2 Amwene 8
8
Muhiyana nkuda Sunemi ohowelihediwa tereno yaye
1Elizewu ohomuwongagana muhiyana wenne amuvenyihile liye mwanaye mokwani, liye muwandela eraga: <<Uvenye, weyo na atu a vande vawo mudowege pandi ili yatene inafune nyo hara. Tchoira Yehova unafuna azihe ndala ira imale yaka tanu na mbinli mwilamboni muno.>> 2Mwa enne muhiyanole ohovenyaga, liye irana nnga mwemo mwawongele mutu wa Mulugu ule. Liye venya na atu atene a vande vaye, aliwa dowa mwilamboni mwa aFilistewu, aliwa dowa kalaga mwemule fiyeda yaka tanu na mbinli dile. 3Evale mamalelo wa yaka tanu na mbinli dile, muhiyanole ohokumaga mwilamboni mwa aFilistewu mule, liye welela ilambo ya waniwa. Nofiya waniwa, afwannye ira vande vaye vamohi na vaterenoni vaye ohokalawo agaratilevo. Evale liye ohodowa muwongana mwene ira awelihediwe vaniwa vale.
4Mwa tempu yenne mwene afwanyeya atapanyaga na Jeyazi, namalaba wa mutu wa Mulugu, anfukaga eraga: <<Kadiwandele zela jotikiniha jatene jilukulu jejo jinairetchana Elizewu.>> 5Mwa enne Jeyazi agaromile muwandelamo zela makalelo Elizewu anvenyihile liye mwana akwile ule, tempu imohive pafiyaga muhiyanole vamohi na mwanaye ira aze anvepe mwene ira awelihediwe vande vaye vamohi na tereno yaye. Mwa enne Jeyazi ohowongaga eraga: <<Mbwiyeni so mwene, muhiyaniwa damuwonga miyo vamohi na mwanaye wenno Elizewu unvenyihile liye mokwani banna.>> 6Noira enne, mwene ule ohonfukaga muhiyanole. Evale muhiyanole ohowongagamo jatene jaireyile zela venyihiwa wa mwanaye ule. Noira enne, mwene ule ohomuwongagana musogolrelri waye mmohi ira alabe yovepa ya muhiyanole, liye muwandela eraga: <<Umuwelihede muhiyanole vande vaye vamohi na tereno yaye. Eto avahediwe kobiri yokwakwanela na johanda jatene jikumile mmundani mwaye roma siku navenyilevo liye fiyeda peno.>>
Hazayeli ohompa mwene Beni-Hadade
7Tempu imohi Elizewu ohodowa sidadi ya Damaxiku. Mwa tempu yenne mulombwana Beni-Hadade mwene wa Siriya, afwanyeya agali murenda. Evale ohowandeliwa ira: <<Eni mutu wa Mulugu uhuza.>> 8Mwene agavwile enne ohomuwandela mundimuwa mmohi alabetcha na liye aitaniwa Hazayeli, liye ira: <<Utukule mivaho, uvenye udowe wagumane na mutu wa Mulugu uyo, udowe wanfuke Yehova mwa liye ira: <Kodi mwene Beni-Hadade unovulumuwa urenda unna liye?> >> 9Evale mulombwana Hazayeli ohotukulaga mivaho dapama dafwanyeya Damaxiku ule, liye gweliha vazulu va akamelo 40, liye maruwa adowaga ira agumane na mutu wa Mulugu ule. Ohodowaga vamentoni va Elizewu, liye wonga eraga: <<Mbwiyeni, mwaninyu Beni-Hadade mwene wa Siriya gudirumile ira: <Udowe wagumane na Elizewu, wanfuke akala miyo nnovulumuwa urenda unna miyo.> >> 10Evale Elizewu ohomuwandelaga eraga: <<Yehova udiwandenle ira na ibaribari liye unagomela kwa. Mbwenye weyo wadowa, wamuwandele ira: <So mwene nyo munovulumuwa.> >> 11Agairile enne mutu wa Mulugu ule ohoromaga muing'anetchetcha Hazayeli pama, ante Hazayeli liye fiyeda gwiha kove yaye na manyazo. Noira enne, mutu wa Mulugu ule ohoromaga nla. 12Evale Hazayeli ohonfukaga eraga: <<Mbwiyeni kodi munanlela nni?>> Evale mutu wa Mulugu ule ohomuwakulaga eraga: <<Miyo nnakumbanya zela ubure unafuna we airela Ana Izarayeli. Tchoira weyo unodowa watumeye mamburo ewa olimba otawelamo. Unoapa azombwiwa na supada, ahimiwa unoatatakanya eto ahiyaniwa okana vambani, unoza waakawule.>> 13Evale Hazayeli ohowongaga eraga: <<Kodi miyo namalaba wenyu nnawande irana avi jokala ha jejo? Tchoira miyo nnaoneya nnga dili mwanambwa bahi.>> Evale Elizewu ohowakulaga eraga: <<Yehova udionihile ira weyo unoza ukale mwene wa Siriya.>> 14Noira enne, mulombwana Hazayeli ohovenyaga liye welela wa mbwiyaye. Mwa enne mwene Beni-Hadade aganfukile ira: <<Waganfukile Elizewu, uwongile avi?>> Liye ohowakulaga eraga: <<Elizewu udiwandenle ira na ibaribari nyo munovulumuwa.>> 15Mbwenye mmetcheloni muwa mulombwana Hazayeli ohotukulaga yovikunelana, liye mala nyetiha na mahindje. Nomala enne, ohodowaga nkunelana mwene Beni-Hadade wintoni ira ampena. Evale mwenole ohokwaga. Agakwile, mulombwana Hazayeli ohokala mwene vamalroni vaye.
