Obwijukiro 7
7
Eihanga ly'Omukama
(Oku 34:11-16)
1“Orwo Omukama Ruhanga wawe alikutahya omu nsi ey'olikugyamu kugilya, akabingamu amahanga gangi orwo olikutahamu: Abahiti, Abagirigashi, Abaamori, Abakanaani, Abaperizi, Abahivi n'Abayebusi, amahanga mushanju agahango mara ag'amani kukushaga, 2akabakuha okabasinga, aho obasilikize kimoi, otalikukora nabo ndagano mara otalikubagilira buganyizi. 3Otalisiigirangana nabo, kusiigira batabani babo bahara bawe, anga kushelerera batabani bawe bahara babo. 4Aha rw'okuba bakuhindura batabani bawe balekera kunfukamira, bafukamira baruhanga abandi. Aho Omukama yakubanigalira abasilikya aho honkai. 5Mbwenu mubagire muti: Murakambura ealutare zabo, mushekenyure enyomyo zabo, mukunture ahansi Ashera zabo mara mwokye n'ebishushani byabo ebibaijano.”
6“Aha rw'enshonga iwe oli ihanga litakatifu ly'Omukama Ruhanga wawe. Omukama Ruhanga wawe akakuronka omu mahanga gona omu nsi k'oba ihangalye nyabwe. 7Ti rwakuba mukaba nimushaga ihanga lindi lyona lyona omu bungi kugir'oti nikyo Omukama yabagondeize akabaronka; mukaba muli bake bwoli omu mahanga gona; 8shana akabaihisayo obushobora bungi, yabachungura omu bwiru omu mikono ya Farao omukama wa Misiri, aha rw'okubagonza. 9Aha rw'ekyo omanye okwo Omukama Ruhanga wawe niwe Ruhanga, Ruhanga omwesigwa ayekomya endagano, agilira ekisha abamugonza, bakekomya emihangoye kuhika emizarwa rukumi, 10kandi abonabonyia abamunoba bonene bonene abasilikya. Amunoba talikwija kumwesiza, aramubonabonyia wenene wenene. 11Aha rw'ekyo oyegendeleze okwate emihango, n'ebiragiro n'emigenzo ebyo ndikukuragira kir'eki.”
Omugisha gw'omuhuliro
(Obw 28:1-14)
12“K'olihulira emigenzo egi okagyekomya okagihikya, Omukama Ruhanga wawe aligobesheleza ahali iwe endagano n'ekisha ebyo yanahiliire basho okwo aligobesheleza. 13Alikugonza, akuhe omugisha mara akukanyise; abana bawe alibaha omugisha, aguhe n'eby'oliba olimire: N'ebiraba by'eitaka lyawe, emyaka yawe n'edivai, n'amajuta gawe; obuhyo bwawe bweyongere, n'obwana bw'obuhyo bw'entaama zawe bube bungi omu nsi eyo yanahiliire basho okwo aligikuha. 14Olihabwa omugisha kushaga amahanga gona. Omuli inywe talibamu mushaija anga mukazi omugumba; n'obuhyo bwawe tibuligumbara. 15Omukama alikwihyaho endwara zona; kandi talikuha kibonabonyio kya ndwara zibi eza Misiri ez'olikumanya, shana olizisindikira bona abakunoba. 16Olisilikya amahanga gona ag'Omukama Ruhanga wawe alikuha, otaligagilira buganyizi. Kandi otalifukamira baruhanga bago, ogwo gwakukubera mutego.”
17“Otalitekeleza aha mutima gwawe oti, ‘Amahanga aga gangi kunshaga, nakuganyaga ntai?’ 18Otaligatina, ekiliho oijuke eby'Omukama Ruhanga wawe yakoleire Farao na Misiri yona, 19ebibundo by'amani ebyo wayeboneire n'obubonero n'ebitangazo n'obushobora bw'amani gangi, eby'Omukama Ruhanga wawe yakwihisizeyo. Nikwo alikora atyo amahanga gona ag'olikutinai. 20Kandi alibasindikira enwa kuhika orwo abaliba basigaireho bakweshelekire balisilika. 21Otakubatina ahakuba Omukama Ruhanga wawe asingiire omuli iwe, aba muhango mara w'okutinwa. 22Amahanga aga aligaihya omu nsi egyo mpora mpora, orwo oliba notahamu tolibamaraho aho honkai, ebikaaka bitalija bikakunyilira muno. 23Alibanaga omu mikono yawe ababumbwigye, kuhika orwo balisilika. 24N'abakama babo alibanaga omu mikono yawe, bachweke omu nsi. Olibasilikya bona. 25Ebishushani bya baruhanga babo ebibaijano olibyokya n'omuliro. Otalyegomba feza anga zahabu ey'ebishushani ebyo biliba bisiigirwe. Kandi otalibitwara bitaija bikakunaga mu mutego; elyo lyakuba ihano aha Mukama Ruhanga wawe. 26Otalitahya mwawe kintu ekihagaire otalija okaraamwa nka kyonene; okinobe mara okinuge limoi limoi, enshonga kintu ekiraamano.”
S'ha seleccionat:
Obwijukiro 7: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.