Kạhtukko 22
22
1Acel pacel dhon khon bhage ńutum hạrjoṅge bhagea;
Sona ar Rupạ khon eṭakʼ hoṛakʼ dulạṛ ńamge bhagea.
2Kisạ̃ṛ ar reṅgecʼ hoṛko talare begar do bạnukʼa
Probhu Isor do onko sanamkoren bebenaoicʼ kanae.
3Budan hoṛko do muhinko ńel darama arko okokʼa,
menkhan lelha hoṛ do muhin ńelkate hõ calakʼtegeko tahena
ar ona iạte sạjạiko ńama.
4Nindhạnokʼ ar Probhu Isor botorae reakʼ kuṛại do
dhon man ar jione ạguiya.
5Peṛta hoṛakʼ horre do jạnum ar jhampakoge tahena,
menkhan okoe apnarte sontore tahen
uni do onako khon sahaṛ akaeye tahena.
6Gidrạ do ṭhik horte taṛam cetʼaeme,
uniye haṛamlenre hõ ona hor khon do bae ghańjeṛokʼa.
7Kisạ̃ṛ hoṛ do nacarko cetanre mạlikiye calaoeda,
ar rin jom hoṛ do emokʼicʼren golame hoyokʼa.
8Okoe hoṛ bạṛicʼakʼ reakʼ itại eretʼkan uni do muhin reakʼ phosole ira;
ar uniyakʼ raṅgao reakʼ ṭheṅga do ạuṛiyagokʼtaea.
9Danetʼkan hoṛ okoe do acʼakʼ jomakʼ reakʼ bhag khon reṅgecʼ orecʼkoe emako kan
uni do bhore ńama.
10Landa dhutʼicʼ do laga ńirime, inạkhan jhogṛa do oḍokʼ calakʼa;
ar kạphạriạu ar lajao hõ cabakʼa.
11Okoe hoṛ khạṭi ontore dulạṛ ar daya reakʼ kathae roṛ
uni do rajge gate peṛa lekae ńamea.
12Probhu Isor do ạkile rukhiyạya,
menkhan bepạtiạukoakʼ katha doe ạuṛiyakʼ ocoytakoa.
13Asaṅpoḍa doe mena, “Bahrere dhạcri kul menaea,
kulhireń oḍoklen khange iń doe gojeńa.”
14Eṭakʼ maejiu reakʼ moca do khạndri khạndṛuṅ kana;
ar Probhu Isore raṅgaoae kan hoṛ do onaregeye ńurokʼa.
15Gidrạ do sobhabtegeko bebujgea,
menkhan ḍanṭao ṭheṅga do uni khon onae laga pharaka.
16Dhon lab lạgitʼ okoe hoṛ reṅgecʼkoe santaoko
se okoe hoṛ kisạ̃ṛkoe danako
unkin banar hoṛge ṭonṭare kin paṛaokʼa.
Ạkilan hoṛkoakʼ sopolha
17Ạkilankoakʼ kathare lutur oḍaotam, ar okaṭakʼko menetʼ ona ańjomme;
ar iń okaṭakʼ sikhnạtiń emamkan ona moneyakʼme.
18Ona cecetʼakʼ amakʼ ontorrem rebetʼ dohole khan do jutgea;
ona do sanam ghạṛicʼ amakʼ luṭire tahenma.
19Probhu Isorre jemonem bhorsa daṛeakʼ
onate iń do teheń, jotowakʼiń baḍae ocoketʼmea.
20Solha ar ạkil reaṅ am lạgitʼ cetʼ
pegel goṭecʼ solha reakʼ katha bạń ol akawatʼmea?
21Iń do cetʼ sạri ar bhorsateakʼ kathako bạń cetʼ akawatʼmea,
jemon onam em daṛeako
one okoe do amko kol akatʼme?
(1)
22Mitʼṭen hoṛ doe nandange iạte uniyakʼ jinisko alom hataotaea,
ar bicạrre harkhetokʼ hoṛ do alom maraoea.
23Ente Probhu Isor do mamblareye onko sejokʼa,
ar okoe onkoakʼ jiniskoko recʼ ạguakatʼ
uni do onkoakʼ jiwiye hataotakoa.
(2)
24Ṭheṭa hoṛ sãote do alogem gatekʼa;
ar okoe usạrateye raṅgao hodokʼ uni sãote hõ alom soṅgekʼa.
25Arem onka lekhan am do uni lekam ceda
ar jhamparem paṛaokʼa.
(3)
26Ti dohokate jãhãeakʼ rin reakʼ jạmin do alom hoyokʼa;
27Ona bam hala ruạr daṛeakʼ khan
amakʼ giticʼakʼ aṭetʼ hõ
am ṭhen khon idikʼa.
(4)
28Amren hapṛamko do simạ reakʼ okaṭakʼ cinhạ dhiriko
bandhao oṭo akatʼ,
ona do alom ocoga.
(5)
29Am do cetʼ nonkan jãhãe hoṛem ńel akatʼkoa
oko do gạkhuṛ titeye kạmikan?
Uni do rajko lạgitʼe kạmiya,
ar hoṛko tabere do baṅa.
(6)
Santali Bible © Bangladesh Bible Society, 2021.