Eby'abalevita 23
23
Ebiro bikuru by'edini
(Orub 28:16-25)
1Omukama agambira Musa ati, 2“Ogambire Abaisiraeli oti, Ebiro bikuru by'Omukama ebitairweho ebyo muraranga okwo bili nteko zitakatifu, niby'ebi: 3Emilimo ekorwe ebiro mukaga; ekya mushanju ni Sabato, kiro ky'ekyosi, nteko ntakatifu, mutakora mulimo; ni Sabato y'Omukama omu matura ganyu gona. 4Ebi nibyo biro bikuru by'Omukama ebitairweho, by'enteko zitakatifu, ebyo muraranga aha kanya kabyo akatairweho.”
Pasika n'emikate etatumbisiibwe
5“Bwaigoro bw'ekiro kya ikumi na binai ky'omwezi gwa mbere, nikyo kiro kya Pasika y'Omukama. 6Aha kiro kya ikumi na bitanu ky'omwezi gwonene, kiro kikuru ky'Omukama ky'emikate etatumbisiibwe. Mulita kugilya ebiro mushanju. 7Aha kiro kya mbere mugire enteko ntakatifu; mutalikora mulimo gwa kachwazikano. 8Ebiro mushanju byona muhongere Omukama ekihongo ky'okwokibwa. Aha kiro kya mushanju nteko ntakatifu, mutalikora mulimo gwa kachwazikano.”
9Omukama agambira Musa ati, 10“Ogambire Abaisiraeli oti, Orwo murataha omu nsi eyo ndikubaha, mukagesha n'ebiraba byayo, muleterega omukuhani omuganda gw'engano eyo muligesha eli ya mbere. 11Omuganda ogwo araguchunkeza omu maisho gange nirwo ndibakunda. Omukuhani araguchunkezaga bukeire bwa Sabato. 12Kir'ekyo murachunkezaga omuganda, muhongere Omukama akapaya k'omwana gw'entama k'omwaka gumoi obuzira kamogo, ekihongo ky'okwokibwa. 13Hamoi n'ekyo mwongereho ekihongo ky'emyaka ekilo ibili z'ensano enungi etabiraine n'amajuta, ky'okuhongera Omukama kyokesiibwe omuliro. Akatachu kakyo kanshemelera inye Omukama. Muteho n'ekihongo ky'okunywa eky'edivai, elita emoi. 14Mutalilya mugate anga mbugirwa zibabwirwe anga zili zibisibisi kuturuka kiro kyonene eki orwo mulihongera Omukama mukamuganuza. Kiragiro ky'eirai lyona omu mizarwa yanyu omu matura ganyu gona.”
Ekiro kikuru ky'eigesha
(Orub 28:26-31)
15“Kandi mubare amalimansi mushanju agagobire kwema kiro ekyo muliba muleteireho omuganda gw'ekihongo ky'okuchunkeza. 16Mubare ebiro makumi gatanu kuturuka bukeire bwa Sabato ya mushanju aho muhongere Omukama ekihongo ky'emyaka emihya. 17Buli ka mugire emiganda ebili ey'okuchunkeeza, buli gumoi gukorwe omu kilo ibili z'ensano nungi, ensano egyo ekandiranwe n'eitumbyo mugihongere Omukama kumuganuza. 18Emigate egyo mugihongerane n'obwana mushanju bw'entaama obw'omwaka gumoi obutaina kamogo, n'enumi ento emoi n'empaya z'entama ibili. Bihongerwe Omukama ekihongo ky'okwokibwa, kigende n'ekihongo kyabo ky'emyaka n'ebihongo byabo eby'okunywa. Ekihongo eki ky'okwokibwa akatachu kakyo kanshemelera inye Omukama. 19Kandi muhonge empaya emoi y'embuzi ekihongo ky'enyatano y'obufu, n'empaya ibili z'obwana bw'entaama bw'omwaka gumoi mugitambe ekitambo ky'emilembe. 20Omukuhani abihonge hamoi n'emikate y'okuganuza, kihongo ky'okuchunkeza omu maisho g'Omukama hamoi n'obwana bubili bw'entaama, eby'okuhongera Omukama bitakatifu mara bibe by'abakuhani. 21Aha kiro kyonene murange okwo muragira enteko ntakatifu; mutalikora mulimo gwa kachwazikano. Kiragiro ky'eirai lyona omu mizarwa yanyu omu matura ganyu gona.”
