Kạhtukko 13
13
1Ạkilan hopon do apatakʼ sikhạunae ańjoma,
menkhan landa dhutʼicʼ hoṛ do nisṛạu bae hetawakʼa. 2Manwa do acʼakʼ kathatege bhạlạiye lab daṛeakʼa;
ar bepạtiạu hoṛko do santaoko gagocakʼa.
3Okoe acʼakʼ mocae sontortae uni do acʼakʼ jiwiye rukhiyạitaea,
menkhan okoe begor sontorte kathae roṛ uni doe jarkharokʼa.
4Asketicʼ do ńam baṛaeye khoja menkhan cetʼge bae ńama,
menkhan khaṭaokʼkan hoṛ do acʼakʼ khojokʼakʼ khon hõ ḍhere ńama.
5Dhorom hoṛ do eṛeakʼko hirkhạwakʼa,
menkhan bạṛicʼ hoṛ do lajao ar durnamkoko hoyokʼa.
6Isor botorae do dhorom hoṛe rukhiyạyea,
menkhan bedhorom do kại hoṛakʼ jarkhare ạguiya.
7Apnarte kisạ̃ṛ udugokʼicʼ do acʼakʼ cetʼge bạnukʼtaea;
menkhan reṅgecʼe udugokʼ hoṛ do ḍher dhon menakʼtaea.
8Kisạ̃ṛ hoṛ do jiwi bańcaotae lạgitʼ dhone khoroca.
Menkhan reṅgecʼ hoṛ do okoe hõ bako botor ocoyea.
9Isor botoraekoakʼ marsal do ḍig ḍig jolokʼa,
menkhan bedhoromkoakʼ diuhe do ĩṛĩjokʼtakoa.
10Bạḍại do jhogṛa ar reṭepeṭeye sirjạu ocoya,
menkhan okoe hukumko ańjometʼ onko ṭhen do ạkil ńamokʼa.
11Khaṭao begorte oka ṭaka ńamokʼ ona do oṭaṅokʼa,
menkhan okoe hoṛ khaṭaokate ṭakae doho jarwae uniyakʼ do baḍhaokʼtaea.
12As akanakʼ purạukʼte bilomokʼ khan ontor do rạpudokʼa, 13Okoe hoṛ Isorakʼ kathae nihạ̃t uni do acʼakʼ nosṭokʼe ạgujoṅa,
menkhan okoe hoṛ Isorakʼ hukumkoe manao
uni do acʼakʼ kuṛạiye ńama.
14Ạkilan hoṛakʼ cecetʼakʼ do jion reakʼ jharna leka;
moron reakʼ pạsiko khon sahaṛokʼ lạgitʼ.
15Okoeyakʼ bhage bud menakʼ uni do manote ńama,
menkhan bepạtiạr hoṛ doko marao cabakʼa.
16Sontorokʼkan hoṛ do ạkil salakʼe kạmiyeda,
menkhan khaṭo budan hoṛ do acʼakʼ lelhatetʼe sodoreda.
17Bạṛicʼ khobor emokʼicʼ do muhinreye paṛaokʼa,
menkhan pạtiạricʼ do suluke hoeocoya.
18Okoe hoṛ ḍanṭao bae bạsutakʼkan uni do okulan ar lajaoreye paṛaokʼa,
menkhan nisṛạue hetawakʼkan hoṛ doe manot ocokʼa.
19Mon reakʼ sana purạulen khan ontor tirpitokʼa,
menkhan bạṛicʼ khon sahaṛokʼ do bebuj lạgitʼ
hirkhạwakʼ kana.
20Ạkilanko sãote okoeye senokʼ uni do ạkilane hoyokʼa,
menkhan okoe bebuj hoṛkoren gateye hoyokʼ uni doe baṛijokʼa.
21Bạṛicʼakʼ do kạiyanko tayomteye ńir hijukʼa,
menkhan bhạlại do Isor botoraekoakʼ kuṛại kana.
22Bhage hoṛ do acʼren goṛom gidrạko lạgitʼ ạidạriye doho oṭokakʼa,
menkhan kạiyankoakʼ dhon do Isor botoraeko lạgitʼge doho akan tahena.
23Reṅgecʼkoakʼ jumire do aema phosol arjaokʼa,
menkhan behokʼ iạte ona doe recʼocokʼa.
24Okoe acʼren hopon bae ḍanṭaoede uni do acʼren hopon bae dulạṛ edekana,
menkhan okoe uniye dulạṛ edekan
uni do ḍanṭaoe secʼ hõe moneyakʼ kana.
25Isor botorae hoṛko do lacʼ bikʼko joma,
menkhan bedhoromko do lacʼ bikʼ jom bako ńama.
Santali Bible © Bangladesh Bible Society, 2021.