VAEFESO 5
5
Kya ikaa seny
1Naasany, latyeny Iruva, muve sha vana vakunde; 2mukae na ukundi shaasa na Kristo alevelukunda yese, kutani akuvika-u kimaruma kyany, kava kiraso kwa Iruva, kive nrungo nsha ufwaamaa. 3Lyingyi utuusi lulasheesendwa nta kinnywa kwany-fo, nta uravi lwa ngata shoose-fo, nta lango sheesi, muve vandu veele; 4nta findo fya sony na urung'ani na itira ngashile, mashika efyo mfisenyi-fo, lyo mukummbwe yaana Iruva. 5Mashika lyo irero elyi mulyiishi nisha nnu, sheelyi nkwiifo ntuusi ao nkirinda nta mwilanga na mwiindya maruva a wongo, ashewonaa ding'u efo umanginy lwa Kristo na Iruva Nde-fo. 6Kulave nndu amulemba na marero a ing'ana; mashika unyafi lwa Iruva mmbo lwasheya vana yewo va uravi. 7Kyasiany, mulaakani nawo-fo. 8Mashika elyo mbee mmbo mwekee ireeminy, kyaindi ulaalu mmbo mukee seny mukee na Nndumi, naasa endeny sha vana va sa. 9Kimmba ndunda ta sa ni usha lwa wo ngata na usumanu na dede; 10mwimanyaa na nshushwa nkyokyi kisennyi Nndumi. 11Nta mulaakani ngaa shikasha titiri ndunda ta ireema-fo, kyeemminy findo fya ngata yeyo; 12mashika efyo vakeetana kirika ni sony ifisenda. 13Kyaindi lyo efyo fikekyeemmywa mmbo filollyo paa yoo seny, mashika ekyo kyalollyo paa mmbo kyamikywa nsa. 14Nkyo kikaambawa,
“Marukya yewe kukeerengeya,
kuruke kuuke ufuny,
naambo Kristo nakumikkye.”
15Kyasia loleny nnu shaasa mushendaa; nshi sha vandu valatiri urango-fo, kyaindi muve vandu vatiri urango; 16muvekira fyeeri mashika fyeeri efi mfya uravi nnu. 17Kimmba ni indo mulasheeva varung'ani-fo, mumanyi nkyokyi kisennyi Nndumi. 18Nta mulave veenangwa mmbwari nato utiri nnu ufullwe, lyo lalakyeny iishurwa Mumuyo. 19Muumburani na fiimbo fya zaburi na fiimbo fisongosye fya nriminy, mwiishimbaa na ikapya Iruva ukoru efo miriminy yaany, 20muveana Iruva Nde mikonu myoose kya findo fyoose, kwi irina lya Nndumi weeru Yesu Kristo.
Kya Vaka na womi
21Neeni muveni na veni mwiikunyisaa mwiireiye Kristo. 22Yeni vaka, indyeny womi vany kimwi sha iindya Nndumi weeru. 23Mashika nndumi mmbo akee nrwe wa nka, shaasa na Kristo akee nrwe wa siri, nawe mmbo akee mwiikira wa mwiili. 24Na shaasa siri yaindya Kristo, kiwo indo na vaka venndye womi vawo findony fyoose.
25Yeni womi, kundeny vaka vany, shaasa na Kristo nawe alevekunda siri, kakuuta we muni kimaruma kya vayo. 26Naambo nayiilyise neeisangya na mura uriyani na irero lyakwe; 27Naambo nakuwonisye siri itiri itumbe ilatiri ivara nta mbese nta uravi sha elo; naambo ive sheele ilatiri ivara. 28Naasa ni indo kisumani womi vakunde vaka vawo shaasa vakunndye miili yaawo veni. Nndu akunda nka wakwe mmbo akukunda we muni. 29Mashika nkukaa-fo nndu asuaa mwiili wakwe muni-fo, kyaindi mmbo auwuutisa na iuvavara, shaasa na Kristo nawe avetannya siri. 30Mashika mmbo lukee fyilungo fya mwiili wakwe. 31Kimmba ni indo nndu mmbo asheraa ndeye na maaye, nandekutira na nka wakwe na yewo vavii vashevaa mwiili umwi. 32Kyama ekyi nkiniini nnu, lyo yeny mmbo nkeerera kya Kristo na siri. 33Lyo wo nndu nakunde nka wakwe shaasa akukunndye we muni, nta nka nalare nalaindya mmi wakwe-fo.
S'ha seleccionat:
VAEFESO 5: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.