Tashches Juansi' 2
2
Cristo jämꞌ yuꞌsinꞌtyiꞌ Jenꞌyaꞌ
1Chätidyeꞌ mạꞌjeyacdyety ạvaꞌ yụ, q̂uinꞌ yụ jéyac ọij sánacdyeꞌcheꞌ paj qui jam juchayebanve miꞌin. Meꞌ qui tsanꞌ juchaijyaꞌ miꞌin, muꞌyaꞌ qui namꞌ yirity jämꞌ yuꞌsinꞌtyiꞌ Jenꞌyaꞌ tsun, muꞌ nash Jesucristo rụijtyity. 2Muꞌ jiꞌsänꞌdyity tsundyes, vayacjityisinꞌ juchaj tsun, jam yiritydyes mọmoꞌ säñi muꞌ räjtumdyes tsun, muꞌ vayacjetyetacsi räj muntyis juchaj muꞌin, úcheꞌ bäꞌyitysiꞌ in.
3Jeshaꞌ chiquepja jụijyaꞌ p̂eyacdyeꞌ Jenꞌsiꞌ muꞌ, mọꞌyaꞌ tupuj chị́jaꞌ anic chị́yeja Jenꞌ. 4Tyi chuc yity: "Yụ nash chị́yete Jenꞌ", yi jụijyaꞌ, jam qui namꞌ chiquepte p̂eyacdyeꞌ jụijyaꞌ muꞌ, muꞌ meꞌ yity väñädyeꞌ mọꞌ p̂eyacdyeꞌ muꞌsimꞌ, mijam méquiꞌ rụijsis dyijyedyeꞌ muꞌ. 5Tyi chuc chiqueptety p̂eyacdyeꞌ jụijyaꞌ muꞌ, muꞌ chat rụij mạꞌjitidyestum bäꞌyi, meꞌ jụijyaꞌ tsun, tupuj chị́jaꞌ Jenꞌtum yejĉojaꞌ tsun. 6Tyi chuc yi: "Yụ yejĉoij Jenꞌtum", muꞌ meꞌ yity jemoñeꞌ meꞌ bäꞌyi yojdyemꞌ bäꞌyaque jiquej u muꞌ Jesucristo.
Mụiꞌsis p̂eyacdyeꞌ Jenꞌsiꞌ
7Chätidyeꞌ, mạꞌjeyacdyety yụ, jam mụiꞌsis ọij p̂eyacdyeꞌ jéyacsiꞌ yụ miꞌin q̂uinꞌ sánacdyeꞌcheꞌ, mọꞌdye tashches seꞌvetiñes jiquej, yiꞌ paj qui mạꞌjeyacsity bäꞌyi miꞌin, mọꞌdye yụ jéyac q̂uinꞌ. 8Meꞌ tsanꞌ meꞌ, ọij p̂eyacdyeꞌ jéyacsiꞌ yụ q̂uinꞌ miꞌin, mụiꞌsis buꞌyiꞌ qui namꞌ shupquiꞌ, mọꞌ jịꞌcätses muꞌ Cristoyaꞌ, judyeyaꞌ miꞌin chimeꞌ q̂uinꞌ, ĉaĉaij na mọꞌ tojmadyeꞌ aty ọyaꞌyaꞌquejĉoiꞌ q̂uinꞌ, mọꞌ na rụijsis mạijquedyeꞌ mạijyebanꞌ.
9Yirity muntyiꞌ meꞌ tsanꞌ yi: "Yụ cäc̣häꞌchuiꞌtyiꞌ mạijquedyeꞌ", yi jụijyaꞌ muꞌ, yejĉoij qui namꞌ fạ́codyeꞌtum cạvacsi vojity jụijyaꞌ muꞌ meꞌtyity yejĉoij tacaꞌ tojmadyeꞌĉan bäꞌyi. 10Muꞌ na mạꞌjeyacsity vojity in, muꞌ chat yejĉoij mạijquedyeꞌĉan bäꞌyi, muꞌ raꞌ chat jam jedyeꞌ jajivaꞌchati juchajĉan. 11Muꞌ na fạ́codyeꞌtum cạvacsity vojity muꞌ, muꞌ tojmadyeꞌĉantyiꞌ, judyeyaꞌ tojmadyeꞌĉan chimeꞌ miꞌi, mijam naijti junaꞌ chuc tyeij ĉaĉaij na mọꞌ tojmas tyumꞌjajibuti vej muꞌ.
