiye hoṅgor
se okoeko hạbạitage ar bạ̃ṛti jelko jom,
onko tulucʼ do alom soṅgekʼa;
21ente bul bhuteṛ ar hạbạitako doko ḍiṅgrạkʼa,
ar dudṛumkan hoṛ do jhador padorakʼteye oyokʼa.
(16)
22Am babawakʼ katha ańjomme
okoe do jonome emakawatʼme;
ar am gogoe buḍhilenre alom neṅghaoea.
23Sạriyakʼ kirińme ar ona do alom ạkhrińa;
Hẽ, ạkil, sikhạuna ar buj baṛe kiriń joṅme.
24Dhoromicʼren apat doe hulạsokʼa;
ar ạkilanicʼren apat do acʼren hopon hoteteye rạskạkʼa.
25Amren go baba dokin rạskạkʼ ma;
ar okoeye janam akatʼme uni doe hulạsokʼma.
(17)
26E bạbu, ińakʼ cecetʼakʼ baṛe moneyakʼme;
jemon ińakʼ jion ńeltem rạskạkʼ.
27Ńelme, kusmbi kuṛi do khạndri ghaḍlakʼ lekanae,
ar sendra baṛae maejiu do sakṛa kuńge.
28Onkan maejiu do ḍạku lekae tãṛãgokʼkana,
ar manwa talare bepạtiạu hoṛkoe saṅgeyetʼkoa.
(18)
29Okoeye hae haeyokʼkana? Ar okoe doe jare jarekʼ kana?
Okoe doe jhogṛakʼ kana? Ar okoe doe bok bokaokʼ kana?
Okoe ạuṛiyakʼe ghạl ocokʼ kana? Ar okoeyakʼ mẽtʼ do arakʼgea?
30Okoe ḍher ghạṛicʼ bubulakʼko ńũi onkoakʼ do nonkage hoyokʼa;
onko do mesal akatʼ bubulakʼ ńũi lạgitʼko calakʼa.
31Bubulakʼ arakʼge ńelokʼkanre hõ alom beṅgetʼakʼa,
ar bạṭire jiṛipʼ jiṛibokʼre hõ,
ar hodoṛ mente nạnḍrire bolokʼre hõ.
32Mucạtʼre ona do biń lekae sogakʼa,
ar kạrinạṅgiń biń lekae gegera.
33Unre amakʼ mẽtʼ do aema lekanakʼkoe ńela
ar mon do aje baje kathakoe hudisokʼa.
34Am do jalapurire giticʼ akan hoṛ lekam hoyokʼa,
one badam khunṭi coṭreye giticʼ akan hoṛ lekage.
35Amem mena, “Onko do ińko ghạl akadińạ
menkhan baṅ haso ledeńạ,
onko do ińko dalkedińạ menkhan bạń bujhạuleda.
Ar tinre baṅiń ebhenokʼ arhõ thoṛań ńũkea.
(19)
Santali Bible © Bangladesh Bible Society, 2021.