2 Amwene 10
10
Jewu ohatolotcha atu a muibalini mwa Akabe
1Akabe anna ahima a anapongwe 70 sidadi ya Samariya. Mwa enne Jewu oholrembaga makarta, liye rumiheda Samariya para asogolrelri, andimuwa a sidadi vamohi na aliba aing'anela ana mwene Akabe, aawandelaga eraga: 2<<Miyo nnaurumihedani makarta ala mwasiwa ahima a mbwiyinyu anafwanyeya na nyo vamohi na maaterelado aye, vamohi na kavalo, vamohi na sidadi yolimba, vamohi na jowanana. 3Nnafuna ira muwari mwa ahima a mbwiyinyu, mmusakulre mwana wenno usimbwile kala ofwanelela, wa makalelo apama, mmuhambihe ira akale mwene otonga vamalroni va babaye. Mwamala eno muze muwane na miyo ira muvunele umwene wa mbwiyinyu.>> 4Aliwa mbwenye kagawatchenle makarta ale, kohoovaga valukulu. Mwa enne kohowongaga keraga: <<Amwene ambinli kiwandile imela ira kawane na liye.#10:4 Amwene ambinli kiwandile imela ira kawane na liye. Anawonga zela Jorawu mwene wa Izarayeli na Akaziya mwene wa Juda. Jewu ohapa amwene ambinlene. Nione 2 Amwene 9:22-28. Kodi hiyo nnawande na makalelo bavi?>> 5Mwa enne musogolrelri wa palasiyoni wa mwene na musogolrelri wa sidadi yolimba na andimuwa vamohi na aliba aing'anela ana mwene Akabe, kohorumihaga milanyo wa Jewu keraga: <<Hiyo atene nnafwanyeya nagali anamalaba enyu. Eto jatene jinawonge nyo, hiyo nnoirana. Hiyo kannamuhambiha umwene mutu uli watene. Nyo inafwanela muirena yenno inaone nyo kala yofwanela.>> 6Noira enne, Jewu ohalrembelaga karta nimohi niwa eraga: <<Akala nyo muli pandi yaga eto akala munodivwelela, miyo nnafuna ira mugwade miru da alombwana atene obaliwa na mbwiyinyu. Era eno metchelo ora yokala nnga yenna, muze vamentoni vaga sidadi ya Jezereli.>> Fwanyeya ira mwa tempu yenne ahima a mwene kali okwakwana 70. Aliwa kaing'aneliwa na andimuwa a sidadile. 7Mwa enne andimuwale kagawatchenle karta nne, kohatukulaga ahima 70 a mwene ale, aliwa mala apa. Kohotukulaga miru diwa, aliwa hela mungogodani, aliwa rumiheda Jezereli. 8Mwa enne ohokalawo mutu mmohi azilege amuwandelaga mwene Jewu eraga: <<Kohozana miru da ana mwene.>> Evale liye ohomuwakulaga eraga: <<Mudowe mwakutulele va mulango va sidadi kamba mbinli, muhiye evo ante metchelo.>>
9Mwa enne na mabebehene, mulombwana Jewu ohokumaga, liye wonga na atu atene eraga: <<Nyo kamunna mulandu zela atu kakwile. Na ibaribari miyo dihimurungunuwela mwene waga, miyo mpa. Nnga kodi uapile atu atene anna bani?#10:9 Nnga kodi uapile atu atene anna bani? Jewu awongaga eno, kahi ira liye unammanga mutu mulandu. Afwase unafuka eno ira atu a Jezereli kawande iziwa ira kohokalawo atu a Samariya omuhara liye. Atu a Samariya kamuhara Jewu ale baapile ana mwene ale. Ali ira atu a Jezereli kawande muova eto kaiziwe ira umwene uroma garateya mmandani mwaye. 10Eni inafwanela muiziwe ira mazu matene awongile Yehova zela muibalini mwa Akabe anokwakwanela. Tchoira Yehova unnana kwakwaneliheda jatene jawongile liye muwari mwa namalaba waye Eliya.>> 11Nomala eno, mulombwana Jewu ohapa atu atene ohala a muibalini mwa Akabe kafwanyeya Jezereli, vamohi na andimuwaye atene, na afwaye atene aawandannena liye, na anamakuta aye atene. Nne mmohi kamuhiyile.#10:11 Jewu ohapa atu atene ohala a muibalini mwa Akabe kafwanyeya Jezereli, vamohi na andimuwaye atene: Agali Mulugu amurumile Jewu ira aape atu a muibalini mwa Akabe, (2 Amwene 9:7-8), Jewu osimbwa apa atu amohiwa kwaranya ale arumiwe liye ira aape. Nione eto Ozeya 1:4.