12Chätidyeꞌ, miꞌin mạꞌjeyacdyety ạvaꞌ yụ, yụ jéyac ọij q̂uinꞌ sánacdyeꞌcheꞌ yiꞌ junꞌ chuc muꞌ Jenꞌ vayacjibunac juchaj miꞌin, ĉaĉaij na muꞌ Jesucristo jiꞌsänꞌdyi tsundyes. 13Miꞌin ishoꞌmuntyiꞌ miꞌin, yụ jéyac q̂uinꞌ ọij ĉaĉaij na miꞌin aty chị́yetinte muꞌ tạꞌcaty. Miꞌin chimeꞌ nanamuntyiꞌ miꞌin, yụ jéyac q̂uinꞌ ọij ĉaĉaij na aty jiꞌpentiñeꞌ Sọyoꞌ.
14Chimeꞌ miꞌin ạvaꞌ yụ jéyac q̂uinꞌ ọij, ĉaĉaij nash miꞌin chị́yetinte muꞌ Jenꞌ Ạvatusinꞌtyiꞌ tsun. Miꞌin ishoꞌmuntyiꞌ miꞌin yụ jéyac q̂uinꞌ ọij ĉaĉaij na miꞌin chị́yetinte muꞌ tạꞌcaty. Miꞌin nanamuntyiꞌ miꞌin, yụ jéyac q̂uinꞌ ọij, ĉaĉaij na miꞌin aty fer buꞌyi, meꞌchuptinte Jenꞌsiꞌ p̂eyacdyeꞌ muꞌ, judyeyaꞌ aty jiꞌpentiñeꞌ mọꞌ Sọyoꞌ.
15Jam raꞌ mạꞌjetiñeꞌ jacches jedyeꞌ, mijam raꞌ chimeꞌ mạꞌjebitiñeꞌ dyijyedyeꞌ mọꞌ. Tyi chuc meꞌtyity jụijyaꞌ mạꞌjety jacches jedyeꞌ, muꞌ jam junꞌ mạꞌjete Jenꞌ, muꞌ Ạvatusinꞌtyiꞌ tsun, 16ĉaĉaij na ọ́ches jacches jedyeꞌ räjtumdye dyijyedyeꞌ mọꞌ, mọꞌ jam junꞌ Jenꞌsiꞌ, ọ́chesdye mọmoꞌ. Meꞌ fer dyijtujaꞌ aꞌc̣his dyijyedyeꞌ aꞌsiꞌ jụijyaꞌ tsun, judyeyaꞌ chimeꞌ fer mạꞌjejaꞌ räj mọꞌ cạvejaꞌsiꞌ ĉụiꞌsiꞌyaꞌ vej tsun, judyeyaꞌ vaꞌbunnacdyeꞌtum bäꞌjaꞌyaꞌ tsun, mọꞌ nash dyijyedyeꞌ jacches, jam Jenꞌsiꞌ muꞌ. 17Ọij jac räjtumdye aꞌc̣his dyijyedyeꞌ mọꞌ, räj raꞌ mọtsimꞌ, muꞌ na chiqueptety Jenꞌsiꞌ dyijyedyeꞌ, muꞌ raꞌ jam jụꞌñisĉan mạyedyeꞌ mọtsi.
Muꞌ fạ́quetety Jesucristo
18Chätidyeꞌ ạvaꞌ yụ, q̂uinꞌ aty c̣hẹiꞌyaꞌ jadyiquis tupudyeꞌ. Miꞌin seꞌvaqui jiquej atsij raꞌ muꞌ fạ́quetety Cristo. Meꞌdye q̂uinꞌ aty muꞌyaꞌ daiꞌ in fạ́quetety Cristo in, mọꞌyaꞌ tupuj chị́jaꞌ aty c̣hẹiꞌyaꞌ tupudyeꞌ ayibanꞌ. 19Muꞌin meꞌtyity in, meꞌ tsanꞌ tsuntumtyiꞌ jiquej in, shubantyiꞌ qui namꞌ in, ĉaĉaij na jam ĉojtyiꞌĉan cäc̣häꞌchute Jenꞌ in, jam jeñej tsun. Jam meꞌ jụijyaꞌ in, a vuty jam farajjisinꞌ u in. Muꞌin meꞌtyity in jam jẹjcaiꞌ cäc̣häꞌchute Jenꞌ in, mọꞌyaꞌ tupuj chị́jaꞌ tsun muꞌin jam ĉojtyiꞌĉan cäc̣häꞌchute Jenꞌ in.
