Kạhtukko 14
14
1Ạkilan maejiu do acʼakʼ soṅsare benao rakaba,
menkhan bebuj maejiu do
acʼakʼ titege soṅsare rạpuda.
2Okoe dhoromteye calakʼ uni do Probhu Isore botoraea,
menkhan okoe peṛta horteye calakʼ uni doe nihạ̃tea.
3Bebuj hoṛ do acʼakʼ kathare bạḍạiye sodor ocoya,
menkhan ạkilanko do akoakʼ katha iạte rukhiyạko ńama.
4Ḍaṅgra bako tahẽlen khan goṛa do khạlige tahena,
menkhan phẽṭaṛakʼ daṛetege phosol do bạ̃ṛti ńamokʼa.
5Pạtiạr goha do eṛe katha bae roṛa,
menkhan phạsiạra goha do eṛe kathae roṛa.
6Landa dhutʼicʼ hoṛ do sendrate ạkil bae ńama,
menkhan bud menakʼtae hoṛ do usạrage ạkile hameṭ joṅa.
7Bebuj hoṛ ṭhen khon calao joṅme,
ente uni khon bidiạ reakʼ katha do bam ńama.
8Acʼakʼ hore orom ona kangea budan hoṛakʼ ạkil do,
menkhan chol kopoṭ do bebuj hoṛkoakʼ lelhatetʼge.
9Bebuj hoṛ acʼakʼ kạiye aṅgoctae do nichokokʼ lekae bujhạua
menkhan bhage hoṛ do samgekʼgeye bạsutakʼ kana.
10Mon do apnarakʼ haṛhatʼe baḍaekana;
menkhan am ar iń do ona reakʼ rạskạre balaṅ seletʼ daṛeakʼa .
11Bạṛicʼkoakʼ oṛakʼ do jarkharokʼtakoa,
menkhan dhorom hoṛkoakʼ tạmbu do arhõ lạṭu idikʼa.
12 #
Kạh 16.25
Mitʼṭecʼ hor menakʼa okaṭakʼ do manwakoakʼ mẽtʼre ṭhik bujhạukʼkan,
menkhan ona hor mucạtʼre do gujukʼ menakʼa.
13Landaere hõ mon reakʼ duk do tahengea,
ar rạskạ mucạtʼre hõ hirdạnige.
14Bepạtiạr hoṛ do akoakʼ beboharteko tirpitokʼkana,
menkhan bhage hoṛko do apnarakʼ beboharte bạ̃ṛtiko tirpitokʼkana.
15Lelha hoṛ do sanam kathageko pạtiạukʼa,
menkhan sontorokʼ hoṛ do bud salakʼe taṛama.
16Ạkilan hoṛ doe sontorokʼa ar bạṛicʼ khone sahaṛokʼa,
menkhan bebuj hoṛ do acʼ cetanre pạtiạue dohoya
ar bae sontorokʼa.
17Naseyakʼte raṅgaokʼ hoṛ do lelhayicʼ lakae kạmiya,
menkhan bujhạntar hoṛ doe jiwi hataṛa.
18Khaṭo budan hoṛko do lelhawakʼko kạmiya,
ar bujhạntar hoṛ do bidiạteko dạhṛikʼa.
19Bạṛicʼ hoṛko doko tabekʼa bhage hoṛko samaṅre,
ar phạsiạrko doko tabekʼa Isor botorae hoṛko ṭhen.
20Reṅgecʼ hoṛ do acʼren peṛako hõ bako kusiwaea,
menkhan kĩsạ̃ṛ hoṛren do aema gateko tahena.
21Okoe acʼ aḍepaseren hoṛkoe nihạ̃tko uni doe kạiyeda,
menkhan okoe reṅgecʼkoe dawawako kan uni doe bhạgangea.
22Okoe bạṛicʼ kạmi lạgitʼ phundiko aṭaoetʼ onko do cetʼ bạṛicʼ secʼ bako calakʼ kana?
Menkhan okoe do bhạlại lạgitʼko ponthayetʼ
onko lạgitʼ do pạtiạr ar biswạsgeko ńama.
23Joto lekan khaṭaokʼrege lab do menakʼa,
menkhan eken luṭi reakʼ roṛte do ṭonṭa menakʼa.
24Ạkilankoakʼ kuṛại do onkoakʼ dhonge,
menkhan khaṭo budankoakʼ lelhatetʼ do arhõ lelhatetʼe janam ocoya.
25Okoeṭakʼ goha do sạri kathae roṛ uni do eṭakʼicʼakʼ jiwiye rukhiyạitaea,
menkhan eṛe gohayicʼ doe soprota.
26Dhorom hoṛ do keṭecʼ bhorsa menakʼtaea
ar uniren gidrạko lạgitʼ do aotan gaṛ menakʼa.
27Dhorom do jion reakʼ jharna kana;
moron reakʼ jhạliko khon paskaokʼ lạgitʼ.
28Porjako saṅgelen khan rajakʼ do ṭhonok hoyokʼa,
menkhan kạmiạko begor mạlikakʼ do jarkharaokʼge.
29Okoe usạrate bae raṅgaokʼ uni doe budan hoṛkana,
menkhan usạrate raṅgao godokʼicʼ do lelha hoṛ lekanae.
30Nirại mon do hoṛmo mońje dohoya,
menkhan hiskạ do hoṛmoe duk ocoya.
31Okoe reṅgecʼ hoṛe santaoko
uni do sisirjạuicʼe henostawae kana,
menkhan okoe hoṛ okulankoe dayawako
uni do acʼren sisirjạuicʼe manotea.
32Bedhoromicʼ do acʼakʼ bạṛicʼ kạmi iạteye ńurhạ ocokʼa,
menkhan dhorom hoṛ do gujukʼre hõ as tahentakoa.
33Okoeyakʼ buj menakʼ onkoakʼ ontorre do ạkil girobasokʼa,
menkhan khaṭo budanko do akoakʼ ạkil
jạhir lạgitʼko lạhum tạhum baṛaea.
34Dhorom do jạtrenkoe maraṅkoa
menkhan kại do jạtrenkoe bemanotkoa.
35Okoe ạkil salakʼe kạmi raj do uniye bạsutaea,
menkhan okoe kạmiạyicʼ do lajao paṛaoakʼe kạmi
uni do uniren edreyanicʼe hoyokʼa.
Santali Bible © Bangladesh Bible Society, 2021.