Tashches Juansi' 3
3
Tsun Jenꞌtyiꞌ ạvaꞌ tsun
1Äjyejamꞌ, junꞌ quiꞌ muꞌ Jenꞌ anic där mạꞌjisinꞌ u, där jämꞌ muꞌ ạvatusinꞌ tsun, muꞌ jísinꞌ: "Miꞌin nash ạvaꞌ yụ́tyiꞌ", jísinꞌ, mọꞌyaꞌ chị́jaꞌ mạꞌjitidyes muꞌ. Mọꞌdyes muꞌin úchety muntyiꞌ in jam chäyisinꞌ in tsun Jenꞌtyiꞌ ạvaꞌ muꞌ, ĉaĉaij na jam Jenꞌ chị́yete in. 2Chätidyeꞌ mạꞌjeyacdyety yụ, q̂uinꞌ aty Jenꞌtyiꞌ ạvaꞌ tsun, jambiꞌ qui namꞌ chị́jaꞌ junꞌ chuc raꞌ shupquejaꞌ yocsiꞌĉan tupudyeꞌ, chị́jaꞌ qui namꞌ tsun, aty atsijbanyaꞌ muꞌ Cristo, yódyeijdyemꞌ muꞌ u, joꞌmejaꞌdye raꞌ tsun chimeꞌ, ĉaĉaij na raꞌ tsun anic jorojĉan cạveja jụꞌñiij chuc muꞌ. 3Tyi chuc anicyedyeꞌtum biste Cristo, muꞌ jam jụꞌñiij bäꞌyi, yojdyemꞌ Cristo u jam jụꞌñiij, joꞌmeijdye ramꞌ chimeꞌ bäꞌyi muꞌ.
4Tyi chuc juchaij, muꞌ vaꞌquecbite Jenꞌsiꞌ yụꞌtacdyeꞌ muꞌ, ĉaĉaij na juchayejaꞌ jụijyaꞌ tsun mọꞌyaꞌ vaꞌquecbija Jenꞌsiꞌ yụꞌtacdyeꞌ muꞌ. 5Chịj tyuꞌ u miꞌin atsijyaꞌ jiquej muꞌ Jesucristo muꞌ atsij vaꞌquictyityisinꞌ juchaj tsun, meꞌdyes muꞌ atsij úcheꞌ jijtuij jiquej, muꞌsiꞌ na itŝiꞌ méquis juchaj muꞌ mijam méquiꞌ meꞌchuiꞌ. 6Tyi chuc yejĉoij Jesucristotum jụijyaꞌ, muꞌ aty jam tupuj juchaij. Tyi chuc meꞌchuiꞌtyiꞌ juchaj, muꞌ jam damꞌ dyijtute muꞌ Jesucristo mijam chimeꞌ chị́yete. 7Chätidyeꞌ ạvaꞌ yụ, areꞌĉa seꞌ jaꞌyinac miꞌin väñädyeꞌyaꞌ muꞌin meꞌtyity in, tyi chuc rụij bäꞌyity, muꞌ nash rụijtyity, yojdyemꞌ Cristo rụijtyity u. 8Tyi chuc meꞌchuiꞌtyiꞌ juchaj, muꞌ nash Sọyoty ĉaĉaij na mọꞌ Sọyoꞌ tạꞌcas juchajtumsiꞌ. Muꞌ na Jenꞌtyiꞌ Ạvaꞌ muꞌ atsij paj qui meijjeshbiꞌ Sọyos carijtacdyeꞌ mọꞌ.
9Tyi chuc Jenꞌtyiꞌ ạvaꞌ muꞌ, muꞌ jam yejĉoij juchaij, ĉaĉaij na ĉụiꞌsiꞌ tsạꞌsiꞌ Jenꞌsiꞌ muꞌ mọꞌ taĉan ĉojtyiꞌĉan muꞌ, mọꞌdyes qui muꞌ aty jam yejĉoij juchaij. 10Mọꞌyaꞌ tupuj chị́jaꞌ tyijtyi buty Jenꞌtyiꞌ ạvaꞌ muꞌin, judyeyaꞌ tyijtyi buty Sọyoty ạvaꞌ mọꞌ. Tyi chuc jam rụij bäꞌyity in, judyeyaꞌ jam mạꞌjeyacsity vojity in, muꞌin jam junꞌ Jenꞌtyiꞌ ạvaꞌ in.
Vaj meij raꞌ mạꞌjitiĉaꞌ
11Ọij nash p̂eyacdyeꞌ seꞌvetiñes tashcheꞌ jiquej yiꞌ: jemoñeꞌ vaj meij mạꞌjitiĉaꞌ tsun. 12Jam raꞌ jeñej Caínsiꞌ dyijyedyeꞌ cạpja tsun, muꞌ nash Sọyoty jiquej meꞌdyes qui ijaqui ĉụiꞌtyiꞌ vojity muꞌ. ¿Junꞌ buty meꞌ ijaqui vojity muꞌ jiquej? Ĉaĉaij na muꞌ Caín aꞌc̣his dyijyedyeꞌ meꞌchuiꞌ, vojity na muꞌ jam meꞌ, anic muꞌ rụijsis cạiꞌ dyijyedyeꞌ muꞌ.
