Obwijukiro 6
6
Omuhango ogukuru
1“Ogu nigwo muhango, ebiragiro n'emigenzo eby'Omukama Ruhanga wanyu yampangiire kambegesa mukabikora omu nsi eyo mulikutahamu kulya. 2Mutine Omukama Ruhanga wanyu, inywe na batabani banyu na baijukuru banyu. Mukwate ebiragirobye byona n'emihangoye ebyo ndikubaragira, mubihikye ebiro byona by'oburora bwanyu, ebiro byanyu bibone kuba bingi. 3Aha rw'ekyo hulira Isiraeli, oyegendeleze obihikye obone kugira emilembe, obone kukanya muno nk'okwo Omukama Ruhanga wa bashwenkuru akuraganisize, omu nsi elikusheshekana amata n'obwoki.”
4“Hulira Isiraeli; Omukama Ruhanga waitu niwe Mukama wenkai; 5ogonze Omukama Ruhanga wawe n'omutima gwawe gwona, n'amani gawe gona. 6Ebigambo ebi ebyo ndikukuragira kir'eki bikugye aha mutima; 7obyegese abana bawe n'obwegendeleza, obifumore orwo orakashuntamaga omwawe, n'orwo orabaga nogenda omu muhanda, n'orwo orabyamaga n'orwo oraimukaga. 8Obyekome aha mukono n'omu kasoso ote nobijuka. 9Obihandike aha nti z'emilyango z'enju yawe n'aha bihigi byawe.”
Okutatira
10“Orwo Omukama Ruhanga wawe alikutahya omu nsi eyo yaraganisize bashwenkuru Aburahamu, Isaka na Yakobo okwo aligibaha, hamoi n'ebigo bihango ebirungi eby'otayombekire, 11n'amaju gaijwire ebintu birungi byona, ag'otaijwize, n'amaziba galimirwe ag'otalimire, n'endimiro z'emizabibu n'emizeituni ey'otabyaire, mara orwo olilya okaiguta, 12aho olimanya otalyebwa Mukama ayakwihire Misiri omu bwiru. 13Otine Omukama Ruhanga wawe omufukamire mara obe niwe oyenahira wenkai. 14Mutalifukamira baruhanga bandi ab'amahanga agabataine; 15aha rw'okuba Omukama Ruhanga wanyu asingiire omuli inywe ni Ruhanga omunyaibuba; k'atalija akabanigalira, akabasilikya akabamara omu nsi.”
16“Mutalilengesa Mukama Ruhanga wanyu nk'okwo mwamulengesize ahali Masa. 17Mukwate n'obwegendeleza emihangoye, n'emiku n'ebiragiro ebyo yabahangiire. 18Mumukolere ekilige mara ekirungi nirwo mulibona emilembe mukataha omu nsi nungi eyo yanahiliire baisheinywe mukagilya. 19Ensi egyo muligitahamu nimugibingamu ababisha banyu nk'okwo Omukama yaragaine.”
20“Omu biro ebilija mutabani wawe k'alikubaza ati, ‘Emiku n'ebiragiro n'emigenzo eby'Omukama Ruhanga waitu yabahangiire binai nshongaki?’ 21Omuhorore oti, ‘Tukaba tuli bairu ba Farao omuli Misiri; Omukama akatwihya Misiri n'obushobora bungi, 22akakora obubonero n'ebitangazo ebihango mara eby'amani ahali Misiri n'ahali Farao n'omutungogwe gwona tulebire. 23Akatwihyayo kutuleta omu nsi egi kugituha, eyo yanahiliire kuha batataichwe. 24Aho akaturagira kukwata emigenzo egi yona, n'okumutina tukaba nirwo twikara n'emilembe, na wenene kutulinda tukarora nk'okwo tuli kir'eki. 25Tube besigwa twegendeleze kukwata emihango egi yona, tushemeleze Omukama Ruhanga waitu nk'okwo yatuhangiire.’ ”
S'ha seleccionat:
Obwijukiro 6: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.