Eby'abalevita 24
24
Akaliro akatarara
(Oku 27:20-21)
1Omukama agambira Musa ati, 2“Oragire Abaisiraeli bakuletere amajuta garungi ag'ezeituni zishekwire ag'etara, akaliro kabone kwikara nik'aka obutarara. 3Omu maisho g'Esanduku y'Endagano enjai y'orutimbe inw'ihema ly'Omuterano, Aroni abe niho ateka kurungi etara egyo kwema bwaigoro kuturuka bwankya omu maisho g'Omukama obutosha. Kibe kiragiro ky'eirai lyona omu mizarwa yanyu. 4Etara aziteke kurungi aha kinara ky'ezahabu enchenkure omu maisho g'Omukama obutosha.”
Ekeki aha meza y'ezahabu
5“Okwate ensano nungi ogikandemu ekeki ikumi na ibili. Buli emoi ekorwe omu kilo ibili z'ensano. 6Ekeki ezo oziteke omu njuru ibili, mukaga omu rujuru aha meza y'ezahabu enchenkure. 7Buli rujuru orutekeho hamoi n'obunuma burungi hamoi n'omukate oguhongirwe kwijukiraho ekihongo ekihongeirwe Omukama kyokesiibwe omuliro. 8Buli kiro kya Sabato Aroni aziteke kurungi omu maisho g'Omukama obutosha, omw'ibara ly'Abaisiraeli. Egi ebe ndagano y'eirai lyona. 9Zibe za Aroni n'abatabani, mara baziliire omu mwanya gutakatifu aha rwo guli mugabogwe ogutakatifu muno omu bihongo ebihongeirwe Omukama byokesiibwe omuliro. Mugabogwe gw'eirai lyona.”
Okurogota n'eiteka ly'okwehoroza
10Omwisiraeli omoi akaba aina omutabani namuzara aha Mumisirikazi. Omushaija#24:10 Omushaija Omushaija ogu niwe alikizarwa Omumisirikazi. ogwo ashangwa arugire omwe arwana n'Omwisiraeli omoi omu rusisira, Abaisiraeli bakaba baliho. 11Omu ndwano egyo agya arogota aha Mukama amukeena. Bamutwalira Musa. Nyina akaba nayetwa Shelomiti, muhara wa Dibiri, ow'oruganda rwa Dani. 12Bamuta mabusi kuhika orwo Omukama arabagambira ekyo alikwenda.
13Omukama agambira Musa ati, 14“Shohoza ogwo ankenire enjai y'orusisira. Bona abamuhuliire bamuteke emikono aha mutwe, enteko yona emuteze amabare. 15Ogambire Abaisiraeli oti, Wena wena alikeena Ruhangawe, alikwatwa entambara. 16Alirogota aha Mukama balimwita; enteko yona emuteze amabare, omwizi n'omuzarwa kumoi. Orwo alirogota aha Mukama bamwite. 17Alita omuntu aitwe. 18Alita ekitunganwa akilihe, oburora bulihwa burora bunu. 19Orwo omuntu alilemaza mutahiwe, okwo yakora abe nikwo akolerwa. 20Obuhendeke bulihwe obuhendeke, elisho lilihwe elisho, elino lilihwe elino. Okwo yalemaza omuntu nawe babe nikwo bamulemaza. 21Alita ekitunganwa akilihe; kandi alita omuntu aitwe. 22Mugire eiteka limoi likwate omwizi n'omuzarwa; aha rw'okuba n'inye Omukama Ruhanga wanyu.” 23Kityo Musa agambira Abaisiraeli ebigambo ebyo; ogwo ayabaire akenire Omukama bamutwara enjai y'orusisira, bamuteza amabare. Oku nikwo Abaisiraeli bagizire, nk'okwo Omukama yabaire ahangiire Musa.
S'ha seleccionat:
Eby'abalevita 24: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.