Eby'abalevita 22
22
Obutakatifu bw'ebihongo
1Omukama agambira Musa ati, 2“Ogambire Aroni n'abatabani beshumbe ebintu bitakatifu eby'Abaisiraeli barampongeraga, bataija bakahagaza eibara lyange elitakatifu: N'inye Omukama. 3Obagambiire oti: Wena wena omu baijukuru banyu bona omu mizarwa yanyu aliba ahagaire akagoba aha bintu bitakatifu eby'Abaisiraeli barampongeraga, omuntu ogwo alilekelera kimoi aha alutare: N'inye Omukama. 4Taliho mwijukuru wa Aroni n'omoi abembire anga anyozire alilya aha byakulya bitakatifu kuhika orwo alyera. Omuntu arakwata kyona kyona ekihagaire nk'omufu anga omushaija ayashogoya, 5akakwata ekyekurura ekyakumuhagaza anga omuntu ayakumuhagaza, bube buhagare bwa ngeliki, 6omuntu arakwataga kyona kyona ekyab'eki arahagaraga kugoba bwaigoro, mara talilya bitakatifu k'atogire. 7Orwo eizoba lilitobera yayera, aho yakulya ebyakulya bitakatifu, aha rw'enshonga nk'ebi naba abisaine. 8Ekyayefera anga ekyaitwa ebikaaka atalilya. Kukilya aliba ayehagaize: N'inye Omukama. 9Aha rw'ekyo bekomye ekiragiro kyange, batakishaga bakakwatwa ntambara ekabaisa: N'inye Omukama abihindura bitakatifu.”
10“Omwizi atalilya kyakulya kitakatifu. Omufuruki wena wena ali omw'omukuhani, handiki omupakasi, atalilya kyakulya kitakatifu. 11Kyonkai k'omukuhani yakugura bugura omwiru, omwiru ogwo yakukilya; na balinya abalikuzalirwa omwomukuhani ogwo aha kyakulyakye bakulyaho. 12Kamuhara w'omukuhani yakushwerwa omunyamahanga, omwana muhara ogwo atalya aha kihongo kitakatifu. 13Kyonkai muhara w'omukuhani k'ali ntumbwa anga atambiibwe, mara taina mwana, akagaruka omwabo akaturamu nk'okwo yakaturagamu ali mwisiki, yakulya ekyakulya ky'omukuhani ishe, kyonkai atali wa ruganda rwa bakuhani atalikilyaho. 14K'omuntu yakulya aha kyakulya kitakatifu atamanyire, akishashure kyona ashube ayongereho easilimia 20 z'eiguzi lyakyo. 15Abakuhani batalihagaza bitakatifu bya Baisiraeli ebyo barahongeraga Omukama, 16nikwo kugir'oti kujubura omuntu atasaine kubilyaho. Enshonga ekyo kyakunaga omuntu ogwo omu ntambara: N'inye Omukama ahindura ebihongo ebyo kuba bitakatifu.”
17Omukama agambira Musa ati, 18“Ogambire Aroni n'abatabani n'Abaisiraeli bona oti: Orwo Omwisiraeli anga omufuruki omuli Isiraeli alileta ekihongokye kwaba kuhikya ndagano anga kihongo ky'obweyendezi, kukihongera Omukama ekihongo ky'okwokibwa, 19kwija kukundwa muhonge ekishaija ekitaina kamogo. Ebe eli numi anga empaya y'entama anga ey'embuzi. 20Mutalihonga kyona kyona ekina kamogo, aha rw'okuba ekyo timulikigira kikakundwa. 21Kandi omuntu orwo alihongera Omukama ekitambo ky'ebihongo by'emilembe kugobesheleza endagano anga ekihongo ky'obweyendezi, kirugire omu buhyo bw'ente anga bw'entaama, kwija kwikilizibwa kibe kigobire, kitaligiramu katalizi. 22Ebitunganwa bihumire anga bilemaire anga binimpwire anga bina akaho anga ekihere anga nibitondoka enshushu, mutalibihongera Mukama kubimuhongera ahali alutare kubyokesa omuliro. 23Enumi handiki omwana gw'entama ogwina orugingo rurai muno anga rugufi muno, mwakuguhongera Omukama ekihongo ky'obweyendezi. Kyonkai kakili kihongo ky'endagano ekyo tikyakutorwa. 24Ekitunganwa ekibujukire enturugunya anga zibe zatikire anga zikaratwire anga zishazire mutakihongera Mukama anga kukitambira mu nsi yanyu. 25Nangu mutalihongera Mukama Ruhanga wanyu ebyab'ebi ebigizirwe omufuruki aha rw'ekihongo ky'ekyakulya, orwo binamu akamogo, binimpwire, tibikilizibwe kubatulilira.”
26Omukama agambira Musa ati, 27“Orwo enumi anga entama anga embuzi erazarwaga, eikare na nyinayo ebiro mushanju. Kwema aha kiro kya munana k'erahongerwa Omukama ekihongo ky'okwokibwa erakundwaga, 28nyinayo yaba nte anga muagazi gw'entama, zombili mutaliziita kiro kimoi, omwana na nyinagwo. 29Kandi orwo muratambiraga Omukama ekitambo ky'esimi, mukitambe omu mitambire eyo mulishobora kukundwa. 30Kiliibwe aha kiro kyonene, mutakisigazaho kantu ak'okugoba bwankya: N'inye Omukama.”
31“Kityo mukwate emihango yange mara mugihikye: N'inye Omukama. 32Mutalihagaza ibara lyange elitakatifu, ekiliho ntinwe omu Baisiraeli: Ndi Mukama abahindura batakatifu, 33ayabaihire omu nsi ya Misiri kuba Ruhanga wanyu: N'inye Omukama.”
S'ha seleccionat:
Eby'abalevita 22: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.