Tonga wa Jeyorawu mwene wa Juda
16Jeyorawu mwana Jozafa ohoroma atonga aJuda, babaye agaliwove. Tempu yaroma liye tonga, Jorawu mwana Akabe agamanle yaka tanu aatongaga aIzarayeli. 17Tempu yaroma liye tonga anna yaka 32. Eto liye atongile yaka tanu na taru muJeruzalemu. 18Liye ohosakanya jabure vamentoni va Yehova, aharaga ndila dabure dimohive dedo daharetcha amwene a Izarayeli na makalelo mamohive nnga kairile amwene okumela muibalini mwa Akabe. Tchoira liye amutenle mwana Akabe. 19Mbwenye Yehova kafunile maliha umwene wa Juda na mwasa omuzivela namalaba waye Davi nnga mwemo mwamuwandenle liye ira: <<Miyo nneregeve uvaha weyo na ahimawo a musogolro wareya. Wareya uwa, ahimawo a musogolro anerege tonga vamalroni vawo kala no kala.>>#2 Samuweli 7:16; 1 Amwene 11:36, 15:4
20Fwanyeya ira akuda Edomu kazave katongiwaga na amwene a Juda. Mbwenye tempu yatonga Jeyorawu, aliwa kohoroma konda tongiwa na umwene wa Juda, aliwa muhambiha mwene wewa ira aatongege. 21Evale mulombwana Jeyorawu ohomaruwaga na aaterelado aye atene a kondo, liye dowa Zayire. Evale akuda Edomu kohomurindjaga mwene Jeyorawu. Mbwenye na mahiyu, mwenole na anyakondo aye owendiha aterelado kohoroma wana na akuda Edomu. Evale akuda Juda kagomenle tawa, aliwa dowaga mmavande mwewa. 22Na mwasa wenno fiyeda peno akuda Edomu anokonda tongiwa na Juda.#8:22 fiyeda peno akuda Edomu anokonda tongiwa na Juda: Jatene ejo jalabile ira jikwakwanelihede mazu a Jenesesi 27:40. Tempu imohive yenne eto, atu a sidadi ya Libina kohokonda tongiwa na umwene wa Juda.
23Joira jimohi jiwa ja mwene Jeyorawu, vamohi na mabasa matene alabile liye jinafwanyeya jagalrembiwe mulivuruni mwa Joira ja Amwene a Juda. 24Evale Jeyorawu ohokwa sawasawa nnga makolo aye, liye koyiwa wewo wakoyiwe makolo aye sidadi ya Davi. Evale mwanaye Akaziya gwahambile umwene vamalroni vaye.
Tonga wa Akaziya, mwene wa Juda
25Mwene Jorawu mwana Akabe agamanle yaka 12 aatongaga aIzarayeli, tchi tempu Akaziya mwana Jeyorawu aromile liye atonga aJuda. 26Mulombwana Akaziya aromaga tonga anna yaka 22. Mwa enne agagwenle vampandoni, atongile yaka imohi muJeruzalemu. Mmaye nzina naye ali Ataliya, muzula wa Omiri, wenno ali mwene wa Izarayeli.#1 Amwene 16:16 27Liye ohara ndila imohive ya amwene a muibalini mwa Akabe, liye roma sakanyaga jabure vamentoni va Yehova nnga jairile amwene a muibalini mwa Akabe. Tchoira liye afwanyeya agali nkamwene wa atu a muibalini mwa Akabe.
28Siku nimohi mwene Akaziya ohomaruwaga na Jorawu, mwana Akabe, aliwa dowa Ramote-Jileyadi ira kadowe kawane na Hazayeli, mwene wa Siriya. Mwa enne kawanaga, akuda Siriya kohomporotcha mulombwana Jorawu. 29Evale mwene Jorawu ohowelagawo, liye dowa Jezereli ira aing'anele vilonda daye divole, dedo akuda Siriya kamporotchile atu Rama awanaga na Hazayeli mwene wa Siriya. Noira enne, siku nimohi Akaziya mwana Jeyorawu, mwene wa Juda ohomaruwaga, liye dowa Jezereli ira adowe ampande mwene Jorawu mwana Akabe na mwasa oira ali murenda.
S'ha seleccionat:
2 Amwene 8: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral