Jesaea 10
10
1-2Hae onko hoṛ do, okoe do behok reakʼ ạn oḍok kate ar eṛe dolil benaokate reṅgecʼ hoṛko akoakʼ ạidạri khonko ocokʼetʼko ar ińren santao ocokʼkan hoṛko hok reakʼ bicạr khonko tạkicʼetʼko, ar rạnḍi maejiu ar ṭũạrkoakʼ jinisko luṭetʼtako. 3Sạjạiyokʼ dinre tinre sạṅgiń khon jarkharakʼ hijukʼa unre ape do cetʼpe cekaea? Goṛo ńam lạgitʼ okoe ṭhenpe ńir calakʼa? Apeakʼ dhon durib do okoe ṭhenpe doho oṭokakʼa? 4Ape do bondiko talarepe tahena se gocʼkoren gatepe hoyokʼa; unre ape do cetʼge bape ceka daṛeakʼa. Ar niạko hoylenre hõ uniyakʼ edre do baṅ thirokʼtaea; ńit hõ uniyakʼ ti do tulge menakʼtaea.
Ạsurrenko cetanre Isorakʼ bicạr
5 #
Jes 14.24-27; Nạh 1.1—3.19; Sep 2.13-15 Hae, Ạsur do, ińakʼ khĩs reakʼ ṭheṅga! Uniyakʼ tirege menakʼa ińakʼ edre reakʼ mutạk do. 6Uni do Isor baṅ botorae kan mitʼ jạtrenko upạrteń kolekana ar okoe ińko khĩs ocoakadiń onko upạrteń kolekana jemon uni do luṭ are recʼko ar hor reakʼ losotʼ lekae lebetʼ gańjao daṛeako. 7Menkhan Ạsurrenkoakʼ monsubạ onka do baṅa, uniyakʼ goṭawakʼ do eṭakʼ leka; uniyakʼ monsubạ do marao giḍikakʼ ar ḍher jạtrenko ses utạrko. 8Uni doe meneda, “Ińren senaputiko do cetʼ jotoge raj leka doko baṅkana? 9Kalnowakʼ dosa do cetʼ Karkemis leka do baṅkana? Ar Hamat do cetʼ Arpad leka baṅkana? Samariạ do cetʼ Damesek leka do baṅkana? 10Onko boṅga murhutʼkote perecʼ rajosṭiko do ińakʼ tirege paṛao akana; onkoren murhutʼko do Jerusalem ar Samariạren murhutʼ khon ḍherko bhagegea. 11Samariạ ar onaren boṅga murhutʼko cetanre okań ceka akatʼ Jerusalem ar uniren murhutʼko cetanre hõ onkageń kạmiya.”
12Probhu Isor do Sion buru ar Jerusalem upạrte acʼakʼ sanam kạmi sạtkateye mena, “Ạsurren rajakʼ bạḍại ontor ar uniyakʼ gorbote perecʼ beṅgetʼ doń sạjạiyea, 13ente uni doe mena, ‘ińakʼ ti reakʼ daṛe ar ạkilte noań kạmi akada, ente bud menakʼtińạ. Jạtrenkoakʼ simạ doń sạṅgiń akada, onkoakʼ dhon durib iń luṭ akatʼtakoa; ar daṛean bir leka onkoren rajiń dobnao akatʼkoa. 14Jãhãege cetʼleka tukại tiyog onkage iń hõ jạtrenkoakʼ dhon durib iń hatao akatʼtakoa. Ar hoṛko cetʼ leka beleko halaṅ jarwae onkage iń do dhạrti reakʼ sanam disạmiń hạr samṭao akada. Phạ̃kṛạ̃kʼ do okoehõ bako phada phuduyeda ar okoehõ bako cahapʼeda ar bako cero beroyeda.’ ”
15Ṭeṅgocʼ do cetʼ mamakʼicʼ cetanreye rakapʼ kana se korat do cetʼ kaṭ mistiri samaṅreye bạḍại daṛeakʼa? Ona do baṅ hoedaṛeakʼa. Ṭheṅga do ekʼpelicʼ bae ghiriạ daṛeaea ar ladhna hõ ladhna sasapʼicʼ do bae epel daṛeaea. 16Ona iạte phạdkoren Probhu Isor do Ạsurren daṛean lạṛhại birko cetanre mitʼṭecʼ rohoṛokʼ ruại kola; ar uniyakʼ ṭhonok latarre do lepʼ leka seṅgel jol ocokʼa. 17Israel reakʼ marsal do hoyokʼa seṅgel leka; onkoren sonotko doko hoyokʼa mitʼṭecʼ seṅgel lepʼ leka. Ar ona seṅgel do mitʼ dinre ona reakʼ joto jạnum ar rạṅgạinikoe atar giḍiya. 18Mitʼṭen rugi hoṛ cetʼlekae rohoṛ idikʼkan, onkage ona seṅgel do Ạsur reakʼ sanam bir ar batao akatʼ khetko purạteye marao giḍiya. 19Uniyakʼ bir reakʼ sarecʼ dareko do lekharege nunạkʼ komaokʼa je, mitʼṭen huḍiń gidrạ hõ lekhakate onae ol daṛeakʼa.
Israelren jiwetʼ tahen hoṛko
20Enhilokʼ Israelren jiwetʼ tahen hoṛko, metakʼme Jakobakʼ bõsren sarecʼ hoṛ do akoren hạhạnko cetanre ar bako bhorsakʼa, menkhan Probhu Isor cetanre, Israelren uni sonoticʼ cetanre sạrigeko bhorsakʼa. 21Ar sarecʼ tahen hoṛ doko ruạṛ hijukʼa; Jakobren sarecʼ hoṛko do daṛean Isor ṭhenko ruạṛ hijukʼa. 22#Rom 9.27 E Israel, amren hoṛkoakʼ lekha do jalapuri reakʼ gitil unạkʼlenre hõ enhõ thoṛa hoṛgeko ruạṛ hijukʼa. Israelko lạgitʼ maraokʼ do ṭhik doho akana ar hok reakʼ sạjại do onkore paṛaokʼgea. 23Goṭa disạm cetanre oka ḍahao maraokʼ ṭhik dohoakan ona lekage phạdkoren Probhu Isor doe kạmiya.
24Ona iạte phạdkoren Probhu Isore meneda, “E ińren hoṛko, okoe do Sionrepe tahenkan, ape do Ạsurren hoṛko Misor disạmrenko leka ṭheṅgateko dalpe ar ape upạrte mutạkko tulrehõ alope botorakoa. 25Ape cetanre ińakʼ edre do usạratege cabakʼa, ar ona do Ạsurrenkoe maraokoa.”
26Phạdkoren Probhu Isor do Oreb burure Midiạnrenkoe hạnko jokhecʼ cetʼlekae cekaletʼ onkage uni do cạbukkote Ạsurrene dalkoa. Ar Misorre cetʼe cekaletʼ onkage uni do dakʼ cetanre acʼakʼ ṭheṅgae tultaea. 27Enhilokʼ onkoakʼ bojha ar arãṛ do apeakʼ taren khon ocogokʼa; arpe moṭa akante ona arãṛ do rạpudokʼtakoa.
28Onko do Aieteko bolo akana, Migronko parom akada; onko do Mikmasre akoakʼ jiniskoko doho oṭoakada. 29Onko do buru sinit (giripoth) paromkateko hecʼakana, “Abo do Geba ṭhen ḍerakate bon tahẽ aṅgakʼa.” Onate Rama do thar tharaokʼ kana, Sạulakʼ Geba khon hoṛko doko ńir joṅkana. 30E Gonemeren hoṛko, ape do kikiạupe. E Laesaren hoṛko, ape do luturakʼpe. E Anathot! 31Madmenaren hoṛ doko ńir joṅkana; Gebinren hoṛ doko okokʼ kana. 32Teheń Ạsurrenko do Nobre senkateko thirokʼa; onko do Sion kuṛiyakʼ buru secʼ, metakʼme Jerusalem buru secʼ muṭko epel akatʼtakoa.
33Ńelme, phạdkoren Probhu Isor do maraṅ daṛete ḍạrkoe rạputʼ giḍiya. Ar usul usul dareko do makʼ giḍikʼa; ar onako do otre bhindạṛokʼa. 34Uni do ṭeṅgocʼte bir reakʼ gajaṛkoe maga, ar daṛean mitʼṭen hotete Lebanon reakʼ dareko hõe marao utạra.
Santali Bible © Bangladesh Bible Society, 2021.