Tashches Juansi' 4
4
Jenꞌsiꞌ jiꞌchäyitidyeꞌ muꞌ judyeyaꞌ fạ́quetetysiꞌ Cristo
1Chätidyeꞌ mạꞌjeyacdyety yụ, jam raꞌ cäc̣häꞌchucsebi miꞌin muꞌinsiꞌ jiꞌchäyitidyeꞌ jụꞌñity chuc yity in: "Yụ soꞌmintyiꞌ p̂eyacdyeꞌ Jenꞌ." Tashcheꞌ chum raꞌ jämꞌ seꞌvebitinte p̂eyacdyeꞌ, vatyquej Jenꞌsiꞌ Ạꞌedyeꞌ jasoꞌmiti jụijyaꞌ, vátyequej raꞌ yoctyis. Ĉaĉaij na q̂uinꞌ daiꞌ cäjsis jiꞌchäyitidyeꞌ cạiꞌtyiꞌ in, jeñej buꞌyi jasoꞌmitity p̂eyacdyeꞌ Jenꞌ in, meꞌ buꞌyi yuꞌti in. 2Mọꞌyaꞌ raꞌ tupuj chị́yacsi miꞌin muꞌin rụij p̂eyaquity in, tyi chuc yity in: "Muꞌ Jesucristo rụiꞌcuꞌĉan jiꞌcaviti úcheꞌ jaccheꞌ jiquej", yi in, muꞌin meꞌ jiꞌjäctety in, muꞌin meꞌchupte in Jenꞌsiꞌ Ạꞌedyeꞌ muꞌ. 3Tyi chuc jam meꞌ yity in, yi mọmoꞌ in: "Jam rụiꞌcuꞌĉan jiꞌcaviti jiquej muꞌ úcheꞌ", yi in, muꞌin meꞌ jiꞌjäctety in muꞌin jam meꞌchupte in Jenꞌsiꞌ Ạꞌedyeꞌ muꞌ, mọmꞌ dyijyedyeꞌ cạpte in muꞌ fạ́quetetysiꞌ Cristo, muꞌ seꞌvetintety atsij raꞌ muꞌ. Yụ na jéyac q̂uinꞌ, aty q̂uinꞌ shupquiꞌ dyijyedyeꞌ muꞌsiꞌ, aty mọꞌyamꞌ ọ́cheꞌ jacches.
4Chätidyeꞌ ạvaꞌ yụ, miꞌin nash Jenꞌtyiꞌ, aty jiꞌpenacsebi miꞌin dyijyedyeꞌ muꞌin cäj jịꞌchiyacsitysiꞌ in, ĉaĉaij na Jenꞌsiꞌ Ạꞌedyeꞌ muꞌ, mọꞌ meꞌchuptintes miꞌin anic mujuꞌchaꞌ buꞌyiꞌ mọꞌ, ọyaꞌyaꞌ mọꞌ Sọyoꞌ meꞌchucsis tsanꞌ jacchety muntyiꞌ in. 5Muꞌin na jacches mọmoꞌ dyijyedyeꞌ p̂eyeꞌ in, muꞌin jacchety in seꞌvacsebi p̂eyacdyeꞌ muꞌin, ĉaĉaij na jacchety mọmoꞌ muꞌin in. 6Tsun qui namꞌ Jenꞌtyiꞌ tsun, muꞌin chị́yetety Jenꞌ in muꞌin seꞌvibusinꞌ p̂eyacdyeꞌ tsun, muꞌin na jam Jenꞌtyiꞌ in muꞌin jam seꞌvibusinꞌ p̂eyacdyeꞌ tsunsiꞌ in. Chị́jaꞌ tsun tyi chuc seꞌvibusinꞌ p̂eyacdyeꞌ in, muꞌin meꞌchupte in Jenꞌsiꞌ Ạꞌedyeꞌ muꞌ, mọꞌ p̂eyeꞌsiꞌ rụijsis p̂eyacdyeꞌ, judyeyaꞌ chimeꞌ chị́jaꞌ tsun tyi chuc jam seꞌvibusinꞌ p̂eyacdyeꞌ in, muꞌin meꞌchubiꞌ sọyos dyijyedyeꞌ in, mọꞌ p̂eyes cäjsis p̂eyacdyeꞌ.
Jenꞌ mạꞌjeyacsity buꞌyi
7Chätidyeꞌ mạꞌjeyacdyety yụty miꞌin, jemoñeꞌ vaj meij mạꞌjitiĉaꞌ tsun, ĉaĉaij na muꞌ Jenꞌ yụꞌtyety mạꞌjitidyes. Tyi chuc mạꞌjeyacsity, muꞌ nash Jenꞌtyiꞌ ạvaꞌ muꞌ, muꞌ chị́yete Jenꞌ. 8Tyi chuc jam mạꞌjeyacsity, muꞌ jam chị́yete Jenꞌ ĉaĉaij na muꞌ Jenꞌ mạꞌjeyacsity buꞌyi. 9Jenꞌ jiꞌcaviyisinꞌ mạꞌjitidyes tsundyes, junꞌ chuc fer mạꞌjisinꞌ tsun, jutaqui qui yiritytyity Ạvaꞌ muꞌ, úcheꞌ quimꞌ atsij muꞌ jaccheꞌ, paj qui muꞌ tsạꞌchusinꞌ judyeyaꞌ Jenꞌyadyety yuꞌsinꞌ chimeꞌ tsun, meꞌ muꞌ Jenꞌ jiꞌcaviyisinꞌ mạꞌjitidyes muꞌ. 10Mọꞌ anicsis mạꞌjitidyes jam mọꞌ tsunsiꞌ, junꞌ chuc tsun mạꞌjeja Jenꞌ, mọꞌ anicsis mạꞌjitidyes Jenꞌsiꞌ muꞌ, junꞌ chuc muꞌ mạꞌjisinꞌ tsun, mọꞌdyes muꞌ jutaqui Ạvaꞌ muꞌ, paj qui muꞌ ijac tsunsidyes juchaj, muꞌtyiꞌyaꞌ Ạvamꞌ vayac juchaj tsun.
