Luke 3
3
John Baptiz Kishiu no Alaghi Ghepe Qhitsü
1Tiberius Caesar no ka keu mipe chighí apunguu shi akelo, Pontius Pilate no Judea lo Angh shia, Herod no Galilee lo ayekipeu shia, pa thiküzüu Philip no Iturea ngò Traconitis lo eno Lysanias no Abilene lo ayekipeu shi akelo, 2Annas ngò Caiaphas pama no achinetou shi ake ghuloki lo yenguike-a lono Alhou tsà Zechariah nu John lau ighi. 3Pa no Jordan ghoki sükümxa kümtsü lo wu eno amlo pebideve püzü axiné qhikütsü ghenguno baptiz shive moayesa keu kütsüe. 4Isaiah kaku lo tungkupuu tsà ishi yèpüani:
“Yenguike-a lono asütsa lakhi ighamuku anie,
‘Ampeu ghenguno alaghi ghepe qhitsülo,
pa no wu kepu laghi müzüchoi shitsülo.
5Akhilaqa kümtsü shepichhive nani,
naghuto eno atoghi kümtsü külaqave nani.
Ihoghülai keu laghi kümtsü shikümzüve nani,
kukokilei keu laghi hu ye jokumduve nani.
6Eno timi kümtsü no Alhouʼw xakulu ithulu nani.’ ”#3:6 Isa 40:3‑5
7John no aqokitikhi pa lau baptiz shitsü peniye ighi keqo vilo pi, “Nongu apighitiqo! Khuu no nongu pelo Alhou loghukighide chekeu lono polu penike pikichive kea? 8Amlo pebideve keu toi xüpe piyelo. Eno nongu ye, nolikhi no vilo, ‘Ningu ye Abraham tilimiqo ke,’ ipi pilu nani küghashi kümsü kevilo. Ino nongu vilo pìní, Alhou ye atu hipaqo pesü Abraham ghenguno anuli kughulhopheve tsülu nanie. 9Amghü ye asüboqo kuhu phivilo kutò pe ani, eno asübo khijehi no axathi kivi pithímoni keno yeqhive no ami lo vesüve nani.”
10Aqokitikhi no iniju, “Tishiaye ningu ye kiu shimoayesa kea?”
11John no khochile, “Timi khukhumu aphiküzü kini aghí aye khuu no küha keno pa sasü küsaje moayesa, eno timi khuu no achuqupu aghíni keno pa ghí titoi shimoayesa.”
12Asüqha küqhami ghí baptiz shitsü peniye ighi eno panongu no iniju, “Akükütsüu, ningu ye kiu shilopi kea?”
13Pa no panongu vilo pi, “Nongu pelo asüqha qhà peniye bethatsü keu nguno alau ye qhà kevilo.”
14Tile ghüshimi khami no pa vilo iniju, “Eno ningu ye kiu shilopi kea?”
John no khochile, “Pisa süxalu kevilo momu akimiki lono kütami nguku keu shi kevilo, ojume ithulu achekeu lo aghakiqishi alo!”
15Timiqo ye khekulhoshi khea eno panongu mulo lono John no Messiah shi aghí nani kepi kümsükimghei ae. 16John no panongu kümtsü khochile, “Ino azü lono nongu baptiz shitsü ani. Ikemu khuu ishelo cheni keno pa ye inguno akumtou ke, ni ye pa pukhukuqho kütsügha kighimu kuqho nike aküzüpu kumoe. Pa no Aghungú Kimthe eno ami pesü nongu baptiz shitsü nani. 17Pa no pa niqa shikimthe no amuu kütashi fuleve püzü pa thì pekütsü pesü ale lo sǘ nike ghenguno pa u lo pa thigha pesü ani, ikemu amuu ye khilemu ghapinhe müla keu mi lono pitive nani.” 18John no atsa kütau kutomo pesü timiqo hakutho eno atsakiviu pesü panongu lau asheshue.
19Ikemu Herod ayekipeu no pa thiküzüu nipu Herodias sasü külakupu shive eno kütau akümlà lhoküsa jeliqo ghenguno John no pa lomipiqhi kelo, 20Herod no hipaqo kümtsü kihiküqha no: pa no John akughuki lo khathave.
Jisü Baptiz Shikeu eno Paw Laghaphi
21Kughou timi kümtsü baptiz shive keno, Jisü ghí baptiz shilue. Pa no akighini shi akelo, kungugha khaqhie, 22eno Aghungú Kimthe ampi no miqhedu lakhi toi ighino pa shou iku ngove. Eno kungugha lono asütsa lakhi ighi: “No ye ino qhuivü chekeu Nu ke; oshou imlokiqi achenie.”
23Kughou Jisü no pa kümlà huthu keno, pa ye apunu mipe shighi qhalo shi ake. Timiqo ye ishi kümsü ae, pa ye Joseph nu,
Heli nu, 24Matthat nu,
Levi nu, Melki nu,
Jannai nu, Joseph nu,
25Mattathias nu, Amos nu,
Nahum nu, Esli nu,
Naggai nu, 26Maath nu,
Mattathias nu, Semein nu,
Josek nu, Joda nu,
27Joanan nu, Rhesa nu,
Zerubbabel nu, Shealtiel nu,
Neri nu, 28Melki nu,
Addi nu, Cosam nu,
Elmadam nu, Er nu,
29Joshua nu, Eliezer nu,
Jorim nu, Matthat nu,
Levi nu, 30Simeon nu,
Judah nu, Joseph nu,
Jonam nu, Eliakim nu,
31Melea nu, Menna nu,
Mattatha nu, Nathan nu,
David nu, 32Jesse nu,
Obed nu, Boaz nu,
Salmon nu, Nahshon nu,
33Amminadab nu, Ram nu,
Hezron nu, Perez nu,
Judah nu, 34Jacob nu,
Isaac nu, Abraham nu,
Terah nu, Nahor nu,
35Serug nu, Reu nu,
Peleg nu, Eber nu,
Shelah nu, 36Cainan nu,
Arphaxad nu, Shem nu,
Noah nu, Lamech nu,
37Methuselah nu, Enoch nu,
Jared nu, Mahalalel nu,
Kenan nu, 38Enosh nu,
Seth nu, Adam nu,
ti Alhou nu.
S'ha seleccionat:
Luke 3: STB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.