Zacarias 5
5
Ja libro wa'n jujpeli
1Cho jlika mas cha'an ja jsati, ti kila wa'n jujpel jun libro'a. 2Jaxa anjeli, ti sjob'o ki'a:
—¿Zacarias, jasunk'a waxa wila?
Ti kala ja ke'n:
—Wax kila jun libro wa'n jujpel. Ja libro jawi, ay yi'oj lajune metro jas najtili sok jo'e metro ja sati.
3Ja'yuj, ti yala kab' ja anjeli:
—Ja libro iti, ja wa sk'ana yal ja jas jel kistal, jel xa mojan oj ko' sb'a spetsanil ja lu'umi. B'a jun lado ja ti ts'ijb'anub'al ja wokol oj ko' sb'aj ja tantik elk'anum jumasa. Jaxa b'a otro lado ja wax yala ja wokol oj ko sb'aj ja tantik le'a ab'al jumasa, ja ma'tik wax yi'aje majan ja jb'i'il b'a oj lo'lanuke'i. 4Ja libro jawi, ti oj waj och b'a snaje ja tantik elk'anum sok ja tantik le'a ab'al jumasa, ti oj ajyuk tiw asta man oj sch'ak sna'jel. Ja Dyos it jel ja yipi, wax yala jach'ni oj sk'u'l merana.
Ja smalo'ili
5Tsa'an el ja anjeli, ti yala kab'a:
—Na'a lek ja jas wantox ch'ak sje' sb'aji.
6—Ti job'o ja ke'n— ¿Jasun wa sk'ana yal b'a?
Jaxa anjeli, ti yal kab'a:
—Ja iti, wa sk'ana yal jun sb'isol. Sok ja sb'isol jawi, ja sb'isata sok ja Dyos spetsanil ja smalo'il ja niwan chonab' iti.
7Ja sb'isol jawi, ja smajkili mak'ub'al tak'in. Jaxa anjeli ti slika ja smajkili, ti b'ob' kil ti kulan ek' jun ixuk ja b'a yojoli. 8Ja ixuk jawi, sle'a modo oj eluk, jaxa anjeli sjutb'inko b'a yojol ti cho smaka kan ja sti' ja b'isol jawi. Ja'yuj ti yala kab'a: —Ja iti, ja wa sk'ana yal ja smalo'il jumasa—.
9Pilan majke ti cho jk'ela mas cha'ana, ti kila chab' ixuk ay swech'e jastal ijkin. Ja ixuke jawi, jujpiye yi'aje ja sb'isoli. 10Jaxa ke'n ti job'oyi ja anjeli:
—¿B'a oj yi'e ja sb'isol b'a?
11Jaxa anjeli ti yala kab'a:
—Ti oj yi'e och b'a Babilonia. Ja b'a niwan chonab' jawi, oj sk'u'luke jun snajtsil tsomjel, b'a sat ja altari, ti oj ya'we ja sb'isol jawi.
S'ha seleccionat:
Zacarias 5: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021