Zacarias 4
4
Ja kandelerio toj oro sok ja chab' olivo
1Ja ora jaw ja anjel it wan lo'il jmoki, och mas mojan jmok b'a oj syujkeson. 2Ti yala kab'a:
—Zacaria, ala kab' jasunk'a waxa wila.
Jaxa ke'n ti kala'a:
—Wax kila jun kandelerio toj oro. Ja b'a mas cha'an yuj ja kandelerio jawi, ay yi'oj juke yajlub' jumasa; ja stubo'il jumasa b'a wax ek' ja yaceite'ili, ja wa sta'a sb'aj ja sni' jumasa, jach' ay jastal sek' b'a cha'an yojol. 3B'a kada sts'e'el ja kandelerio ay jujune olivo.
4Jayuj ti cho job'oyi ja ke'n:
—¿Kajwal, spetsanil ja iti, jasunk'a wa sk'ana yal b'a?
5Ti yala kab' ja anjeli:
—¿Mixa na'a jasun wa sk'ana yale?
Ja ke'n ti kala yab' yujni mix na'a a, 6Ja'yuj, ja anjeli ti yala kab'a:
—Ja Dyosi, wa'n sjekjel yaljel yab' jastal it ja Zorobabeli:
Zorobabel,
a'nima jeluk niwan ja wa wa'teli,
mi oj makunuk a wuj jitsan soldado;
kechan ja oj makunuk a wuj ja kespirutu.
Ke'non ja Dyos it jel ja kipi,
ja smeranili, wax kala yujni jach' oj k'u'luka.
7Mi jas yi'oj altiro ta yuj k'a ja wa kontra jumasa
ja swinkil jumasa ja Babilonia yuj ja jel a'aye'i,
ja we'n oj ni ch'ak a ch'ak sna'jele'a.
Jaxa yajnix wa ochuk ja ton it mi kwalkyera'uk
b'a oj k'e tojb'esxuk ja snajtsil ja jtsomjeli,
ja jchonab'ili, oj awanuk yuj ja sgusto'e'i:
—Ja Dyosi jel syajta ja Jerusaleni—
8Ja Dyosi, cho yala kab' ja lo'il iti:
9-10—Ja we'nlex jchonab'il israelenio,
oj ja wil'ex ja Zorobabel ye'n oj stojyi ja k'u'luj na'itsi.
Ye'n oj ya ochuk ja skujlayub' ja snajtsil ja jtsomjeli,
ojxa ni k'e tojb'esxuka.
Ja wa wa'tel ja juts'in jelto ko'el,
pero ja yaj nix waj ch'akuki,
—Asta ja ma mini t'un wax k'u'aji yuj ja ye'n
jel oj gusto'axuke—
—Jachuk oj sna'e ke'n ja Dyos yujone'i,
ma jekji yuj ja Zacarias
b'a oj waj yal spetsanil ja iti.
Ja juke alujb'i ja wa sk'ana yal ja jsat jumasa,
porke ke'nani wax k'ela spetsanil ja lu'uma—.
11-12Jaxa ke'n ti job'oyi ja anjeli:
—¿Jasun wa sk'ana yal ja olivo jumasa it tey b'a sts'e'el ja kandelerio b'a? ¿Sok jasun wa sk'ana yal ja chab' sk'ab' olivo? ¿Jasyuj ja sta' oj sb'aj ja chab' tubo it toj oro b'a wax ek' aceite b'a?
13Jaxa anjeli sjob'o ki ta yujni mix na'a jasun wa sk'ana yala, komo kala yujni mix na'a, 14Ja'yuj ti yala kab' jasun wa sk'ana yala:
—Ja chab' olivo jumasa iti ja wa slaja ja Zorobabel sok ja Josueji. Ja Dyos b'a spetsanil ja lu'umi, stsa'a b'a oj a'teltajuk yuj.
S'ha seleccionat:
Zacarias 4: YABD
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© Sociedad Bíblica de México 2021