Luke 4
4
Yenguike-a lono Jisü Ghuju keu
1Jisü ye Aghungú Kimthe no chhitoi shi no Jordan qhive püzü Alhou Ghungú no pa sasü yenguike-a lo wuve, 2tile tüghami no atsala lhobidi pa ghujue.#4:2 Momu thejue. Tipau tsalà dolo pa ye kiumu chu-shomove, ikehu atsala tipau do kishekhave kelo pa ye müzüthive.
3Tüghami no pa vilo pi, “Nono Alhou nu shi aghí aye atu hipau vilo asho ilhovelo ipi azah tsülo.”
4Jisü no khochile, “Hitoi yèpüani: ‘Timi ye achuqupu shou likhi bepe xülumo nani.’#4:4 Zaki 8:3”
5Tüghami hu no pa sasü chuqumghai keu-a lakhi lo saiku no anhekütsükhavi lono ayeghi lo kükaphuqo kümtsü pa piye. 6Eno tüghami no Jisü vilo pi, “Ino panoqo kükagha eno qhivütsüni akeu kümtsü otsüní; hi kümtsü itsüpe püani eno ino khukhumu tsüní shikeu tsüluve nani ke. 7Tsalá nono itsaqi imülá aye hi kümtsü ow shive nani.”
8Jisü no khochile: “Ishi yèpüani: ‘Ampeu O Lhou likhi mülá lo eno pa likhi huthulo.’#4:8 Zaki 6:13”
9Tüghami no Jerusalem lo Jisü sawu no pa pelo achineki kütsüqa lo pa pelo tile puthugho pe. Pa no ishi pi, “Nono Alhou nu shi aghí aye, hile no ilhe iqivelo.” 10Kughengu ishi yèpüani:
“ ‘Pa no paw kungumiqo pelo otucho
eno jukuto khe penike azah tsü nani;
11tishianguno opukhu pelo atu shoumu püsüpuku pemo no,
panongu no panongu u lono okhapeluve nani.’#4:11 Leshe 91:11,12”
12Jisü no khochile, “Ishi pipüani: ‘No ye Ampeu O Lhou theju kevilo.’#4:12 Zaki 6:16”
13Kughou tüghami no ghuju keu hi kümtsü tave keno, pa ye adokivi kütau huqhe ghi Jisü qhive no wuve.
Nazareth lo Jisü Milive
14Jisü ye Aghungú küká lono Galilee lo ideighi, ikelo aphughi sükümxa kümtsü lo pa ghili pikülha wove. 15Pa no panonguw Synagogqo lo kütsü kelo timi kümtsü no pa sheqhe ae.
16Pa no pa saputhukeu-a Nazareth lo wu, eno pa no shi chekeu kukhuaye kiqi lono pa ye Sabbath tsalà lo Synagog lo wu. Pa no Kuchoyesü phisü niye puthugho, 17tile Isaiah tungkupuw liküküzü kaku ikhipe pa tsü. Pa no kaku xakho kelo ishi yèpüaghi keu ithulu:
18“Ampeu Ghungú ishou ani,
kughengu atsakiviu pe kumlhomi lau asheshu peniye
pa no ni nukishelu ke.
Akughumi lau khakiqhi kütüghü peniye
eno anhethi kighichemi pelo ithulu kithe peniye,
neda-qoda püa kemi phepuwu peniye
19eno Ampeu no paw timi xalu nikeu mipe shukiphe shipe niye ipuwu ke.”#4:19 Isa 61:1,2
20Tishive no pa no kaku liküzüve no aghinikishiu tsü chileve no iqave. Synagog lo akemi kümtsü no anhethi süküqümo no pa ju ae. 21Pa no panongu vilo pithu: “Nongu no chilu akeu vechewo ishí no Kuchoyesü hipau shikupuvae.”
22Timi kümtsü no akishé pa tsü eno panongu ye pa kichí lono kimiyekini tsà pikeqo chilu no akichiqhive. Panongu no hitoi iniju: “Hiye Joseph nopu ke kumo keshea?”