13Vojity yụ, jam raꞌ äjjetiñeꞌ miꞌin fáquinacyaꞌ in úchety muntyiꞌ in. 14Tsun aty jam sänꞌdyeꞌĉan bäꞌjaꞌ tsun, q̂uinꞌ aty tsạꞌ buꞌjaꞌ tsun, Jenꞌyadyety tsun. Mọꞌyaꞌ tupuj chị́jaꞌ tsun aty Jenꞌyadyety tsun, ĉaĉaij na mạꞌjeyacsejaꞌ vojity in. Tyi chuc jam mạꞌjeyacsity, sänꞌdyeꞌĉan bäꞌyi tacaꞌ. 15Tyi chuc fạ́codyeꞌtum cạvacsi vojity muꞌ, muꞌ jeñej buꞌyi ijacsity shupqui. Chịj miꞌin: ¿Jenꞌyadyety buty raꞌ muꞌ ijacsity muntyiꞌ? Jam junꞌ. 16Jesucristo jiꞌsäsdyi ujac tsundyes, mọꞌ anicsis mạꞌjitidyes jịꞌcavaqui, mọꞌdyes tsun jemoñeꞌ dyijtutiĉaꞌ junꞌ chuc tsun jiꞌsäsdyiĉaꞌ ujac vojitydyes tsun. 17Muꞌ jedyeꞌtumtyiꞌ cạvete jụijyaꞌ yirity jayejjotaquity vojity muꞌ, jam qui namꞌ nọ́tyete jụijyaꞌ, mọꞌ jam rụij shupquiꞌ, jorojĉan itŝiꞌ mạꞌjitidyes muꞌ, mijam mạꞌjete Jenꞌ chimeꞌ. 18Chätidyeꞌ ạvaꞌ yụ, jemoñeꞌ anic rụij mạꞌjeyacsejaꞌ tsun, jam raꞌ p̂eyacdyeꞌyamꞌ yéjaꞌ, jemoñeꞌ anic nọ́tacdyeꞌtum mạꞌjeyacsejaꞌ tsun.
Sóñiꞌyedyeꞌtum c̣hẹiꞌyaꞌjeja Jenꞌ
19Meꞌ mạꞌjeyacsejaꞌ jụijyaꞌ tsun, mọꞌyaꞌ tupuj chị́jaꞌ tsun anictyity cäc̣häꞌchujaꞌtyiꞌ mọꞌ rụijsis p̂eyacdyeꞌ, judyeyaꞌ chimeꞌ sóñiꞌyedyeꞌtum c̣hẹiꞌyaꞌjeja Jenꞌ. 20Meꞌ tsanꞌ areꞌyi ĉụiꞌtyiꞌ ĉojtyiꞌ tsun vatyquej jam chiquepjayaꞌ yụꞌtacdyeꞌ Jenꞌsiꞌ muꞌ, muꞌ qui namꞌ Jenꞌ mujuꞌchaꞌ chäyisinꞌ, uyaꞌyaꞌ chị́yaĉaꞌ ĉojtyiꞌ tsun, Jenꞌ qui namꞌ räj chị́yeꞌ, meꞌ tsanꞌ meꞌ muꞌ yejĉoij ñịbeꞌ ĉúsinꞌ. 21Chätidyeꞌ mạꞌjeyacdyety yụ, jam areꞌyiyaꞌ ĉojtyiꞌ tsun, a vuty tupuj sóñiꞌyedyeꞌtum c̣hẹiꞌyaꞌjeja Jenꞌ u, 22judyeyaꞌ qui raꞌ jụjjibusinꞌ cọdacdyeꞌ tsun jedyeꞌ chuc cọdyeja, ĉaĉaij na tsun chiquepjaty p̂eyacdyeꞌ muꞌ, judyeyaꞌ jämꞌtyejaꞌ tsun mọꞌ maꞌjotyeꞌ muꞌ. 23Ọij p̂eyacdyeꞌ Jenꞌsiꞌ muꞌ yiꞌ muꞌ jemoñeꞌ ca tsun anicjepja Ạvaꞌ muꞌ, Jesucristo, judyeyaꞌ vaj meij mạꞌjitiĉaꞌ tsun chimeꞌ, yoj jisinꞌdyemꞌ tsun jiquej u. 24Tyi chuc chiqueptety p̂eyacdyeꞌ muꞌ, muꞌ yejĉoij Jenꞌtum, chimeꞌdye muꞌ Jenꞌ yejĉoij muꞌtum. Muꞌ Jenꞌ soꞌmisinꞌ Ạꞌedyeꞌ muꞌ, mọꞌyaꞌ tupuj chị́jaꞌ muꞌ Jenꞌ yejĉoij tsuntum.
S'ha seleccionat:
Tashches Juansi' 3: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'