Obwijukiro 8
8
Ensi nungi
1“Mwegendeleze kukwata buli muhango ogwo inye ndikubaragira kir'eki nirwo inywe mulirora mukakanya, mukagya omu nsi ey'Omukama yanahire kuha baisheinywe mukagilya. 2Muraijukaga okwo Omukama Ruhanga wanyu yabahabwire omu rugendo oru rwona emyaka egi 40 omw'irungu nabatwekera ebiyengo kubalenga, amanye nimutekelezaki kandi amanye nka mwakukwete emihangoye anga chei. 3Akabafutika yabaleka mwarumwa enjara, yabalisa na manu eyo mwabaire mutalikumanya; na baisheinywe tibagimanyire, abone kubamanyisa okwo omuntu atatungwa kyakulya kyonkai; atungwa buli kigambo eky'Omukama agamba. 4Omu myaka egi 40 ebijwaro byanyu tibyabatemukiire aha mubili, n'amaguru ganyu tigazimbire. 5Ahonu mumanyire aha mutima okwo nk'okw'omuntu agorora omwanawe nikwo Omukama Ruhanga wanyu alikubagorora. 6Kityo mukwate emihangoye, mukore eby'alikwenda, mara mumutine. 7Nabatahya omu nsi nungi, ensi ey'obwiga bw'amaizi, ey'enchuro zilikutabuka omu mpanga n'omu mabanga, 8ey'engano n'eshayiri, ey'emizabibu n'emitini n'emikomamanga, ensi ey'emizeituni n'obwoki, 9mbali mulilya ekyakulya kitabuzire, mbali mutaliburwa kantu, ensi ey'amabare g'ekyoma, ey'amabanga ago mulishokoramu omulinga. 10Mulilya mwigute, mara musingize Omukama Ruhanga wanyu aha rw'ensi nungi ey'abahaire.”
Omukama mutalimwebwa
11“Mwelinde mutalyebwa Mukama Ruhanga wanyu. Mukwate emihangoye, n'ebiragirobye n'emigenzoye ebyo ndikubaragira kir'eki. 12Orwo muraba mwaliire mwaigusire, mwayombekire amaju garungi mwagatwiremu, 13orwo amahyo ganyu g'ente n'entama galyeyongera, n'efeza n'ezahabu zanyu zikeyongera, n'ebyo mwinabyo byona bikeyongera, 14mutalihindura mitima mukebwa Omukama Ruhanga wanyu ayabaihire Misiri omu bwiru, 15ayabahabwire omw'irungu lihango mara ly'okutinisa, ely'enjoka z'omuliro n'obuminai n'ensi eyomire eyabaire etaina maizi, ayakwihire amaizi omu rwazi rw'enkangabuye, 16ayabalisize manu omw'irungu eyo baisheinywe batamanyaga, abone kubafutika n'okubalenga, ahanyuma abakolere ebirungi. 17Mulimanya mutalija mukatekeleza muti, ‘Obushobora bwaitu n'amani gaitu nibyo bitubonesize eitunga eli.’ 18Muraijukaga Omukama Ruhanga wanyu, aha rw'okuba niwe abaha obushobora bw'okubona eitunga; nirwo aliikara agumire aha ndaganoye eyo yanahiliire baisheinywe, nk'okwo bikyali na kir'eki. 19Kamulyebwa Omukama Ruhanga wanyu, mukekwata baruhanga abandi mukabafukamira, kir'eki nimbatatira bwoli bwoli okwo obuzira kulengeshanyia mulisilika. 20Kamuliba mutahuliire eby'Omukama Ruhanga wanyu alikubagambira, mulisilika nk'amahanga ag'alikusilikya orwo olikutaha omu nsi yago.”
S'ha seleccionat:
Obwijukiro 8: RHAY01
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
Ruhaya DC Bible © Bible Society of Tanzania, 2001.