Kạhtukko 19
19
1Okoe khaṭo hudisan hoṛ peṛta kathae roṛ
uni khon uni reṅgecʼ hoṛgeye bhagea
one okoe do sạriyakʼreye dãṛãnkan.
2Ạkil baṅ tahen hõ baṅ bhagea;
okoe hoṛ usạrate joto kạmiye menjoṅ
uni doe bhulgea.
3Manwa do apnarakʼ lelhatetʼge bạṛicʼ horteye idiyea,
menkhan enhõ uniyakʼ ontor do Probhu Isor upạrte rakabokʼtaea.
4Dhon do aema gateye ńamkoa,
menkhan reṅgecʼ hoṛ do acʼren gateye adeya.
5Eṛe goha emokʼicʼ do sạjại ńamte hõe ńama;
ar okoe gohayicʼ do eṛeye roṛ uni do rehay bae ńama.
6Cetan hudạren hoṛakʼ daya ńam lạgitʼ
ḍherkoge uniko bạsutaea,
ar dan emokʼicʼren do sanamkoge gateko hoyokʼtaea.
7Reṅgecʼ hoṛ do acʼren peṛa pạrbhạ jotogeko kurudaea
ar acʼren gateko hõ
acʼ khon pharakreko tahena;
ar uniyakʼ nerha jerhare onko do bako luturakʼa.
8Okoe apnarre dulạṛokʼkan uni do bude hameṭeda;
ar okoe bud salakʼe calakʼ uni do bhore ńama.
9Eṛe gohayicʼ do sạjạiye ńamgea;
ar okoe eṛe gohae em uni doe jarkharokʼa.
10Khaṭo bujanko lạgitʼ hesecʼ sekrejokʼ lek baṅ kan khan
golam lạgitʼ rajko cetanre mạlikokʼ do
arhõ belekakʼ kana.
11Okoe hoṛakʼ bud menakʼtae ona bud do thoṛate
ohoe raṅgao gotʼ ocolea;
ar uniyakʼ man kangea ghạṭ ikạkạkʼ do.
12Rajakʼ raṅgao do gondraokʼkan dhạcri kul leka,
menkhan uniyakʼ daya do ghãsre ńur akan sisir dakʼ leka.
13Khaṭo bujan hopon do apattetʼe sorbonas edekana,
ar jhogṛakʼkan era do ṭopʼ ṭopʼ ńurokʼkan sate dakʼ lekanae.
14Oṛakʼ duạr ar dhon do apat ṭhen khon ńamokʼa,
menkhan budan era do Probhu Isor ṭhen khongeye ńamokʼkana.
15Asket do dudṛume janam ocoya;
ar asaṅpoḍa hoṛ do reṅgecʼteye haronokʼa.
16Okoe hoṛ Isorakʼ ạn ạrikoe manao uni do acʼakʼ jiwire rukhiyạitaea;
menkhan okoe do acʼakʼ jion hor secʼ bae moneyakʼkan uni doe gujukʼa.
17Reṅgecʼ orecʼkoe dayawako kan hoṛ do Probhu Isorgeye dayawae kana;
Probhu Isorge uniyakʼ upkạr reakʼ dan doe emokʼkana.
18Amren gidrạ ḍanṭaoem, ente onare do as menakʼa;
uniyakʼ gujukʼ do alogem khoja.
19Edre ḍhergetae hoṛ do ḍanḍom ocoaeme;
entem rukhiyạ lekhan arhõ onkaetege hoyokʼtama.
20Solha moneyakʼme, ar ḍanṭao manaome;
tayomte am do ạkilanicʼ em hoyokʼa.
21Manwa monre ạḍi lekan phundi tahena,
menkhan Probhu Isor okaṭakʼe ṭhik dohoakatʼ onage hoyokʼa.
22Manwa do manwa ṭhen khon dulạṛe khojkana;
phạsiạra hoṛ khon reṅgecʼ hoṛgeye bhagea.
23Probhu Isor botorae do jion secʼe idiya;
okoeyakʼ ona jion menakʼ uni do tirpite tahena,
jãhãn muhinge uni ṭhen do baṅ hecʼ daṛeakʼa.
24Asaṅpoḍa do thạrire tiye topoytaea;
menkhan moca hạbicʼ ti rakabtae hõe asketokʼa.
25Landa dhutʼicʼem dal lekhan lelha hoṛ doe sontorokʼa;
ar bujhạntar hoṛem nisṛạule khan uni do ạkile hameṭ joṅa.
26Okoeṭakʼ hopon do apate santaoe ar eṅgattetʼe laga ńiri,
uni do onkin cetanre lajao ar henostae ạguiya.
27E bạbu, ińakʼ ḍanṭao bam moneyakʼ khan
enḍekhan am do ạkil reakʼ cecetʼakʼ khon eṭakʼ secʼem ghańjeṛokʼa.
28Bạṛicʼ gohayicʼ do hok reakʼ bicạr iạteye landa dhutʼeda;
ar bạṛicʼko do behokre unum akanko tahena.
29Landa dhutʼetʼko lạgitʼ do sạjại tear dohoakana,
ar khaṭo bujankoakʼ dea lạgitʼ do cạbukge.
Santali Bible © Bangladesh Bible Society, 2021.