20Cristo aty soꞌminac Jenꞌsiꞌ Ạꞌedyeꞌ muꞌ, mọꞌdyes miꞌin aty chị́yetiñety mọꞌ rụijsis p̂eyacdyeꞌ. 21Meꞌ tsanꞌ yụ jéyac q̂uinꞌ ọij sánacdyeꞌcheꞌ, jam qui namꞌ yi yụ miꞌin jam chị́yetiñeꞌ p̂eyacdyeꞌ, yụ ọij jéyac ĉaĉaij na miꞌin aty chị́yetiñeꞌ judyeyaꞌ chịj miꞌin muꞌ cạiꞌtyiꞌ rụijsis p̂eyacdyeꞌ muꞌ jam junꞌ väñädyeꞌ jiꞌshupqueꞌ. 22¿Tyi buty ĉaĉaij muꞌ väväjñity muntyiꞌ? Muꞌ yity: "Muꞌ Jesús jam nash Jiꞌc̣honacsity Muntyiꞌ." Tyi chuc meꞌ yity, muꞌ nash fạ́quetety Cristo, muꞌ vaꞌquetety Jenꞌ Ạvatusinꞌtyiꞌ tsun, chimeꞌdye Ạvaꞌ muꞌ vaꞌquecbite. 23Tyi chuc vaꞌquecbitety Jenꞌtyiꞌ Ạvaꞌ muꞌ, chimeꞌjajitidye raꞌ muꞌ Jenꞌ javaꞌquicdyi. Tyi chuc meꞌchubitety Jenꞌtyiꞌ Ạvaꞌ muꞌ, muꞌ raꞌ Jenꞌ jameꞌchuti.
24Yejĉojamꞌ meꞌchuvac mọꞌ ĉojtyiꞌĉan miꞌin mọꞌ p̂eyacdyeꞌ seꞌvetiñes tashches jiquej. Meꞌ jụijyaꞌ miꞌin, meꞌ raꞌ chat yejĉoij Jenꞌtum miꞌin judyeyaꞌ Ạvaꞌtum muꞌ chimeꞌ. 25Muꞌ Jesucristo jísinꞌ p̂eyacdyeꞌyaꞌ muꞌ junꞌ chuc raꞌ muꞌ tsạꞌchusinꞌ tsun paj qui Jenꞌyaꞌ bäꞌjaꞌ tsun.
26Ọij q̂uinꞌ p̂eyacdyeꞌ yụ jéyacsiꞌ miꞌin sánacdyeꞌcheꞌ, mọꞌ p̂eyacsiꞌ muꞌin mạꞌjeꞌ seꞌ jaꞌyinactyiꞌ in cäjsisyaꞌ jiꞌchäyitidyeꞌ muꞌin. 27Miꞌin na aty meꞌchubitinte Jenꞌsiꞌ Ạꞌedyeꞌ muꞌ ĉaĉaij na muꞌ Cristo soꞌminac jiquej. Mọꞌdye q̂uinꞌ yejĉoiꞌ miꞌintum, aty jam jemontiñeꞌ paj qui yoctyiꞌ jiꞌchäyinac in, ĉaĉaij na mọꞌdye mọmoꞌ jiꞌchäyinac Jenꞌsiꞌ Ạꞌedyeꞌ muꞌ, räj junꞌ junꞌ chuc rụijsis p̂eyacdyeꞌ mọꞌ jiꞌchäyinac, mọꞌ jam väñädyeꞌ jiꞌchäyinac. Chiquebivac mọꞌ jiꞌchäyitidyeꞌ soꞌminacsiꞌ Jenꞌsiꞌ Ạꞌedyeꞌ muꞌ, mọꞌ yiꞌ: yejĉojamꞌ Cristotum.
28Chätidyeꞌ ạvaꞌ yụ, yejĉojamꞌ Cristotum miꞌin, meꞌ qui atsijban jụijyaꞌ muꞌ, chat qui raꞌ sóñiꞌyedyeꞌtum tiĉunꞌbajtinte, mijam raꞌ tsị́cadyeꞌtum miꞌin muꞌsiꞌyaꞌ vej muꞌ. 29A nash miꞌin chị́yetinte miꞌin muꞌ Jesucristo muꞌ nash rụijtyity, chị́vac chimeꞌ tyi chuc rụij bäꞌyity in muꞌin nash Jenꞌtyiꞌ ạvaꞌ in.
S'ha seleccionat:
Tashches Juansi' 2: CAS
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'