22“Kamurageshaga emisiri yanyu, otaligesha ndimiro kugituruka mu mperero bwoli. Kandi otalimara kugesha okashubamu kurondarondamu ebisigairemu. Ebyo obilekeremu omunaku n'omwizi: N'inye Omukama Ruhanga.”
Ekiro kikuru ky'omwaka guhya
(Orub 29:1-6)
23Omukama agambira Musa ati, 24“Ogambire Abaisiraeli oti, Aha kiro kya mbere ky'omwezi gwa mushanju, mwekomye ekiro ky'ekyosi. Habeho enteko ntakatifu; ekiro kikuru ekyo kirangwe amakondere. 25Mutalikora mulimo gwa kachwazikano. Kandi muhongerega Omukama ekihongo ky'okwokesa omuliro.”
Ekiro ky'enyatano
(Orub 29:7-11)
26Omukama agambira Musa ati, 27“Aha kiro kya ikumi ky'omwezi ogu gwa mushanju kiro ky'enyatano. Ahali inywe kabe kashango k'okugira enteko ntakatifu, mweshase kandi muhongere Omukama ekihongo ky'okwokesa omuliro. 28Aha kiro kyonene eki mutalikora mulimo, ahakuba kiro ky'enyatano, kubatilira aha Mukama Ruhanga wanyu. 29Enshonga omuntu aliba ateshasize aha kiro kyonene eki balimuchwa omu babo. 30Kandi wena wena alikora omulimo aha kiro kyonene eki, omuntu ogwo ndimusilikya achweke omu ba wenene. 31Mutalikora mulimo: Kiragiro ky'eirai lyona omu mizarwa yanyu omu matura ganyu gona. 32Erabaga Sabato yanyu y'ekyosi, mara mweshasega. Kwema bwaigoro bw'ekiro kya mwendai ky'omwezi ogwo kuturuka bwaigoro bunu mwekomye Sabato zanyu.”
Ekiro kikuru ky'ensisira
(Orub 29:12-40)
33Omukama agambira Musa ati, 34“Ogambire Abaisiraeli oti, Aha kiro kya ikumi na bitanu by'omwezi ogu gwa mushanju kiro kikuru ky'Omukama ky'ensisira. Kitware ebiro mushanju. 35Aha kiro kya mbere habeho enteko ntakatifu; mutalikora mulimo gwa maani. 36Ebiro mushanju muhongere Omukama ebihongo by'okwokesa omuliro. Aha kiro kya munana mushube mugire enteko ntakatifu, mara muhongere Omukama ekihongo ky'okwokesa omuliro. Kiro ky'enteko ntakatifu, mutalikora mulimo gwa kachwazikano.”
37“Ebi nibyo biro bikuru by'Omukama ebitairweho ebyo muraranga kabuba bushango bw'enteko ntakatifu bw'okuhongera Omukama ebihongo by'okwokesa omuliro, n'ebihongo by'emyaka, ebitambo n'ebihongo by'okunywa, buli kimoi aha kiro kyakyo; 38Sabato z'Omukama zitabulimu, n'egabo zanyu zitabulimu, n'ebihongo byanyu byona by'endagano bitabulimu, n'ebihongo byanyu by'obweyendezi bitabulimu, ebyo mulikugabira Omukama.”
39“Aha kiro kya ikumi na bitanu ky'omwezi gwa mushanju, orwo mulishangwa mwagesire endimiro zanyu, mwekomyega ekiro kikuru ky'Omukama ebiro mushanju. Ekiro kya mbere kibega ky'ekyosi, kumoi n'ekya munana. 40Ekiro kya mbere mukwate ebiraba by'emiti kaliza, amatagi g'emikindo, n'ag'emiti emihango, n'obuti bw'aha bwiga; mushanduke omu maisho g'Omukama Ruhanga wanyu ebiro mushanju. 41Mukyekomye okwo kili kiro kikuru ky'Omukama ky'ebiro mushanju omu mwaka. Kiragiro ky'ebiro byona omu mizarwa yanyu; mukyekomyega omu mwezi gwa mushanju. 42Abaisiraeli inywena mulimara ebiro mushanju omu nsisira, 43nirwo baijukuru banyu balimanya okwo mbatwize omu nsisira orwo mbaire nabaihire Misiri: N'inye Omukama Ruhanga wanyu.”
44Nikwo Musa yagambiire atyo Abaisiraeli ebiro bikuru by'Omukama ebitairweho.
S'ha seleccionat:
Eby'abalevita 23: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.