Luke 5
5
Jisü no Pa Khopemi Atüghimiqo Kulù
1Ghulo lakhi Jisü no Gennesaret#5:1 Hiye Galilee züghi ke. yizükucho mükü lo puthugho akelo timi kutomo no pa sümxa pe ngo no Alhou tsà inia. 2Ikelo akhakükhami no ayizükucho lo ashuka kini qhive no akhame qhu aghí keu pa no ithulu. 3Pa no ashuka lakhi lo ilo, tiye Simon shuka shi aghí, ikehu pa vilo ashuka amükü lono kitila tuhasülo pi. Tisheno pa no ashuka lo iqa eno timiqo kütsüe.
4Kughou pa no atsa pitave keno, pa no Simon vilo pi, “Azü kuthò küdau ilolo eno akha velu kepushi akhame pesü aqhou vesülo.”
5Simon no khochile, “Ampeu, ningu ye puthotsü imé veju akemu lakhimu vemlae. Ikemu nono piakeu ghenguno ino akhame pesü aqhou vesüjunie.”
6Kughou panongu no tishiju keno akha kütsasa ghokütsülu eno tishi keu lono panonguw akhame hu ye ixü ipecheghive. 7Ikehu panongu no pano lojimi ashuka kütau lo akemiqo pelo ighino panongu kuphu penike ku, panongu no ighi eno ashuka kinikujo lo akha chhitoi sǘ no chilive kehu ashuka ye azü alou yimive cheghí.
8Kughou Simon Peter no hi ithulu keno, pa no Jisü pukhuphi lo qhoqhünhe no pi, “Ilau no wuvelo, Ampeu; ni ye axinemi lakhi ke.” 9Kughengu pa eno pa küsàmi kümtsü no panongu no akha velu keu lo akichiqhive, 10eno titoi Zebedee nu James ngò John, Simon lojimi pama ghí akichiqhive.
Tipathiu Jisü no Simon vilo pi, “Müsà kevilo; hinguno hilau ye no ye timi kükhami shini ake.” 11Ike panongu no ashukaqo azüghi mükü lo tuphe pe qhive eno thowkha kümtsü qhive no Jisü papesü wuve.
Jisü no Apügha Kupumi Shipivi
12Kughou Jisü no mishiphu lakhi lo akeno, timi lakhi apügha no aphi chhitoi xapusü ighi. Kughou pa no Jisü ithulu keno pa zülo agi pishiqholuve no Jisü vilo qhüiniju ghi pi, “Ampeu, nono pulo aghí aye no ye ishipivive tsülu nanie.”
13Jisü no pa u chhope timi tipau bu no ishi pi, “Ni ye pulo anie, viluvelo.” Paikhavi lono apügha kupumi phi lono apügha kühave.
14Tithiu Jisü no azah pa tsü, “Khuu vilomu pikevilo, ikemu no ye achinemiqo lau kimichikütsü shi wu no panongu piyelo eno Moses no azah tsüpüa keu toi oshikimtheve keu kümlagho pesü mülá lo.”#5:14 Achine 14:2‑32
15Tishimu Jisü ghili alau shi veküpha wove, ikehu timi kutomo no pa tsà iní niye eno küsükini lono panongu shipivitsü penike pa lau ighi. 16Ikemu Jisü ye ado-ado lo panoqo lau no wuve no yenguikeu-a lo akighini shiche.
Jisü no Aphimpi Ithamlave kemi Shipivi
17Ghulo lakhi Jisü no kütsüa, eno Phariseemi ngò ayeza shikükamiqo ghí tile iqa ae. Panongu ye Galilee, Judea eno Jerusalem lo aphuqo kümtsü lono ighi. Eno küsükinimi shipivi kulupu Alhou küká Jisü gholo ae. 18Timi khami no ayephu lono aphimpi ithamlave kemi lakhi xapu ighi eno panongu no pa pesü Jisü zülo qhitsü nike aki alou ilo niye pükapütsa ae. 19Kughou panongu no timi aqokitikhi ghenguno ilolu kepu là phumlave keno panongu no akimole lo iku eno amole kiyeve no azüa lono timi aqokitikhi mütá dolo no Jisü zülo pa kighiti piqi.
