Jesaea 3
3
Jihudạ ar Jerusalem reakʼ bicạr
1Ńitokʼ ńelme, phạdkoren Probhu Isor do Jerusalem ar Jihudạ khon ṭheṅga ar ṭhesae ocokʼeda. Uni do onkoakʼ sanam jomakʼ ar dakʼkoe ocoga. 2Ona chaḍa uni do birbao hoṛ ar lạṛhại sipạhiko, disạm cakʼlaoko ar nạbiko, gonokko ar murubbiko, 3mõṛẽgel cetanren subedarko ar manotan hoṛko, jạdu udukʼko ar biń sasapʼkoe sạṅgińkoa. 4Onko cetanre do kom umerren koṛakoge matha lekae benaokoa; ar thoṛa budan koṛako do onkoren cakʼlaokoko hoyokʼa. 5Manwa do manwa, aḍepaseren hoṛko do aḍepaseren hoṛko santaokoa; kạṭicʼko do haṛamko upạrte ar nicạṛ hoṛ do manotan hoṛ upạrteko teṅgona. 6Hoṛko do apnarakʼ bõsren mitʼ hoṛ sapʼkateko mena, “Amakʼ do oyonakʼ menakʼtama, am do aleren ạyuricʼ hoyokʼme, ar niạ jarkhar akan disạm reakʼ bhar do amge hataome.” 7Menkhan enhilokʼ uni hoṛ do roṛ ruạṛateye metakoa, “Disạm bhạlại reakʼ ińakʼ do cetʼge bạnukʼtińạ. Ińakʼ oṛakʼre jãhãn jomakʼ se kicricʼko hõ bạnukʼtińạ; disạmren ạyuricʼ do alope benaoińạ.”
8Jerusalem doe tohotʼ akana ar Jihudạ doe bhindạṛ akana, ente unkinakʼ katha ar kạmi do Probhu Isor birudrege hoyokʼkana; unkin do uni samaṅrege uniyakʼ ṭhonok kin nihạ̃tetʼ akada. 9Unkinakʼ mẽtʼãhãge unkin upạrte gohae emetʼkana; unkin do Sodom reakʼ leka ạkinakʼ ghạṭkin sodoreda, ar bạkin danaṅkakʼ kana. Hae, onko hoṛko do! Onko do apnar cetanrege ghoṭnako paṛao ocoakada.
10Dhorom hoṛko metakope, bhạlại hoyokʼtakoa, ente onko do akoakʼ kạmi reakʼ kuṛạiko ńama. 11Hae hae, bedhorom hoṛko do! Onko cetanre do muhin hijukʼa. Ar okako kạmikan ona reakʼ kuṛại doko ńamgea. 12Okoe ińren hoṛko santaoetʼko onko do gidrạko leka, ar okoe onkoko ḍanṭaoetʼko onko do maejiuko leka. E ińren hoṛko, aperen hor udukʼ hoṛkoge bạṛicʼ secʼko idiyetʼpea; onko do ṭhik hor khon bhul horteko idiyetʼpea.
13Probhu Isor do mambla lạgitʼe beretʼ akana; uni do eṭakʼ eṭakʼ jạtrenko bicạrko lạgitʼe teṅgo akana. 14Probhu Isor do acʼren hoṛko modre haṛam hoṛko ar mukhiyạko upạrte bicạrkateye meneda, “Ape do ińakʼ darkha bagwanpe nosṭo akada; ar reṅgecʼ hoṛkoakʼ jinisko luṭkate apeakʼ oṛakʼtepe idiakada. 15Cetʼ iạte ińren hoṛ dope lebetʼ kucạ akatʼkoa ar reṅgecʼ hoṛ dope lebetʼ gańjao akatʼkoa?” Niạ katha do phạdkoren Probhu Isorgeye meneda.
16Probhu Isor do arhõe meneda, “Sionren maejiu do bạḍạiteko perecʼgea. Onko do hoṭokʼ tiạrkateko beraberi baṛae kana arko bijli baṛayeda; ar chamak chamak taṛamate jhamak jhunur pạigạnko saḍe ocoyeda. 17Ona iạte Probhu Isor do Sionren maejiuko bohokʼreye ńẽtʼkoa ar onate onko doko ceḍekʼa .”
18Enhilokʼ Probhu Isor do onkoakʼ napae napae goena gạṭikoe recʼkoa. Uni do onkoakʼ pạigạnko, cạndi reakʼ rupạ jhạliko, chondro harko, 19jhurjhuriko, curiko, ṭuṭuriko, 20mạ̃ṛko, bạjuko, kạcni piṭiko, jiṭhuyạkʼko, mạndạliko, 21mundạmko ar mũ reakʼ mạ̃kṛiko, 22porob reakʼ kicricʼko, oyon aṅgropko, sal kicricʼko ar jhola thạilạkʼko, 23ạrsiko, mĩhĩ musnạ kicricʼko ar jhińjri ṭuṭurikoge.
24Mońj so bodolte bạṛicʼ so, ḍanḍa totolakʼ bodolte baber, mońj rokʼ nạkicʼ upʼ bodolte ceḍe, damanakʼ kicricʼ bodolte gõṛẽ kicricʼ, ar mońj rup bodolte lo reakʼ dag tahena. 25Aperen hoṛko do tarwaṛete ar lạṛhại birko do lạṛhạireko gujukʼa. 26Sion reakʼ phaṭok duạr doko homor halaṅa; ar Sion do ujạṛ akante otreye duṛupʼkokʼa.
Santali Bible © Bangladesh Bible Society, 2021.