Kạhtukko 21
21
1Probhu Isorakʼ tire rajakʼ mon do gaḍa dakʼ leka;
Probhu Isor jãhã secʼge monae ontegeye mohnaḍayede kana.
2Manwa do sanam horge acʼ ṭhen do sojhegetaea,
menkhan Probhu Isor do uniyakʼ ontorre tulạyetʼtaea.
3Probhu Isor ṭhen do janwar dãṛẽ samaṅko khon
dhorom ar hok reakʼ kạmige ḍher bạsutakʼ kana.
4Bedhoromkoakʼ mẽtʼ do bạḍạite perecʼgea ar ontor do phulạugea;
onkoakʼ diuhege kại kantakoa.
5Khaṭaokʼkan hoṛ do hudis joṅakʼkote khạṭige borkote ńama.
Menkhan okoe hoṛ do begor hudiste
usạrate kạmiye ehob uni do khạṭige ṭonṭareye paṛaokʼa.
6Eṛe alaṅte okoe dhonko hameṭetʼkan onko do moronko ńam baṛayeda;
onko lạgitʼ ona dhon hameṭjoṅ do gujukʼ lahare
thoṛagan suk reakʼ sãhetʼkana.
7Bedhoromkoakʼ jor bojor do akotegeye khayotʼ idikoa,
ente onko do hokakʼ kạmiko phesṛao giḍiyeda.
8Ghạṭte perecʼ hoṛakʼ jion do khiṛjạṅ khoṛjoṅ,
menkhan khạṭi hoṛ do dhoromteye kạmiya.
9Jhogṛayicʼ maejiu tulucʼ mitʼ oṛakʼre tahen khon
chat reakʼ mitʼ konare eskar tahenge bhagea.
10Bạṛicʼ hoṛ do hạn reakʼe kurumuṭuiya;
ar uni pheḍren hoṛ do uni khon jãhãn dayage bako ńama.
11Landa dhutʼicʼ sạjại lekhan lelhayicʼ do ạkile hameṭ joṅa;
ạkilan hoṛ solha emae khan uni do bude hameṭjoṅa.
12Dhoromicʼ Isor do bedhoromicʼakʼ oṛakʼe ạri bạndhiyeda;
ar onko bedhoromkoe marao giḍiyetʼkoa.
13Okoe hoṛ reṅgecʼkoakʼ rakʼjoṅre luture tubetʼetʼtae,
Uni do tinre acʼe rakʼ homora unre okoe hõ bako luturataea.
14Oko okote emakʼ dan do raṅgaoe dapala,
ar gochare emakʼ nońjor do kurkurạukʼ edrege.
15Hokakʼ kạmi lekhan dhorom hoṛ doko rạskạkʼa,
menkhan bạṛicʼ kạmiko doko torasokʼa.
16Okoe hoṛ bud reakʼ hor bạgikate eṭakʼ secʼe ghańjeṛokʼ
uni do gocʼko sãoteye tahena.
17Okoe hoṛ kusi rạskại dulạṛetʼ uni doe reṅgejokʼa;
okoe hoṛ darkha rasa ar mahkaokʼ sunumkoe dulạṛetʼ
uni do tishõ bae kisạ̃ṛ daṛeakʼa.
18Ar mucạtʼre dhorom hoṛ bodolte bedhoromko
ar bhage hoṛ bodolte bepạtiạrko kosṭoko ńama.
19Jhogṛakʼkan ar kheń kheńokʼkan maejiu sãote mitʼ oṛakʼre tahen khon
hahaṅkarre calaokate girobasokʼge bhagea.
20Budankoakʼ oṛakʼre do damanakʼ dhon ar mahkaokʼ sunum tahena,
menkhan bebuj hoṛ do onae ublạ ḍublạ cabaya.
21Okoe hoṛ do ahkaokʼ salakʼ sạri ar pạtiạr horteye calakʼ
uni do jionre, bhor ar mane ńama.
22Ạkilan hoṛ do daṛeankoakʼ nagraha cetanteye teṅgokʼa
ar okaṭakʼ gaṛre onkoko bhorsa akan onae marao giḍikatakoa.
23Okoe acʼakʼ moca ar alaṅe dobnao
uni do muhin khon rukhiyại ńama.
24Bạḍại ar dhomokkan hoṛakʼ ńutum do, “Landa dhutʼicʼ;”
uni do bạ̃ṛti gorbokʼ tulucʼe kạmiya.
25Asaṅpoḍa hoṛakʼ laloc do uniyakʼ gujukʼgeye ạguiya,
ente uniyakʼ ti do kạmi hõ bae kạmiya.
26Nonkan hoṛ menakʼkoa okoe do sanam ghạṛicʼko laloc,
menkhan dhorom hoṛ doe emokʼa ar bae cuputʼ ruạṛa.
27Bedhoromkoakʼ dãṛẽ Probhu Isor doe hirkhạwakʼkana,
ar ona bạṛicʼ monsubạte ạgulen khan
enḍekhan ona do artetʼge hirkhạwakʼ hoyokʼa.
28Eṛe goha do marao cabakʼa,
menkhan okoe hoṛ mon lagao kateye ańjom uniyakʼ katha do jaejug tahena.
29Bedhorom hoṛkoakʼ mẽtʼãhãre jãhãn lajao do baṅ ńelokʼa,
menkhan dhorom hoṛ do acʼakʼ jion horre taṛam lạgitʼe khạṭigea.
30Jãhãn ạkil, jãhãn bud ar jãhãn goṭawakʼge
Probhu Isor upạrte ohoge teṅgo daṛelena.
31Lạṛhại hilokʼ lạgitʼ sadom do sajao doho akadere hõ,
jitạukʼ do Probhu Isorrege ṭehãḍokʼ kana.
Santali Bible © Bangladesh Bible Society, 2021.