12Nomala enne, ohovenyihana liye dowaga Samariya. Evale adowaga mundila agafiyile Bete-Ekede limburo eni wakaletcha anamakumbuza, 13Jewu ohafwanyaga atu a muibalini mwa Akaziya mwene wa Juda kawendanga mundila. Evale ohafukaga eraga: <<Kodi nyo muli ani?>> Aliwa kohowakulaga keraga: <<Hiyo nili atu a muibalini mwa Akaziya. Nnadowa naapande ahima a mwene vamohi na ahima a mwadi mwene.>> 14Evale mulombwana Jewu ohowongaga eraga: <<Kaahindeni atwala.>> Evale kohahindaga alombwana 42 a meswene, aliwa mala apa atene wandamelana vaisimeni ya Bete-Ekede. Nne mmohi tchamuhiyilege.
Jewu ohatolotcha atu atene omuhara Baali
15Jewu agakumile evale, ohonfwanyaga Jonadabe, mwana Rekabe azaga ira awonge na liye. Jewu aganfwanyile, ohomulondjelaga, liye ira: <<Kodi weyo unodiziveliwa miyo na makalelo nnga nnauziveliwa miyo?>>#10:15 Jewu anfukaga Jonadabe ira: Kodi weyo unodiziveliwa miyo na makalelo nnga nnauziveliwa miyo? Inakala nnga Jewu na Jonadabe kohoiziwana malambo a mundulri. Va Jewu unamuxixa ira aone akala liye unoziveliwa ejo jinalaba liye eto akala liye unowanda mukamiheda na mabasa afuna liye laba muwari moapa atu atene otamalela ikwamutu yosema yaitaniwa Baali. Nione 10:23. Evale liye ohowakulaga eraga: <<He, miyo nnouziveliwani na makalelo mamohive.>> Evale liye ohomuwandelaga eraga: <<Akala weyo unodiziveliwa na makalelo mamohive, kadivahe ndanda nawo.>> Evale Jonadabe ohonvahedaga ndanda naye, Jewu liye mugweliha muatereladoni mwaye. 16Noira enne, ohomuwandelaga, liye ira: <<Nidowege vamohi ira waone sandje inna miyo zela wa Yehova.>> Evale ohomudowagana vamohi muatereladoni mwaye. 17Kagafiyile Samariya, ohapaga atu atene a Akabe kahanle fiyeda atolotcha atene nnga mwemo Yehova mwamuwandenle liye Eliya.
18Evale Jewu ohagumanihaga atu atene, liye awandela eraga: <<Akabe ohomulaba vang'ono mulugu Baali. Mbwenye miyo dagali mulombwana Jewu gunafuna mulaba Baali kwaranya. 19Mwa eno, nnafuna mudowe mwaaitane anamafiyiheda atene a Baali, atu atene omutamalela Baali, na anamakuta ewa atene. Nne mmohi kahale. Miyo nnafuna divelele wa Baali mukuto mundimuwa. Mutu uli watene unahale, unagomela kwa.>> Mbwenye Jewu airaga enne, era anyenga muwari mofuna atolotcha atu atene kamuhara Baali. 20Jewu ohowongagave eraga: <<Mudowe mwaawandele atu ira nnafuna nigumane ira nimutamalele Baali.>> Evale aliba rumiwa ale koholaleyaga mazwale. 21Eto Jewu ohorumiha milanyo wa aIzarayeli atene, evale aliba mutamalela Baali atene kohozaga, aliwa volowa nyumba ya Baali. Kalivo nne mmohi ahazilege, ante nyumba yatene fiyeda zala haoneyaga nimburo. 22Noira enne, ohomuwongana wenne anna izo ya jowara jomutamalelana Baali, liye ira: <<Kakumiha jowara ira atu atene otamalela Baali kaware.>> Evale liye ohodowaga tukula jatene, liye zana. 23Noira enne, Jewu vamohi na Jonadabe mwana Rekabe kohovolowaga mmba mwa mulugu Baali mule, liye awongana anamalaba a Baali ale ira: <<Kaing'anani pama mmba muno tawiha ira unaze akalemo mutu unamuhara Yehova agumanele na nyo. So nnafuna ira kakalemo atu omuhara Baali bahi.>>
