Kạhtukko 11
11
1Eṛe tulạ do Probhu Isore kurudakʼa,
menkhan hok reakʼ baṭkhara doe kusiyakʼ kana.
2Bạḍại são sãote opoman hõ hijukʼa,
menkhan mạ̃hir sãote do ạkil hijukʼa.
3Khạṭi hoṛko do akoakʼ sạritetʼ hoteteko ạyur ocokʼa,
menkhan bin pạtiạukʼ hoṛ do akoakʼ phạsiạratetʼ iạteko marao ocokʼa.
4Isorakʼ edre tisokʼ pheḍ hijukʼa
enhilokʼ dhon do jãhãn porhoge baṅ hoyokʼa,
menkhan Isor botorae do gujukʼ khone rukhiyạwa.
5Khạṭi hoṛko do Isor botoraeko lạgitʼ sojhe horko benaoa,
menkhan bedhoromko do akoakʼ phạsiạratetʼ iạteko maraokʼa.
6Khạṭi hoṛkoakʼ dhorom do onkoe rukhiyạkoa,
menkhan bepạtiạuko do apnarakʼ jhạliregeko paṛaokʼa.
7Bedhorom hoṛe gocʼlen khan uniyakʼ ashõ nosṭokʼtaea;
Ar uniyakʼ daṛe iạte okakoe asakan tahẽkan ona do nasaokʼtaea.
8Dhorom hoṛ do kosṭo khon bańcaoko ńama,
menkhan ona kosṭo do bedhoromko cetanre hecʼ paṛaokʼa.
9Okoe Isor bae botorae uni do mocate
aḍepaserenkoakʼ bạṛicʼe ạguiya,
menkhan Isor botorae hoṛ do ạkil iạte rukhiyại ńama.
10Isor botoraekoakʼ bhạlại hoylen khan nagraha rạskạkʼa,
ar bedhoromkoko ḍahao maraolenre hoṛko do rạskạteko andoṛa.
11Dhorom hoṛko Isorakʼ bhorko ńamle khan nagraha do maraṅokʼa,
menkhan bedhoromkoakʼ moca hotete nagraha do bạṛijokʼa.
12Okoe acʼ aḍepaseren hoṛkoe nindạuko uni do ạkil reakʼ okulạn menakʼtaea,
menkhan okoeyakʼ buj menakʼ uni do acʼakʼ alaṅe sambṛaoeda.
13Okoe eṭakʼko reaṅe khaekhoyetʼkan uni do oko kathakoe lạiyetʼkana
menkhan pạtiạr hoṛ do kathae dapala.
14Lek lekate ạyur reakʼ buj begorte jạtrenko doko ńurokʼa,
menkhan aema solhakoko hoylen khan jạtrenko do bańcaoko ńama.
15Okoe eṭakʼ hoṛren jạmindare hoyokʼ uni do khạṭige kosṭoe ńama,
menkhan okoe jạmindar hoyokʼe baṅetʼkan uni do khạtirjomae tahena.
16Mońje beoharetʼkan maejiu do manote hameṭ joṅa,
ar santaokan hoṛ do dhone hạrjoṅa.
17Dayakʼkan hoṛ do apnare bhạlạiyokʼ kana,
menkhan kurmutạha hoṛ do apnarakʼe bạṛicʼeda.
18Bedhoromkoakʼ rojgarakʼ do ạuṛiyakʼgetakoa,
menkhan Isore botoraekan hoṛ okoe do itạye er
uni do sạrige ona reakʼ phosole ira.
19Dhoromre ṭarhaoicʼ do jiwetʼe tahena,
menkhan okoe do bạṛicʼakʼe khudạuetʼkan uni do gujukʼe ạguiyeda.
20Okoekoakʼ ontor peṛtage Probhu Isor do onkoe kurudako kana,
menkhan khạṭi jion khemaoko cetanre doe kusikʼkana.
21Khạṭigepe baḍaea bedhorom hoṛko do sạjạiko ńamgea,
menkhan dhorom hoṛ doko bańcaokʼa.
22Sukri thotnare sona mạkṛi lekanae,
buj suj bạnukʼtae uni mońj utạricʼ maejiu do.
23Dhoromko reakʼ monsubạ do bhạlạiye ạguiya,
menkhan bedhoromicʼ do as bodolte
eken Isorakʼ edrege pheḍ hecʼaea.
24Okoe lahe caheye danetʼkan uni do arhõ bạ̃ṛti hoyokʼtaea;
arhõ menakʼkoa okoe do hok reakʼ khon ḍherko dohoyetʼre hõ
reṅgecʼreko paṛaokʼ kana.
25Okoe lahe caheko emokʼ onko doko kisạ̃ṛokʼa;
ar okoe eṭakʼkoe tirpit ocoko uni do acʼ hõe tirpit ocokʼa.
26Okoe hoṛ phosole dohobaekakʼ uni doko sarapaea,
menkhan okoe onae ạkhriń uni do bhoranicʼe hoyokʼa.
27Okoe bhageakʼe ńam bakʼṛakan uni do dayae ńama,
menkhan bạṛicʼakʼe ńam baṛaeyicʼ do acʼge ona paṛaoaea.
28Okoe acʼakʼ dhonreye bhorsakʼkan uni doe gujukʼa,
menkhan dhorom hoṛ do hạriạṛ ghãs leka purṭhại hoyokʼa.
29Okoe acʼakʼ gharońjre bạṛicʼakʼe ạguiyetʼ
unire do hoe chaḍa ar cetʼge baṅ tahena;
ar bebujko do ạkilan hoṛren golamko hoyokʼa.
30Dhorom hoṛ do eṭakʼkoakʼ jion dare leka;
ar okoe eṭakʼkoakʼ mone jitạu akatʼ uni doe ạkilanicʼ kana.
31 #
1 Pat 4.18
Noa dhạrtirege Isor botoraekan hoṛ do kuṛạiko ńam khan,
enḍekhan bedhorom ar kạiyanko do khạṭige akoakʼ kuṛạiko ńamgea.
Santali Bible © Bangladesh Bible Society, 2021.