23Jisü no panongu vilo pi, “Kuchou no nongu ye ivilo ahole hipau tsatho pi nani: ‘Shikipivimi, olikhi oshipivilo!’ Eno nongu no ivilo ishi pi nani, ‘Nono Capernaum lo mülà keu ningu no chilu keu toi opunugha hilehi ghí tipaqo shilo.’ ”
24Jisü no kibe ghi pi, “Ino kuchou tsà nongu vilo pìní, tungkupumi khiumu pano punugha lo ikhilu chemoe. 25Ino mütsüqhei nongu vilo piakeu ye Elijah ghuloki lo kughou Israel lo ampe küthü tüxa ghumove no ayeghiqha kümtsü lo püqümiye ighi keno tilehi chimemi kutomo ache. 26Tishimu Elijah ye panongu lakhi laumu puwumoe, ikemu Sidon yeghi lo Zarephath phu lo chimemi lakhi lau puwue. 27Eno tungkupu Elisha ghuloki lo Israel lo apügha kupumi kutomo ache, ikemu Syriami Naaman nguno alau ye kütami lakhimu shipivi tsümoe.”#4:27 2Küka 5:1‑24
28Kughou Synagog lo akemiqo no hi chilu keno panongu ye ighono muqhumüzaive. 29Panongu no puthughove no pa sasü mishiphu lono khalau saipeve, eno pa pesü mishiphu shipuku keu toghi nhekikhi lo kulusüve nike ghenguno saiku. 30Ikemu pa ye aqokitikhi mütá dolo no shoxüsü pa là lo chesü wuve.
Jisü no Mithekumo Ghungú Haphe
31Tisheno pa ye Galilee lo mishiphu Capernaum lo iqive, eno Sabbath tsalà lo timiqo kütsüe. 32Panongu ye pa kükütsü iní pe akümzave kughengu pa tsà lo kükagha ake.
33Synagog lo timi lakhi mithekumo ghungú tüghami hu no tsüghape ae. Pa no ighamuku vekipighi pi, 34“Wuvelo! Nazareth nó ghami#4:34 Mt 2:23 Jisü, no ye ningu lau no kiu avehupu shi ani kea? No ye ningu kütsave niye ighi ani keshea? No ye khuu keno ino ithi ani—no ye Alhouʼw Akimtheu hu ke!”
35Ikemu Jisü no müghachhoi pa lomipi: “Inaqhoivelo! Pa lau no ipeghivelo.” Tishi kemtsa tüghaküsa no panongu kümtsü zülo no timi hu tukuluqhive püzü kiumu ghüza keu shimo no pa lau no ipeve.
36Timi kümtsü no akümzave no panongu lakhi no lakhi vilo ishi pi, “Hiye kiutoi keu tsà kea! Kükagha eno aküka lono pa no mithekumo ghungúqo vilo azah tsü kelo timi lau no ipeghivae!” 37Ikelo tipau sükümxa qha kümtsü lo pa ghili pikülha wove.
Jisü no Timi Kutomo Shipivi
38Jisü no Synagog qhive no Simon ki lo wu. Tile Simon pani ye muqhomüzai aghamiki aghí eno panongu no Jisü vilo li kuphu tsülo ipi. 39Ike pa no li phivilo itsaqi no aghakimiki lomipi kelo ye li phi lono aghakimiki kühave. Li no paikhavi ithughive no achuqupu kutò pe panongu tsüe.
40Avelau shive kelo, timiqo no Jisü lau aküsǜ jeli no sǜ akemi kümtsü saighi, eno Jisü no pa u pesü panongu lakhi-khi shou be ghi panongu shipivi tsüe. 41Tinguno alau tüghaküsaqo no timi kutomo phi lono ipeghino ishi igha, “No ye Alhou Nu hu ke!” Ikemu pa no panongu lomipi eno panongu pelo atsa pipemo, kughengu Jisü ye Messiah kepi panongu no ithi ake.
42Inaqhe vü ipeghive kelo, Jisü ye yenguikeu-a lo wuve. Timiqo ye pa phujua eno kughou panongu no Jisü no ngo akeu-a lo ighi keno panongu ye pa pelo panongu qhive pemo niye pükapütsae. 43Ikemu pa no pi, “Ni ye mishiphu kütauqo lo ghí Alhou kükaqha tsakiviu pikülha moayesa ani, kughengu hipau ghenguno ipuwu ke.” 44Tisheno pa ye Judea lo Synagogqo lo kütsü auve.
S'ha seleccionat:
Luke 4: STB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.