Kạhtukko 15
15
1Mạ̃hir roṛ ruạṛ do raṅgaoe cabaea,
menkhan saegatʼ katha do raṅgaoe janam ocoya.
2Ạkilan hoṛkoakʼ alaṅ do bidiại hạṭińeda,
menkhan bebujkoakʼ moca do
lelhawakʼe oḍokeda.
3Probhu Isorakʼ mẽtʼãhã do sanamko secʼge menakʼa;
ona do boge ar bạṛicʼ hoṛkoe tunkhiyetʼkoa.
4Mạ̃hir alaṅ do jion reakʼ daṛe kana,
menkhan eṛe alaṅ do jiue talga tạuạga.
5Bebuj hoṛ do acʼ apatakʼ ḍanṭaoe nihạ̃ta,
menkhan bujhạntar hoṛ do nisṛạue moneyakʼa.
6Dhorom hoṛakʼ oṛakʼ do aema dhon menakʼa,
menkhan bedhoromkoakʼ arjaoakʼ do muhine ạguiya.
7Ạkilan hoṛkoakʼ luṭi do bidiại pasnaoeda,
menkhan bebujkoakʼ ontor do onka baṅkana.
8Bedhoromkoakʼ jotowakʼge Probhu Isor doe hirkhạwakʼa,
menkhan khạṭi hoṛkoakʼ koejoṅte uni doe kusikʼkana.
9Probhu Isor do bedhoromkoakʼ hore hirkhạwakʼa,
menkhan okoe hok reakʼ kạmi lạgitʼko laha idikʼ
onko doe dulạṛkoa.
10Okoe ṭhik horko bạgiyakʼ onko lạgitʼ do sạjại menakʼa;
ar okoe nisṛạue kurudakʼkan uni doe gujukʼa.
11Probhu Isor samaṅre Sheol ar Abbadon banarge sodorgea;
enḍekhan tinạkʼ artetʼge manwakoakʼ mon do!
12Landa dhutʼetʼicʼ do nisṛạu katha bae kusiyakʼa;
uni do ạkilanko ṭhen bae calakʼa.
13Ontorre rạskạ tahẽlen khan mẽtʼãhã hõ kusige ńelokʼa,
menkhan mon reakʼ bhabnate jiu do talga tạuạgokʼa.
14Okoeyakʼ monre buj menakʼ uni do ạkile sendraea,
menkhan khaṭo bujankoakʼ moca do lelhawakʼe ạtińjoṅa.
15Dukokʼ kankoakʼ do joto dinge bạricʼgetakoa,
menkhan kharsalayikʼ do joto dingeye hesecʼ sekrejokʼa.
16Be suluk sãote ḍher dhon lab joṅ khon
Probhu botorae tulucʼ thoṛawakʼge bhagea.
17Aṛakʼ utu ar ona seletʼ dulạṛge bhagea
jel utu daka ar ona seletʼ kurud khon do.
18Raṅgaokʼ hoṛ do jhogṛakʼgeko ehoba,
menkhan bae raṅgao hodokʼicʼ do jhogṛae thir ocoya.
19Asaṅpoḍa hoṛakʼ hor do jạnum jhạuạkote ṭạṭi esetʼ akatʼ hor leka,
menkhan dhorom hoṛakʼ hor do sạriạugetakoa.
20Ạkilan hopon do apatakʼ jionre rạskạko ạguiya,
menkhan khaṭo bujan hoṛ do eṅgattetʼe nihạ̃tea.
21Buj reakʼ okulạn okoeyakʼ menakʼ uni do lelhatetʼreye rạskạkʼ kana,
menkhan okoeyakʼ buj menakʼ uni do sojhe horteye taṛameda.
22Solha begor goṭawakʼ do baṅ purạukʼa,
menkhan saṅge sosolhakote ona do purạukʼgea.
23Okoe hoṛ lek lekate kathae roṛ uni doe kusikʼa;
ente ṭhik oktere katha roṛ do tinạkʼ bhage!
24Budan hoṛakʼ jion reakʼ hor do cetan secʼe idiya,
ar onate uni do patal puri khon rukhiyại ńama.
25Probhu Isor do bạḍạikoakʼ oṛakʼe rạputʼeda,
menkhan rạnḍi ar dukhikoakʼ simạ doe ṭarhao aroeya.
26Probhu Isor do bạṛicʼ monsubạkoe hirkhạwakʼ kana,
menkhan bhạlại reakʼ kathako do uniyakʼ mẽtʼre khạṭigea.
27Lalociạ hoṛ do acʼakʼ gharońjre duke ạguiya,
menkhan okoe hoṛ ghuse hirkhạwakʼ uni do jione ńama.
28Dhorom hoṛakʼ ontor do hudiskateye roṛ ruạṛa,
menkhan bedhoromkoakʼ moca khon do bạṛicʼ katha ạtu oḍokokʼa.
29Probhu Isor do bạṛicʼko khon pharakreye tahenkana,
menkhan uni do acʼ botoraekoakʼ koejoṅe ańjomeda.
30Rạskạte perecʼ mẽtʼ do eṭakʼkoe rạskạ ocoyetʼkoa,
ar bhạlại reakʼ sombat do jaṅ ar jele purṭhạyeda.
31Okoe hoṛ nisṛạukoe luturakʼkan
uni do ạkilanko sãoteye girobasokʼ kana.
32Okoe hoṛ ḍanṭao bae bạsutakʼ kan uni do apnargeye nihạ̃tokʼa.
Menkhan nisṛạu ańjomicʼ do bae hameṭ joṅa.
33Probhu Isor botorae do ạkilokʼ lạgitʼ sikhạuna kana,
ar man ńam reakʼ hor do nindhạnokʼgea.
Santali Bible © Bangladesh Bible Society, 2021.