11Chätidyeꞌ mạꞌjeyacdyety yụty miꞌin, cạvejaꞌ junꞌ quiꞌ fer mạꞌjisinꞌ Jenꞌ u, meꞌdye raꞌ tsun chimeꞌ vaj meij mạꞌjitiĉaꞌ. 12Mijam yirity muntyiꞌ cạvete Jenꞌ in. Meꞌ raꞌ chat vaj mạꞌjitiĉaꞌ bäꞌjaꞌ tsun, muꞌ raꞌ Jenꞌ yejĉoij tsuntum judyeyaꞌ raꞌ muꞌ rụijsistum mạꞌjitidyes mạꞌjisinꞌ tsun. 13¿Junꞌ buty tupuj chị́jaꞌ meꞌ q̂uinꞌ tsun Jenꞌtum yejĉojaꞌ judyeyaꞌ muꞌ yejĉoij tsuntum? Ĉaĉaij na muꞌ soꞌmisinꞌ ĉụiꞌsiꞌ Ạꞌedyeꞌ muꞌ, mọꞌ meꞌchupja tsun. 14Jenꞌ jutaqui Ạvaꞌ muꞌ jiquej paj qui jiꞌc̣honacsi jacchety muntyiꞌ in. Tsun nash cạvepte, mọꞌdyes qui tsun jịꞌchiqueyacsi muntyiꞌ in. 15Tyi chuc meꞌ yity in: "Muꞌ Jesús Jenꞌtyiꞌ Ạvaꞌ muꞌ", muꞌ meꞌ yity jụijyaꞌ, Jenꞌ yejĉoij muꞌtum judyeyaꞌ muꞌ yejĉoij Jenꞌtum chimeꞌ.
16Meꞌ tsun chị́yepja mạꞌjitidyes Jenꞌsiꞌ muꞌ junꞌ chuc muꞌ mạꞌjisinꞌ tsun, mọꞌ anicjepja tsun, ĉaĉaij na muꞌ Jenꞌ mạꞌjeyacsity buꞌyi. Tyi chuc yejĉoij mạꞌjeyacsity, muꞌ nash yejĉoij Jenꞌtum judyeyaꞌ muꞌ Jenꞌ yejĉoij muꞌtum chimeꞌ. 17Muꞌ Jenꞌ cätssistum dyijyedyeꞌ mạꞌjisinꞌ tsun mọꞌdyes qui raꞌ sóñiꞌyejaꞌ tsun aty cạvejaꞌyaꞌ mọꞌ tupudyeꞌ Jenꞌsiꞌ muꞌ, aty raꞌ jịꞌcäts yụꞌtacsiyaꞌ muntyiꞌ in, meꞌ raꞌ chat aty jam quijnacdyeꞌtum cạveja tsun. Jeshaꞌ, yojdyemꞌ Cristo u, meꞌ buꞌjaꞌdyemꞌ úcheꞌ jaccheꞌ. 18Tyi chuc mạꞌjeyactyiꞌ Jenꞌyaꞌ, muꞌ jam noiꞌyedyeꞌtum bäꞌyi atsvun, chị́yepja mạꞌjitidyes muꞌ junꞌ chuc muꞌ cätssistum dyijyedyeꞌ mạꞌjisinꞌ, mọꞌ raꞌ meijjityisinꞌ quijnacdyeꞌ tsun. Tyi chuc quijnacdyeꞌtum bäꞌyity, mọꞌ muꞌ dyijtuiꞌ vaꞌtacdyeꞌ raꞌ muꞌ. Tyi chuc noiꞌyedyeꞌtum bäꞌyi muꞌ jambiꞌ rụij mạꞌjitidyestum bäꞌyi.
19Tsun mạꞌjeyacsejaty ĉaĉaij na muꞌ Jenꞌ tashcheꞌ mạꞌjisinꞌ tsun jiquej. 20Tyi chuc yity: "Yụ mạꞌjetety Jenꞌ", meꞌ tsanꞌ yi muꞌ, fạ́codyeꞌtum qui namꞌ cạvacsiyaꞌ vojity jụijyaꞌ muꞌ, muꞌ meꞌ yity väñädyeꞌ shupquiꞌ mọꞌ p̂eyacdyeꞌ muꞌsimꞌ. Jam mạꞌjeja muꞌ cạvejaty vojity jụijyaꞌ tsun, dadamꞌ raꞌ jam mạꞌjeja muꞌ Jenꞌ, muꞌ jam cạvejaty. 21Jesucristo soꞌmisinꞌ ọij p̂eyacdyeꞌ muꞌ, yiꞌ: Tyi chuc mạꞌjete Jenꞌ jemoñeꞌ mạꞌjeyacsi vojity chimeꞌ muꞌ."
S'ha seleccionat:
Tashches Juansi' 4: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'