Kạhtukko 12
12
1Okoe hoṛ ḍanṭaoe kusiyakʼ uni do ạkile dulạṛeda,
menkhan okoe samka sạṭi reakʼ kathae kurudakʼ uni doe orlogea.
2Bhage hoṛ do Probhu Isor ṭhen khon dayako ńama,
menkhan okoe bạṛicʼe phundikan uni do Probhu Isor dusi menteye ṭarhaoea.
3Bedhoromakʼte jãhãe hoṛakʼ jionrege kajaktetʼ do baṅ tahena,
menkhan Isor botorae hoṛakʼ jion reakʼ rehetʼ do kajak tahena.
4Bhage ar gun menakʼtae bạhu do jãwãetetʼ lạgitʼ mukuṭ kanae,
menkhan okoeṭakʼ maejiu do lajao paṛaoakʼkoe kạmikan
uni do acʼren jãwãeyakʼ sea jaṅ lekanae.
5Isor botorae hoṛkoakʼ hudisko do bhageakʼkote perecʼgea,
menkhan bedhoromkoakʼ solhare do phạsiạratetʼ menakʼa.
6Bedhorom hoṛko do mãyãm joroe lạgitʼ tãṛãkʼ akan reakʼ kathako mena,
menkhan dhoromko do rukhiyạ reakʼ kathako roṛa.
7Bedhoromko doko marao utạrokʼa, onkoakʼ bõsko do baṅ tahena,
menkhan dhorom hoṛkoakʼ bõsko do ṭikạu tahena.
8Manwa cetʼleka budko khaṭao ona lekage sarhaoko ńama,
menkhan peṛta hoṛ doko nihạ̃t ocokʼa.
9Acʼte kisạ̃ṛe udugokʼkan menkhan oṛakʼre jomakʼ bạnukʼtayicʼ khon do,
kạmikateye ạsulokʼkan sadharon hoṛgeye sorosa.
10Dhorom hoṛ do acʼren janwarkoe jotonkoa,
menkhan bedhoromkoakʼ daya do bạnukʼa.
11Okoe hoṛ acʼakʼ jumireye khaṭaokʼkan uni do bạ̃ṛti jomakʼ tahentaea,
menkhan okoe do ạuṛiyakʼkoe khudạu baṛeyetʼkan uni do bud reakʼ okulạn menakʼtaea.
12Bạṛicʼ hoṛ do bedhoromkoakʼ luṭakʼ jinis ńańamko khoja,
menkhan Isor botorae hoṛkoakʼ jionre do jo ńamokʼa.
13Bạṛicʼ hoṛ do acʼakʼ kạite perecʼ katha hotete jhạlireye paṛaokʼa,
menkhan dhorom hoṛ do muhin khone paskaokʼa.
14Manwa do acʼakʼ katha hotetege bhạlạiteye perecʼ daṛeakʼa,
ar uniyakʼ kạmi lekate uni do joe ńama.
15Bebuj hoṛ do acʼakʼ horko ṭhikgeye metakʼa,
menkhan ạkilan hoṛ do solhae ańjoma.
16Bebuj hoṛakʼ khĩs do baḍae godokʼa,
menkhan budan hoṛ do opoman bae moneyakʼ kana.
17Soṛa monte roṛetʼ hoṛ do sạriyakʼgeye roṛa,
menkhan eṛe goha do phạsiạrae phuṭạua.
18Saegatʼ katha do tarwaṛe lekae sobokʼa,
menkhan ạkilanicʼakʼ katha doe bogea.
19Sạriyicʼakʼ reakʼ katha do jaejug hạbicʼ tahena,
menkhan eṛeyicʼakʼ reakʼ katha do thoṛa dinge.
20Okoe bạṛicʼ phundiko aṭaoetʼ onkoakʼ ontorre do phạsiạratetʼ tahena,
menkhan okoe bhạlại reakʼ solhako emokʼ onkoakʼ ontorre do rạskạ tahena.
21Dhorom hoṛkoakʼ jionre bạṛicʼakʼ do baṅ hoyokʼa,
menkhan bedhoromkoakʼ jionre bạṛicʼakʼte perecʼ tahena.
22Eṛeyicʼakʼ mẽtʼãhã Probhu Isor doe kurudakʼ kana,
menkhan pạtiạrte kạmikan hoṛ do
uniren rạskạ reakʼ kanako.
23Budan hoṛ do acʼakʼ bidiạ reaṅ bae lại baṛaea,
menkhan bebujko do akoakʼ lelhatetʼko lạṭicʼ baṛaea.
24Khaṭaokʼkan hoṛ doko kisạ̃ṛokʼa,
menkhan asketokʼ hoṛ do eṭakʼko tabereko tahena.
25Bạṛicʼ hudis do manawa ontore bạṛijtaea,
menkhan udgạu reakʼ katha do manwae rạskạ ocoyea.
26Dhorom hoṛ do bạṛicʼ khone sahaṛokʼ kana,
menkhan bạṛicʼ hoṛ do onkoe asokʼ ṭayokʼ ocokoa.
27Asketiạ hor do acʼ sendra gocʼicʼ hõ bae teweńea,
menkhan kurumuṭuyicʼ do damanakʼ dhone hameṭjoṅa.
28Dhorom reakʼ horre do jion menakʼa,
ar ona horre do gujukʼ bạnukʼa.
Santali Bible © Bangladesh Bible Society, 2021.