2 Amwene 9
9
Jewu ovahiwa umwene wa Izarayeli
1Namafiyiheda Elizewu ohomuitanaga muzombwe mmohi muwari mwa asempuru a anamafiyiheda, liye muwandela eraga: <<Kakozeya, utukule mwana garafwa na makura ni, udowe sidadi ya Ramote-Jileyadi. 2Wafiya wewo, unvende mulombwana Jewu mwana Jozafa, muzula wa Ninsi. Udowe wafiye vande vili liye. Wanfwanya, umutukule vari va adibiliye, umudowena kwartu ya muwari, mwakale venyu vene. 3Era eno utukule mwana garafwa na makura ni, umukutulele vamuru vaye, umuwandele ira: <Yehova unawonga ira: Nnauhambiha ira ukale mwene wa Izarayeli.> Waira eno ukume, utawe mobaranya. Kudodomevo.>>
4Mwa enne muzombwe wenno ali sempuru wa anamafiyiheda ule ohomaruwaga, liye dowa Ramote-Jileyadi. 5Fwanyeya ira afiyaga wene aafwanyilege asogolrelri a anyakondo kagagaratile vamohive. Evale liye ohowongaga na mulombwana Jewu eraga: <<So musogolrelri, miyo dihikana mazu anafuna miyo uwandelani.>> Evale Jewu ohonfukaga eraga: <<Kodi muwari mwa hiyo atene munafuna muwonge na ani veva?>> Liye ohowakulaga eraga: <<Nnafuna diwonge na nyo so musogolrelri.>> 6Evale kohodowaga, aliwa volowa mmba. Kagadowile mmba mule, ohomukutulelaga makura vamuru vaye eto ohomuwandelaga eraga: <<Yehova Mulugu wa Izarayeli unawonga ira: <Nnauhambiha ira ukale mwene wa Izarayeli, atu a Yehova aye. 7Udowe waape atu a muibalini mwa marafula mbwiyawo Akabe#9:7 Udowe waape atu a muibalini mwa marafula mbwiyawo Akabe: Muwari morumiwa na Mulugu ira adowe aape atu a muibalini mwa Akabe, agamanle apa, Jewu kafwanyeyilena mulandu nnga mulombwana Bazani, mwasiwa Mulugu gwamurumile. Mbwenye Bazani masiki agawandeliwe ira akale mwene, Mulugu kamurumile ira adowe aapege atu. Nona Mulugu ohommanga Bazani mulandu zela apa atu a muibalini mwa Jerobowawu. Nione 1 Amwene 14:10, 15:29, 16:7. ira diwande weliha kunyakunya zela sangiri na azari aga anamafiyiheda vamohi na sangiri na anamalaba atene a Yehova anno kapiwe na Jezabeli. 8Eto nnafuna ira atu atene a muibalini mwa Akabe kafiyede mala eto nnoatolotcha alombwana atene a muibalini mwa Akabe romela muzari nari ohokala muzari ira kahafwanyeye mwilamboni mwa Izarayeli. 9Miyo nnafuna diirena atu a muibalini mwa Akabe na makalelo mamohive nnga dairilena miyo atu a muibalini mwa Jerobowawu, mwana Nebati eto nnoirana makalelo mamohive nnga diirilena miyo atu a muibalini mwa Bazani, mwana Ayiya. 10Eto anambwa anotakuna maningo a Jezabeli muwari mwa Jezereli eto kalivo unafuna mukoya.> >> Nomala wonga enne, sempuru ule ohulaga musuwo, liye tawaga jaye.
11Evale mulombwana Jewu akumaga mmba mule, agadowile wa asogolrelri afwaye amohiwa a mwene ale, kohonfukaga, aliwa ira: <<Jatene jili japama jene? Nnga zimora ule azele uwandela nni?>> Liye ohowakulaga eraga: <<Nyo muhumala muiziwa pama mulombwanole na makalelo aye owonga.>> 12Mbwenye afwaye ale kohomuwakulaga keraga: <<Nari, weyo unanama. Kaniwandele jejo jazele liye uwandela.>> Evale Jewu ohowongagamo jatene, aawandelaga eraga: <<Liye udiwandenle ira: <Yehova unawonga ira: <<Nnauhambiha ira ukale mwene wa Izarayeli.>> > >> 13Evale afwaye ale kagavwile enne mobaranya kada mutu ohodowaga tukula kapa diwa, aliwa za roma tanda mmasikadani ira liye anyingalege vazulu va kapa dile. Noira enne, kohonlihaga palraza kakuwaga keraga: <<Jewu gu mwene wehu.>>
Jewu ohompa Jorawu mwene wa Izarayeli na Akaziya mwene wa Juda
14-15Evale Jewu, mwana Jozafa, muzula wa Ninsi ohompanganela mpa mwene Jorawu. (Fwanyeya ira tempu yenno mwene Jorawu afwanyeya Jezereli. Tchoira agadowile sidadi ya Ramote-Jileyadi na anyakondo aye atene ira avunele sidadile mmandani mwa Hazayeli mwene wa Siriya, liye ohoporotchiwa kondoni ule. Agaporotchiwe, ohowelela Jezereli ira adowe akale wewule fiyeda avulumuwe zela vilonda daye.) Evale mulombwana Jewu ohawandelaga afwaye ale ira: <<Akala nyo munafuna ira dikale mwene, kakalevo unafuna zemba vasogolro vaga ira adowe Jezereli, awonge zela jatene jiireyile uno.>> 16Evale mulombwana Jewu ohogwelaga muatereladoni mwaye, liye dowa Jezereli, mwasiwa Jorawu afwanyeya wewule abulelaga. Eto mulombwana Akaziya mwene wa Juda na liyene adowile wewule muwari mompanda Jorawu.
