VAEFESO 4
4
Mwiili umwi
1Naasany mmbo shamutereva, yeny shikee mfinge kimaruma kya Nndumi, endeny mweendo wany kiinani na uvaango lwany shaasa mulevaangywa. 2Mwikunyiisye nnu na ufoo, mwitiri usisiryo, mwisheekyanaa kyuuka na ikunda. 3Mwiivekutakuraa nnu iringa umwi wa Mumuyo, lweendwa ni wiitanu lwa urilayi. 4Mwiili umwi na Mumuyo umwi shaasa mulevaangywa ivika nsia lya ngata imwi lya uvaango lwany. 5Na Nndumi ni umwi, kyikusiryo nkimwi, na ubatiso llumwi. 6Na Iruva kaveva nawe ni Nde wa woose, akee uwe ya findo fyoose na nnang'ani ya fyoose. 7Lyo wo umwi weeru mmbo alesimbwa isarya kiinani na mwiina wa simbo ya Kristo. 8Nkyo kikaambawa,
“Llya alerwa na uwe mmbo aletira mifungwa,
kalyimmya vandu simbo.”
9Naasa irero elyo “Alerwa na uwe”, mmbo lyaamba-kyi kulaore ni yaamba we mmbo aleoloka si kafika si deny? 10Na yeto aleoloka si deny mmbwe yeto alerwa na uwe kailannya ngina toose, naambo namulemule findo fyoose. 11Nawe mmbo alevika vengyi vave varumi; na vengyi ni vakisuku, na vengyi ni vatarami va siri na vengyi ni veesi na veelosha. 12Katana indo naambo veele vakooye ikwaaniswa, na mashora a utarami akooye iinutywa, na mwiili wa Kristo uvangiswa. 13Neese loose kyeeri lushefikyaa ukulungo lwa iirikyo lyeru neemanya nnu, Mwana wa Iruva, kutani lwavangiswa, neekooya uniini lwa usongovisi lwa Kristo; 14naambo lure lulakiva sha vakoku, lwiisingiswaa efo na efo, na iipowa ni wo uraato lwa miloshye ya vandu, na mitambo ya vandu, lwiilatyaa shia ta ulembi. 15Naasa lutire dede yeyo lwikee na ukundi naambo lutumae neemfikya we kya findo fyoose, lumfikye we yeto akee nrwe, we Kristo. 16Yoo kwakwe we mwiili moose mmbo ukee llunge filungo fyoose fikainiwa nisha na wo kimwi kirunde ishora lya vayo naambo mwiili wiidimi itumarisywa efo ukundiny.
Muu mwiiya nnang'ani ya Kristo
17Kyasiany mmbo shaamba indi, shavekureeka shikee na Nndumi, kupookya ulaalu mulashekaa sha vandu va masanga na ngaa shiravi ta mirima yaawo-fo. 18Mashika yewo mmbo vavikye ireema miriminy yaawo, vakasuvaniswa na muu wa ki-Iruva, kyeendwa ni urung'ani yelo lukee nnang'ani yaawo, kimaruma kya uumu lwa mirima yaawo. 19Nawo vakammaa ifwa ngashari mmbo vakwaataa findony fya uravi naambo vatani findo fya ukirinda fya wo ngata veetiri lango sheesi. 20Lyo yeni, nshiindo mulekulosha kwa Kristo-fo. 21Kwakooya muleita mukaloshwa mbony takwe, shaasa dede ya Yesu ikai, 22kuute-u deny ngata ilya ya mbee na unndu lwa kasha yelo lulyamarikaa kyeendwa ni ilatya lango yeto tilembaa. 23Mwaaluwa vaiya efo makusarony na miriminy. 24Muveraa unndu wiiya lukee wuumbe lwa ki-Iruva kyikee kya usumanu na weele lwa dede.
25Naasa kuuteny wongo, murere dede sheni wo nndu na ungyi, mashika yese loose mmbo luvakye filungo fya mwiili umwi nsi. 26Kwakooya mwarooya ni unyafi, lyo loleny mulashelyamara, mwi ulasheoloka neeni mwiivavyoo miriminy. 27Nta mulasheniinga yeto nkumbi mwaanya. 28Nndu mwiiva, nalakiive-fo; kyaindi nakutakure irunda na nrike we muni, naambo nawoni na kindo kyeniinga nndu aanguywa. 29Irero iravi lya ngata shoose lyilasheuka kaniny kkany-fo, lyo kuuke-fo marero mesha ashidimaa yeekya nndu akee nting'i, na valya vashitaa vakooye ivikywa mbora. 30Loleny deny naambo mulashevavisa Mumuyo Mweele wa Iruva, yeto yeni mulevikwa wende mmbwe mufikye nkonu yeto wa iwowowa. 31Nrima uvavaa na unyafi na irooywa nngoo na marero na firumu fyuuke kwany deny, ando amwi na uravi lwa wo ngata, 32na lyingyi veny velyilyana muveni na veni, muvesaryana shaasa Iruva nawe alemusarya kyeendwa ni Kristo.
S'ha seleccionat:
VAEFESO 4: MAS2
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
The Holy Bible in Kimashami © Bible Society of Tanzania, 2016.