Jesaea 4
4
1Enhilokʼ eae goṭen maejiu do mitʼṭen herel hoṛ sapʼkateko metaea, “Aleakʼ jom-ńũ ar horokʼ bande reakʼ do aletegele bebosta joṅa; eken amren bạhu mentele tahen reakʼ ạidạri baṛe emaleme. Aleakʼ henosta baṛe sạṅgińtaleme.”
Probhu Isorakʼ kahle
2Enhilokʼ Probhu Isorakʼ kahle do husnạkʼ ar ṭhonokanakʼ hoyokʼ ar disạm reakʼ jo do Israelren sarecʼ hoṛkoakʼ mạhima ar saj lạgitʼge hoyokʼa. 3Enhilokʼ Sionre okoe sarecʼko tahen, metakʼme Jerusalemre tinạkʼ jiwetʼko tahen onko do sonot menteko hoho ocokʼa. Jerusalemre jiwetʼ tahen lạgitʼ onko hoṛkoakʼ ńutum do tạlikare ol caṛhaokʼa. 4Probhu Isor do acʼren Jiu hotete seṅgelte dhorom reakʼe bicạrkote Sionren maejiukoakʼ mạilạkoe ạrupʼ saphaetakoa ar Jerusalem khon mãyãm reakʼ dage sạṅgiń giḍikakʼa. 5#Exo 13.21; 24.16 Enhilokʼ Probhu Isor do Sion buru reakʼ sanam jaega cetanre ar okoe onḍeko jarwakʼ onko cetanre dhũạ reakʼ rimil ar ńindạ do jolokʼkan seṅgel reakʼ marsale sirjạua; ona do sanam Israelkoakʼ mạhima cetanre mitʼṭecʼ chamḍa lekage hoyokʼa. 6Noa do setoṅ khon umul ńam reakʼ mitʼṭecʼ chạuni ar hoe ar dakʼ khon rukhiyạ ńam lạgitʼ mitʼṭecʼ asray ṭhạ̃ige hoyokʼa.
Santali Bible © Bangladesh Bible Society, 2021.