Zacarias 6
6
Ja chane karro jumasa sb'a tiro'aneli
1Cho jk'ela pilan majke mas cha'an, ti kila chane karro sb'a tiro'aela. Ja karro jumasa jawi, ti elye jan b'a snalan b'a chab' yax k'ul toj tak'in bronce. 2Ja sb'ajtanil karro chakal kawu jumasa joko b'al yuj, ja b'a schab'il karro k'ik'il kawu jumasa joko b'al yuj, 3b'a yoxil karro sakal kawu jumasa joko b'al yuj, jaxa b'a schanil karro toj pinto ja kawu jumasa joko b'al yuji. 4Ja ke'n ti job'o yi ja anjeli:
—¿Jaxa karro jumasa iti, jasun wa sk'ana yal b'a?
5Jaxa anjeli, ti yala kab' jasun wa sk'ana yala:
—Ja karro jumasa iti, ja' chane yespiritu ja Dyos b'a schanil schikin ja satk'inali. Spetsanil k'ak'u ye'nani wax ya'teltaye ja Dyosi, jaxa ya'n wax elye b'a oj sb'ejtese spetsanil ja lu'um iti. 6Ja karro jumasa jokan yuj ja k'ik'il kawu jumasa ti oj wajuke b'a k'e'el k'inal, jaxa sakal kawu jumasa ti oj wajuke b'a spunto wax och ja k'ak'u, jaxa kawu pinto jumasa ti oj wajuke b'a ko'el k'inal.
7Ja kawu pinto jumasa jel sgusto'e oj sb'ejtese sutanal ja lu'um k'inali, ja'yuj ti alji yabye yuj ja anjeli:
—Ka'axik, kax b'ejtesik spetsanil ja lu'umi—
Jaxa kawu jumasa jach'ni sk'u'lane'a. 8Ja'yuj ja anjeli, ti yala kab'a:
—Ja k'ik'il kawu jumasa ti oj wajuke b'a niwan chonab' b'a k'e'el k'inal b'a oj waj sk'u'luke ja jas naka chapan kuji.
Ja Josueji a'ji yi jun skorona
9Jaxa Dyosi, cho yala kab' ja lo'il iti:
10-11—Ja Heldai, ja Tobias sok ja Jedaiasi, ch'ak i'juke moso'il b'a Babilonia, jaxa juts'in kumxiye'ta. Kax k'umane' ala yabye ya'we a wi oro sok sakal tak'in. Ja oro sok ja sakal tak'in jawi, ja mismo k'ak'u oj a'juk a wi'i, kax k'uman ja Josias yunin ja Sofonias b'a oj sk'u'luk a wi juna korona. Ja korona jawi, ja' oj wa slap ja Josue yunin ja Josadaki, yujni ye'n mas niwan ja ya'tel yuj ja pagre jumasa'a. Yaj nix wa slapi, 12-13ti'xa wala yab' jastal ita:
Jach' wax yala jastal it ja Dyos it jel ja yipi:
ke'n oj jtsa' jun winik sb'a il
b'a oj stojb'es ki ja snajtsil ja jtsomjeli,
ja winik jawi, oj kal —Ajk'ach—.
Ja ye'n jach' oj slap ja sk'u' jastal ja mandaranumi,
sok ti oj ayuk b'a lugar wax ajyi ja mandaranumi.
Oj spil sb'aje ja lugar jaw sok jun pagre,
ja schawanile'i, jel lek oj yil sb'aje.
14—Tsa'an wax k'ana oj ja lap ja korona jaw b'a snajtsil ja jtsomjeli. B'a jach' mi oj ch'ay sk'ujole ja jas kala ja Heldai, ja Tobiasi, ja Jedaias sok ja Josiasi.
15—Ta yuj k'a oj ja k'u'ukex ja kab'al ja we'nlexi, ay ma' b'a najtil lugar oj jak' b'a oj skoltayex stojb'esjel ja snajtsil ja jtsomjeli. Yaj nix waj k'ot smeranil ja jastal jawi, ti oj na'ex ke'n ja Dyos it jel ja kipi, jeka ja Zacarias b'a waj yala wabyex ja lo'il iti.
S'ha seleccionat:
Zacarias 6: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021