17Fwanyeya ira ohokalawo maliba ing'ana ndila afwanyeya vazulu, nyumba yolapa ya gwarda ya Jezereli. Mwa enne liye agali evale aing'anagave, ohoonaga nikuru na anyakondo a Jewu nizaga. Evale liye ohowongaga eraga: <<Miyo nnaona nikuru na anyakondo nizaga.>> Evale pawongilege mwene Jorawu, liye ira: <<Kamurume mulombwana mmohi, adowe na kavalo, aagumanena, aafuke akala za wewa kwa murendele.>> 18Evale mulombwana arumiwe ule ohodowa na kavalo ira aagumanena. Agaagumannena, ohafukaga eraga: <<Mwene udirumile ira dize dufukeni ira: <Kodi za wenyu kwa murendele?> >> Evale Jewu ohomuwandelaga eraga: <<Weyo kunna pandi zela ja murendele jinafuka we jo. Kadowa mundulri, udiharege.>> Noira enne, maliba ing'ana vazulu vale, ohawandelaga eraga: <<Mutu mmurumile nyo ule uhufiya, mbwenye kanawanda welawo.>> 19Evale mwenole ohomurumaga mulombwana mmohiwa na kavalo. Liye aganfwanyile Jewu, ohowongaga eraga: <<Mwene udirumile ira dize dufukeni ira: <Kodi za wenyu kwa murendele?> >> Evale mulombwana Jewu ohomuwakulaga eraga: <<Weyo kunna pandi zela ja murendele jinafuka we jo. Kadowa mundulri, udiharege.>> 20Noira enne, maliba ing'ana ule ohawandelagave akoka eraga: <<Na wenne udowile tchineneva, uhufiya. Mbwenye kanawanda welawo. Eto miyo daing'ana, makalelo obaranya unabaranya atu, anakala nnga mawendelo a mulombwana Jewu, muzula wa Ninsi.>>
21Mwa enne mwene Jorawu ohowongaga eraga: <<Kadisakanyedele aterelado waga.>> Evale kohomala sakanyedaga aterelado waye. Evale Jorawu mwene wa Izarayeli ule vamohi na Akaziya mwene wa Juda kohovenyaga, kada mutu liye gwela muatereladoni mwaye, aliwa maruwa ira kadowe kagumane na Jewu. Kadowaga kanfwanyilege pandi imohi ya munda wa marafula Naboti, nkuda Jezereli. 22Mwa enne mwene Jorawu agamuonne Jewu, ohonfukaga eraga: <<Mulombwana Jewu kodi za wawo unaza mwa murendele?>> Evale mulombwana Jewu ohomuwakulaga eraga: <<Vinawandeye avi ira miyo dizege na murendele agali mmawo Jezabeli ante peno unnana simbwave dowaga musogolro zela makalelo aye oraruwa na ja ukwiri jaye!>>#9:22 mmawo Jezabeli… unnana simbwave dowaga musogolro zela makalelo aye oraruwa na ja ukwiri jaye: Raruwa wa Jezabeli podi tapulela ira ohokana imanya yoraruwa. Owu hehi podi tapulela makalelo ahara liye amilugu amohiwa hiya Mulugu wa ibaribari. Nione Jeremiya 3:20; Ozeya 3:1. 23Mwa enne mulombwana Jorawu ohorungunuwaga, liye roma tawa, amukuwelaga mwene Akaziya eraga: <<Akaziya, hiyo eni nihimala panganeliwa!>> 24Evale mulombwana Jewu ohokungaga urwa naye na kopolo daye datene, liye voka, aliwa dowa mulata mwene Jorawu unduli. Nifumo nne nagamulatile, nohofiyeda povola murima. Evale ohogwaga muatereladoni mwaye, liye kwa. 25Noira enne, mulombwana Jewu ohomuwongagana mundimuwa mmohi alaba na liye, aitaniwa Bidikare, liye ira: <<Kadowa watukule maningo a Jorawu ale, udowe wamutatilele mmundani mwa Naboti, nkuda Jezereli. Uumbuwele, siku nimohi miyo na weyo nagagwenle vakavaloni nimuharaga mwene Akabe wenno ali Jorawu babaye, Yehova ohowongaga mazwala zela liye eraga: 26<Nzilo miyo dihiona sangiri nitatiyile zela piwa wa Naboti vamohi na ahimaye. Na ibaribari miyo nnouweliheda kunyakunya mmundani mmohive emu.> >> Evale Jewu ohowonga, liye ira: <<Mwa eno, inafwanela utukule maningo aye utatilele mmundani mu mokwakwanela na mazu a Yehova.>>