24Mwa enne atene kohomalaga volowa ira kavelelege mikuto diwa vamohi na mikuto dotumeya. Fwanyeya ira Jewu ohatukulaga alombwana 80, liye avitaliha unde, liye awandela ira: <<Atu anne anafuna miyo uvahedani ira mwaape, wenno unamutawihe waye, liye gunafuna kwa vamalroni va wenno umutawihile liye.>> 25Mwa enne Jewu vamohi na atu a Baali ale kagamanle velela mikuto dotumeya, Jewu ohawandelaga asogolrelri aye vamohi na agwardaye ale eraga: <<Kavolowani, mudowe mwaape atene. Kakalevo unafuna hala.>>#10:25 mudowe mwaape atene. Kakalevo unafuna hala. Jewu aapihaga atu atene ohara mulugu Baali ohosakanya yengo yapama vamentoni va Mulugu mwasiwa Mulugu ohowonga ira: <<Ule unahara vikwamutu josema apiwe ahawendeliwe tangaranga.>> (Detoronomiyo 13:6-9) Mwa enne aliwa kohodowaga, aliwa mala apa atene na supada. Evale agwarda ale vamohi na asogolrelri ale kohovokedaga mitembo da atwale unde, aliwa dowa volowa kwartu dafwanyeya muwari mwa nyumba ya mulugu Baali. 26Kohotukulaga vikwamutu josema jafwanyeya mmba mwa Baali mule, aliwa tumeya. 27Eto kohobwanyulaga ikwamutu yosema ya mwinnyiwene Baali, vamohi na nyumba yatene ya Baali ile, aliwa kala latirina fiyeda siku na peno.
28Ayo ba makalelo Jewu amalihile liye jomutamalela mulugu Baali mwilamboni mwa Izarayeli. 29Mbwenye masiki airileve jatene ejile, Jewu kahiyile hara jotega ja Jerobowawu, mwana Nebati wenno aategihile aIzarayeli muwari mwa mwana ng'ombe da oru dedo dafwanyeya Beteli na Dani. 30Mwa enne Yehova ohomuwandela Jewu eraga: <<Weyo uhusakanya japama vamentoni vaga, uhuirana jejo jafuna miyo mmirimani mwaga zela atu a muibalini mwa Akabe. Na mwasa wenno ahimawo banafuna kalaga amwene roma mwanawo, ante muzulawo, muzulawo mwanaye, fiyeda muzulawo mwanaye mwanayiwa.>> 31Mbwenye Jewu kawandile hara na mmirimani mwaye mwatene malamulo a Yehova Mulugu wa Izarayeli eto kawandile hiya jotega ja Jerobowawu, wenno aategihile aIzarayeli.
32Mwa tempu yenne Yehova ohoroma vungula vilambo dimohi diwa da aIzarayeli. Mulombwana Hazayeli, mwene wa Siriya ohozaga, liye gondjiha ilambo ilukulu muwari mwa aIzarayeli, 33romela muhindje Jordawu ante dowa makumelo wa nzuwa, ilambo yatene ya Jileyadi na ilambo yatene ya akuda Gadi, na akuda Rubeni vamohi na akuda Manasesi kuma Aroweri pandi yenno inafwanyeya wandamelana mwana muhindje wa Arinoni ku wonga Jileyadi vamohi na Bazani.
Kwa wa Jewu
34Joira jimohi jiwa ja mwene Jewu, na mabasa matene alabile liye, vamohi na kopolo daye datene, jatene ejo jinafwanyeya jagalrembiwe mulivuruni mwa Joira ja Amwene a Izarayeli. 35Jewu ohokwa, liye dowa vuma na makolo aye, liye koyiwa Samariya. Noira eno, mwanaye Jeyowakazi, gwahambile umwene vamalroni vaye. 36Fwanyeya ira Jewu aatongile aIzarayeli mwilamboni mwa Samariya yaka 28.
S'ha seleccionat:
2 Amwene 10: iLolo
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2018 Visão Integral