Kạhtukko 18
18
1Okoe hoṛ apnarte somaj khon begare tahenkan
uni do acʼakʼ sana purạutae lạgitʼe kurumuṭuiya,
ar mitʼke mitʼ sạri ạkil tulucʼe jhogṛakʼa.
2Khaṭo bujan hoṛ do boge bạṛicʼ bujhạure
jãhãn rạskạge bako ńama,
menkhan onko do apnarakʼ mot sodorge rạskạko bujhạua.
3Bạṛicʼakʼ do hirkhại ạguiya
ar bemanot do henostage.
4Manwawakʼ moca reakʼ katha do hasa latar reakʼ dakʼ leka,
menkhan ạkilan hoṛakʼ moca katha do
jharna khon ạtu oḍokokʼkan dakʼge.
5Bedhoromicʼakʼ mẽtʼãhã beṅgetʼakʼ do baṅ bhagea,
onate dhoromicʼe behokʼ ocokʼa.
6Khaṭo budanicʼakʼ katha iạte mambla hoyokʼa,
ar acʼakʼ katha iạtege uni do dale joma.
7Khaṭo budanicʼakʼ mocage uniyakʼ jarkhare ạguiya;
ar acʼakʼ katha iạtege jhạlireye paṛaokʼa.
8Nindạuicʼakʼ katha do sebel jomakʼ leka,
ona do manwa ontor reakʼ khạndrire bolokʼa.
9Okoe acʼakʼ kạmireye asketokʼ uni do jarkharicʼ ren boeha kanae.
10Probhu Isor do kajak aotan gaṛ kanae;
dhoromko onḍeko ńir sen khan rukhiyạko ńama. 11Kisạ̃ṛkoakʼ dhonge onkoakʼ nagraha reakʼ pạcri do;
menkhan onko do akoakʼ dhonge rurukhiyạ reakʼ pạcriko hudiseda.
12Manwa ontor reakʼ bạḍại do jarkhare ạguiya,
13Ańjom laharege okoe hoṛe roṛ ruạṛ
uni lạgitʼ ona do lelhatetʼ ar lajao reaṅ kana.
14Hoṛakʼ jiu do kạhil ruại sahao daṛeakʼa,
menkhan talga tạwạkʼ jiu do okoeye gokʼ daṛeakʼa?
15Okoeyakʼ monre buj menakʼ uni do ạkile hameṭ joṅa,
ar ạkilankoakʼ lutur do ạkile ńam baṛaea.
16Dan do manwa lạgitʼ hore phaelaoa,
ona do kisạ̃ṛko ṭhene idi seṭerokʼ kana.
17Mamblare okoe pạhilre acʼ reaṅ kathae roṛ
uniyakʼ katha do unrege sạri kana mente bujhạukʼa,
one tin hạbicʼ armitʼ hoṛ hecʼkate uniye jeraye.
18Gulibãṭkate jhogṛa do mucạdokʼa
ar daṛeanko talare hõ ona doe chinḍạua.
19Boeha hoteteye opoman ocoakan boeha do
kajak nagraha khon hõe keṭecʼgea;
ar jhogṛa kạphạriạu do raj dolan reakʼ huṛkạṛ leka.
20Manwa do acʼakʼ katha hotete oka joe ńam
onate uniyakʼ ontor do perejokʼtaea;
ar acʼakʼ katha iạte okae ńam onategeye kusikʼa.
21Moca reakʼ katharege jion ar moron do ṭehãḍokʼa;
okoe lek lekan kathako roṛ onko do ona reakʼ joko ńama.
22Okoe hoṛ bạhuye ńamekan uni do bhore ńama
uni do Probhu Isor ṭhen khonge dayae ńama.
23Reṅgecʼ hoṛ do daya ńam lạgitʼe nerha jerhakʼa,
menkhan kisạ̃ṛ hoṛ do saegatʼgeye roṛ ruạṛa.
24Okoeren aema gate menakʼko uniyakʼ jarkhar do ḍherge hoe botecʼjokʼtaea,
menkhan nonkan gate menakʼkoa okoe do boeha khon hõ ḍhere pạtiạrge.
Santali Bible © Bangladesh Bible Society, 2021.