27Mwa enne Akaziya mwene wa Juda agaonne jejile jiireyaga, ohotawa aharaga ndila yadowa tatamo ya Bete-Agani. Mbwenye mulombwana Jewu omuharaga eraga: <<Kampeni na liyene.>>#9:27 Kampeni na liyene: Fwanyeya ira Jewu para funaga jompa Akaziya mwene wa Juda, liye ohorumiwa na Mulugu ira aapege atu atene kabaliwe muzizani mwa Akabe. Fwanyeya ira Akaziya mmaye ali mwana Akabe. (2 Amwene 8:18,24,26) Mwa enne kohonvokaga mafumo, aliwa dowa mulata muatereladoni mwaye emule nkuma wa Guri, unafwanyeya wandamelana sidadi ya Ibeleyawu. Mbwenye ohokalelagave tamanga ante liye dowa kwela sidadi ya Mejido. 28Mwa enne andimuwaye kohomutukulaga, aliwa muhela muatereladoni, mudowana Jeruzalemu. Kaganfiyilena wewule, kohomukoyaga masiye waye vamohi na makolo aye, sidadi ya Davi.#9:28 sidadi ya Davi : Ku wonga Jeruzalemu wa wanle wewo wakala Davi. (2 Samuweli 6:12-15) Tchoira nnga jinereya na sidadi da tchineneva, wanle Jeruzalemu ohoulukula. Jeruzalemu wa wanle unaitaniwa sidadi ya Davi. 29Akaziya aromile atonga aJuda, Jorawu mwana Akabe agamanle yaka kumi na imohi aatongaga aIzarayeli.
Kwa wa Jezabeli
30Noira enne, mulombwana Jewu ohodowaga Jezereli. Evale Jezabeli agavwile ira: <<Jewu uhuza>>, ohopintarigi nyindji daye, liye mala sakanyeda pama nsisi naye, liye dowa vajanelani, roma ing'anaga unde. 31Evale Jezabeli agamuonne Jewu aviraga va mulango, ohomukuwelaga eraga: <<Alo Zimiri, we mpanga umpile mbwiyawo. Utcheliwa?>>#9:31 Alo Zimiri, we mpanga umpile mbwiyawo. : Para Jezabeli muitanaga mulombwana Jewu na nzina na Zimiri, kahi ira Jewu nzina naye ali neno, nari. So mbwenye wanle ohokalawo mutu mmohi aitaniwa Zimiri, ampile mwene waye nomala liye kala mwene eto umwene waye wamanle sumana imohi bahi. (1 Amwene 16:9-20) Nona liye amuitanaga Jewu na nzina na Zimiri, ku wonga ira: <<Weyo na Zimiri kamuhiyanile.>> Eto fwanyeya ira Jewu kaali mpanga, so liye ali mwene ohambihiwa na Mulugu ira aapege atu abure nnga Jezabeli. Eto mazu oira: Utcheliwa?, maBibiliya mamohiwa ani: Kodi vinokala murendele eni? Owu hehi Kodi Zimiri, wenno ampile mbwiyaye ohokana murendele? 32Evale mulombwana Jewu ohovenyihaga muru waye, liye ing'ana vajanelani vale. Againg'anne vajanelani vale, ohaonaga alombwana ohoya mmba kamulabetcha Jezabeli. Mwa enne ohakuwelaga eraga: <<Kodi bani uli na miyo? Bani?>> Mwa enne andimuwa ambinli nari araru kohomuing'anaga Jewu. 33Evale Jewu ohawongagana eraga: <<Kanvokeni muhiyanoyo, amorele vati vano.>> Mwa enne andimuwa ale kohomuhindaga Jezabeli, aliwa mukumiheda vajanelani vale, aliwa nvokeda vati. Evale sangiri naye nohoromaga vuva niwazeleyaga vaparedini vamohi na kavalo dile. Noira enne, Jewu ohomunyingalelaga na kavalo daye. 34Noira enne, Jewu ohovolowaga musidadi mule, liye dowa dja vamohi no ng'wa. Nomala liye wonga eraga: <<Kadowani mwamutukule muhiyana otembelrelreya ule, mudowe mwamukoye mwasiwa liye gu mwana mwene.>> 35Evale kohovenyaga atu ira kadowe kamukoye. Mbwenye kagadowile kafwanyilege nigaragazu na muru, na manyalo aye vamohi na mandaye bahi. 36Noira enne, kohowelaga, aliwa dowa muwandela Jewu. Evale liye ohawandelaga eraga: <<Yehova ohowonga jejo muwari mwa namalaba waye Eliya nkuda Tijibi ira: <Anambwa anotakuna maningo a Jezabeli muwari mwa Jezereli. 37Eto mutembo wa Jezabeli unagomela kala nnga mambi muwari mwa Jezereli. Kalivo unafuna ona ira ula gu Jezabeli.> >>
S'ha seleccionat:
2 Amwene 9: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral