Jesaea 9
9
Abo lạgitʼ mitʼṭen koṛa gidrại janamokʼa
1 #
Mat 4.15
Menkhan lahate okoe do gạr ar muhinreko tahẽkan onko do ńutre ar bako tahena. Lahateakʼ dinkore Isor do Sebulon ar Napthali ṭoṭhae copotʼ ocoleda, menkhan tayom daram dinkore jalapuri aṛeteakʼ hor khon ehopʼkate Jordan gaḍa purub aṛe reakʼ ṭoṭha boṅgan hoṛ jạtrenkoakʼ Gạlil hạbicʼe manot ocoya.
2 #
Mat 4.16; Luk 1.79 Okoeko hoṛ do ńutreko tahenkan onko do maraṅ marsalko ńela;
ar okoe kaṛaṅ ńut reakʼ umulreko duṛupʼ akan
onko do marsal bamberakoa.
3Am do onko jạtrenkom ḍherkoa
ar onkoakʼ rạskạm maraṅtakoa;
phosol ir jokhecʼ cetʼ leka hoṛko rạskạkʼ,
luṭakʼ jinis hạṭiń oktere cetʼ leka rạskạ hecʼako,
onkage onko do am samaṅreko rạskạkʼa,
4Midiạnakʼ bhagaokʼ dinre okam cekaletʼ,
onkage am dom rạputʼ kaca kucạya
ona hamal arãṛ do, one okako gokʼ akatʼ,
ar ona ṭheṅgage, one oka doe daletʼko,
ar onko jạtrenkoge, okoe do onkoko santaoetʼko.
5Lạṛhại lạgitʼko hạjukʼkan mitʼke mitʼ lạṛhại birkoakʼ panahe,
ar mãyãmte lohotʼ akan mitʼke mitʼ kicricʼ do seṅgelre atar ocokʼa.
6Noa jotowakʼ do hoyokʼa,
ente abo lạgitʼ mitʼṭen koṛa gidrại janamokʼa,
mitʼṭen hopon do abo lạgitʼe emocokʼa.
Mạliki do uniyakʼ tarenrege tahena,
ar uni ńutum do hoyokʼa hahaṛa sosolhayicʼ, daṛeanicʼ Isor,
jaejugren apat, ar sulukren raj.
7 #
Luk 1.32,33 Uniyakʼ mạliki reakʼ baḍhaokʼ ar suluk do baṅ cabakʼa.
Uni do Dạudakʼ siṅghạson ar uniyakʼ rajosṭi cetanreye rajokʼa;
uni do un okte khon jaejug hạbicʼ
hok reakʼ bicạr ar dhoromte onae bandhaoa
are ṭarhao utạra.
Phạdkoren Probhu Isorakʼ ãṭge noae hoeocoya.
Israel cetanre Probhu Isorakʼ edre
8Jakob upạrte Probhu Isor do mitʼṭecʼ sombate kol akada; ona do Israel cetanrege hoyokʼa. 9Ephrayim ar Samariạren sanam hoṛ do onako baḍae daṛeakʼa. Onko do bạḍại ar gorbo iạteko mena, 10“Iṭạko do lạnduṛ akana, menkhan ale do arhõ mońte getʼakʼ dhirikotele benao rakaba; joto loa dare do makʼ giḍi akana, menkhan ale do ona bodolte debdạru darekole rohoea.” 11Menkhan Probhu Isor do Resin upạrte uniren bạirikoe daṛe ocoakatʼkoa ar uni upạrte onkoe edre ocoakatʼkoa. 12Aramrenko do purub secʼ khon ar Philisṭiko do pạchim secʼ khon moca cahapʼkateko utʼ gotʼkaea. Niạko hoylenre hõ uniyakʼ edre do baṅ thirokʼtaea. Ńit hõ uniyakʼ ti do tul akaege menakʼtaea.
13Menkhan okoe onkoe hạn akatʼko uni ṭhen hoṛko do bako ruạṛ hecʼlena, ar phạdren Probhu Isorakʼ sana leka hõ bako calaolena. 14Onatege Probhu Isor do Israelakʼ khijur ḍạr ar chuchi ṭheṅga, metakʼme bohokʼ ar canḍbol do mitʼ dinregeye samakʼ topaga. 15Ona bohokʼ do kana murubbiko ar manotan hoṛkoge, ar canḍbol do eṛe sikhạuna emokʼ nạbiko. 16Okoe onko jạtrenko horko udukʼako onko do bhul horteko idikoa; ar onko pańjakanko do bako bujhạu daṛeakʼa okateko calakʼ kana mente. 17Onatege Probhu Isor do juạnko hotete bae rạskạkʼ kana, ṭũạr ar rạnḍi maejiuko hõ bae dayawako kana; ente sanamkoge Isor do bako botorae kana arko kharap caba akana, jotoge bạṛicʼ bạṛicʼ kathako roṛeda. Ar niạko hoylenre hõ uniyakʼ edre do baṅ thirokʼtaea; ar ńitokʼ hõ uniyakʼ ti do tulge menakʼtaea.
18Sạrige dusṭạmi do seṅgel leka jolokʼ kana, ona do jạnum ar rạṅgạinikoe atar giḍikakʼa. Ona do bir gajaṛkoe jeretʼeda ar onate dhũạ do cetante tutʼ tutʼ gurlạu rakabokʼa. 19Phạdkoren Probhu Isorakʼ edrete disạm do jarkharokʼa, ar hoṛko do seṅgel lạgitʼ sahan lekako hoyokʼa. Celege acʼren boeha hõ bae dayawaea. 20Onko do leṅgati secʼko losagre hõ reṅgecʼkoa ar jojomti secʼko tạhuṛre hõ bako tirpitokʼa. Sesre onko do apnarren hoṛkoakʼ jelgeko joma. 21Manase do Ephrayimakʼ ar Ephrayim do Manaseakʼ jelko joma, onko do mitʼ sãote Jihudạ upạrteko teṅgona. Ar noako hoylenre hõ uniyakʼ edre do baṅ thirokʼtaea; ar ńit hõ uniyakʼ ti do tulge menakʼa.
Santali Bible © Bangladesh Bible Society, 2021.