Kạhtukko 17
17
1Jhogṛa ar kạphạriạukʼte perecʼ bhoj oṛakʼ khon
sulukte tahẽkate mitʼ kecakʼ piṭhạ hõ bhagegea.
2Ạkilteye kạmikan guti do hopon cetanre hukume calaoa,
ar boehako talaren leka ạidạrireye bakhra joṅa.
3Rupạ biḍạu aṭkar lạgitʼ do galao reakʼ jinis menakʼa
ar sona biḍạu aṭkar lạgitʼ jinis do culhạ,
menkhan manwa ontor do Probhu Isorgeye biḍạu aṭkara.
4Bạṛicʼ hoṛ do dusṭạmi kathae ańjoma;
ar eṛeyicʼ do kharap alaṅ reakʼe luturakʼa.
5Okoe hoṛ reṅgecʼkoe nisṛạuko uni do onkoren sisirjạuicʼe henostawae kana;
Okoe eṭakʼkoakʼ muhinreye rạskạkʼkan uni do sạjạiye ńamgea.
6Goṛom gidrạko do haṛam hoṛkoren mukuṭ leka,
ar baba do acʼren hoponkoren ṭhonok kanako.
7Nicạṛ monan hoṛkoakʼ maraṅ maraṅ katha roṛ do baṅ sajaokʼa,
arhõ cetan hudạren hoṛkoakʼ hõ eṛe roṛ do baṅ sajaokʼa.
8Okoe hoṛ ghuse emokʼ uni ṭhen ona do guni reakʼ dhiri leka;
uni jãhã secʼgeye beṅgetʼ ạcur ontege jo bahakʼkana.
9Ghạṭ ikʼkạyicʼ do dulạṛe ńam baṛayeda,
menkhan ona lại baṛayicʼ do gate reakʼ bhaṅgone janam ocoya.
10Khaṭo bujan hoṛ mitʼsae dhaoko dale khon,
bujhạntar hoṛ do mitʼ dhao eger hõ ona khon bạ̃ṛti bhijạuaea.
11Huletʼkạnicʼ do eken bạṛicʼakʼ secʼgeye capaokʼa;
onate uni upạrte mitʼṭen kurmutạha paṭhaonae kol ocokʼa.
12Khaṭo bujan hoṛ okoe do lelhatetʼreye unum akan
uni sãote ńapamokʼ khon
hoponko recʼakade bana sãote ńapamokʼge bhagea.
13Okoe hoṛ upkạr bodole behoketʼkan,
behok do uniyakʼ oṛakʼ tishõ bae bạgiyakʼa.
14Jhogṛa reakʼ ehopʼ do phoṛ oḍokokʼkan dakʼ leka,
onate reṭepeṭe ehobokʼrege ona do ikạkakʼme.
15Bạṛicʼicʼ dhorom metae hoṛ ar dhoromicʼ bạṛicʼ metae hoṛ,
Probhu Isor do unkin banargeye hirkhawạkin kana.
16Ạkil hameṭ lạgitʼ khaṭo bujan lelha hoṛakʼ tire
ṭaka tahẽlen khan cetʼ lab?
Ente uniyakʼ ma bujge bạnukʼtae.
17Gate do jaogeye dulạṛa,
ar boeha do muhinre goṛowam lạgitʼgeye janamokʼ kana.
18Okoe hoṛakʼ buj reakʼ okulạn menakʼ
uni do acʼ aḍepaseren hoṛ ṭhene jạminokʼa.
19Okoe hoṛ bạṛicʼ monte tahene kusiyakʼkan
uni do reṭepeṭeye dulạṛa;
ar acʼte usulic hoṛ do jarkhare ạgujoṅa.
20Peṛta ontor hoṛakʼ do bhạlạige baṅ hoyokʼtaea;
ar phạsiara alaṅ do muhinreye paṛao ocoyea.
21Khaṭo bujan hopon do eṅgat apatʼ lạgitʼ duke ạguiya;
ar bebuj hoponren apatakʼ do rạskạge bạnukʼtaea.
22Rạskạkʼkan ontor do hoṛmo mońje dohoya,
menkhan rạputʼ mon do hoṛmoe nosṭo ocoya.
23Bedhoromicʼ do gocha khon ghuse hataoeda
hok reakʼ horko konḍeyae lạgitʼ.
24Buj menakʼtae hoṛ do ạkile moneyakʼ kana,
menkhan khaṭo bujan hoṛakʼ mon do beṛhaeteye beṅgetʼ ạcura.
25Khaṭo bujan hoṛ do apattetʼe ạṛis cabayea,
ar eṅgatakʼ mon doe haṛhatʼ ocoytaea.
26Dhorom hoṛ ḍanḍome do baṅ bhagea
se coṭ hudạren hoṛakʼ sạriạkʼtetʼ iạte dale hõ baṅ ṭhika.
27Budan hoṛ do apnar sambṛaokʼte kathae roṛa;
ar buj menakʼtae hoṛakʼ bohokʼ do reaṛgetaea.
28Thirge tahẽlen khan lelha hoṛ hõ ạkilanicʼ menteye hudisokʼa,
ar moca sikupkateye dohole khan uni do bujhạntar hoṛ lekae hudisokʼa.
Santali Bible © Bangladesh Bible Society, 2021.