20Kughou Jisü no panongu küpülü ithulu keno pa no ishi pi, “Aküsàu, oxinéqo qhivetsüae.”
21Ayeza kükütsümi eno Phariseemiqo no hitoi kiqi kümsüju ae, “Timi hipau ye khuu keno Alhou thaigha keu tsà piani kea? Alhou likhi no kumo aye khuu no axiné pevetsülu nani kea?”
22Jisü ye panongu no kiu kümsü akeno ithive püzü iniju, “Nongu ye kushiye nongu mulo lo thime hipaqo kümsü ani kea? 23Khikhiu no akümláu kea: ‘Oxinéqo qhivetsüae,’ ipikeu no keo, ‘Ithuve no alà chelo,’ ipikeu no kea? 24Ikemu ino nongu pelo ithi penishi akeu ye Timi Nu ye ayeghi lo axinéqo qhivetsülu kepu kükagha anie.” Ike pa no aphimpi ithamlave keu vilo pi, “Ino ovilo piani, ithulo, ozüa ikhipesü aki lo wovelo.” 25Tipa mütsa no aküsǜu hu no timi kümtsü zülo no ilheithughi no pa no qhazü achekeu phì ikhiluve püzü Alhou sheqhe ghi aki lo wove. 26Timi kümtsü no akichiqhive eno Alhou akishé tsü. Panongu ye thüghüive eno ishi pi, “Ningu ye ishí akümza kepu kümlàqo ithuluvae.”
Jisü no Levi Kulù eno Axinemiqo Gholo Chu-sho
27Hipathiu, Jisü no khalau ipe no zame küqhami lakhi Levi ipikeu no paw zame küqhauʼw hiyam lo iqa aghí keu ithulu. Jisü no pa vilo pi, “Ipapelo,” 28eno Levi no ithughive no thowkha kümtsü qhive püzü Jisü pape wuve.
29Tithiu Levi no pa ki lo Jisü ghenguno aghulhu kijè lakhi kutò tsü eno tilehi zame küqhami kutomo eno kütamiqo panongu gholo chu-sho ae. 30Ikemu Phariseemi eno panongu muqo gholo ayeza kükütsümi akemiqo no Jisü khopemiqo lau nhenheshi pi, “Nongu ye kushiye zame küqhami eno axinemiqo gholo chu-sho ani kea?”
31Jisü no panongu khochile, “Küsükinimi no kumo aye ashi-ajì vi akemi ye shikipivimi avehupu shichemoe. 32Ni ye achipiumikuchomiqo ku niye ighimoe, ikemu axinemiqo pelo xaideghi peniye ighike.”
Jisü Vilo Kümvü keu Ghili Iniju
33Panongu no Jisü vilo pi, “John khopemiqo ye ado akichiù lono kümvü eno akighini shi acheni, titoi Pharisee khopemiqo ghí tishi acheni, ikemu okhopemiqo ye chu-sho aghí keu likhie.”
34Jisü no khochile, “Nongu ye külapuu küsàmiqo pelo külapuu gholo ngo aphi lono kümvü peni keshea? 35Ikemu külapuu ye panoqo gholo no ikhisüwuve kepu do ighi nani; tipau tsalaqo lono panongu no kümvü nani.”
36Jisü no panongu vilo hipau holetsa pi: “Khunomu aphì akithé lono atachu süxü pe aphiküzü aqa lo pukhoda puku chemoe. Tishiaye aphiküzü aqau huno akitheu süxüve kepu shive nani, eno aphì akithé tsüghüda keu hu ye aphiküzü aqa lo aküzüqhiyi ithulumo nani. 37Eno khunomu atsaizü akithé pesü ashiyikohughi aqaqo lo lesü chemoe. Panongu no tishiaye ashiyiko müpakhove no atsaizü peleve nani eno ashiyikohughiqo ye kütsave nani. 38Moe, atsaizü akithé süwo ashiyikohughi akitheqo lo sǘ moayesa. 39Eno khunomu atsaizü aqa shove kethiu ye akithé shonishi chemoe, kughengu ishi pi cheni, ‘Atsaizü ye aqa shive keu pavie.’ ”
S'ha seleccionat:
Luke 5: STB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.