Luke 2
2
Jisü Punú
1Tipa ghuloki lo Rome yeghiqha kümtsü lo timi lhoxü kihikütsü penike Caesar#2:1 Momu Rommi qhasükükau. Augustus no azah lakhi tsüe. 2Quirinius no Syria lo Angh shi ake lono timi kikihi atüghiu shilu. 3Eno kümtsü no kihiküsü lo shi niye pütütaw mishiphu lo wue.
4Kughengu Joseph ye David laghami kehu pa ghí Galilee yeghi lo Nazareth mishiphu lono Judea lo Davidʼw mishiphu Bethlehem lo wuke. 5Joseph ye pa no küsükha püakeu Mary sasü kihiküsü shi niye tilehi wuke, eno li ye mishibei pa gholo wue. 6Panongu no tile aphi lono Mary ye punú kepu do tove, 7eno li no anu atüghiu kipitimi punúlu. Li no aphì no pa küzü no amishikhu lo püzü, kughengu panongu ghenguno inami kungoki lo achebo kühave ke.
8Tipa phivilo aluza lo ambekhemiqo khami putho lo panongu mbeqo jukütsü ghí khe ae. 9Tile Ampeuʼw kungumi lakhi panongu lau ipeghi, eno Ampeu juküvü no panongu homüxa yepüvüluve, eno panongu ye shishe akichiqhive. 10Ikemu kungumi hu no panongu vilo pi: “Müsà kevilo. Ino timi kümtsü lau alokivi süghi niye shi akeu sütsa kivi pesü nongu lau süghi anie. 11Ishí tsalà lono Davidʼw mishiphu lo nongu lau xakuluu lakhi punúvae, pa ye Messiah, Ampeu ke. 12Nongu lau hino amichipu shi ani: Nongu no angá lakhi aphì no küzü no amishikhu lo zü aghí keu ithulu nani.”
13Paikhavi lono kungumi aqokitikhi muqo kijè lakhi kungumi lakhiu gholo ipeghino Alhou sheqhe ghi pi,
14“Kungugha akiqheu lo Alhou lau ajuküvü shilo!
eno ayeghi lo pa lokiqi akemi shou aloino keu apelo.”
15Kughou kungumiqo no panongu qhive no kungugha lo wuve keno, ambekhemiqo lakhi no lakhi vilo pi, “Ampeu no ningu vilo pikeu ghili Bethlehem lo wu no kiu shivea keno juni shilo.”
16Ike panongu no akimighi shi wu kelo Mary ngò Joseph eno amishikhu lo angá zü aghí keu phulu. 17Kughou ambekhemiqo no pa ithuluve keno, panongu no püzüu angá hipau ghili pipüa keu pesü pikülha wove, 18eno ambekhemiqo no kiu pi keno chilu kemi kümtsü no akümzave. 19Ikemu Mary ye hipaqo kümtsü amlo lo akighipishi qhiluve no kümsükutoju ache. 20Ambekhemiqo ye panongu vilo pikeu toi thowkha kümtsü chilu eno ithulu keu ghenguno Alhou je pipi eno sheqhe ghi idewove.
21Atsala tache shive no kughou anu ye aphighüyiko-gha kepu do shive keno, mishí miphi züu kungumi no aje tsüpüa keu toi pa je pesü Jisü kütsü.
Achineki lo Jisü Sawu
22Moses Yeza kiqi lono shikimthe keu tsalà tove kethiu Joseph ngò Mary pama no Jisü ikhiphe pesü Ampeu Alhou lau tsü niye Jerusalem lo wu 23(kughengu Ampeu yeza lo ishi yèpüani, “Kipitimi punú tüghiu kümtsü Ampeu lau kishekimthe pesü qhi kepu shini”#2:23 Ipe 13:2‑12), 24eno Ampeu Yeza lo pipüa keu kiqi lono, “Amiqhi tüna lakhi momu titoi keu ghau kubutur alhothe kini,”#2:24 Achine 12:8 pesü akümlagho shi mülá nikeu shie.
25Jerusalem lo timi achipiumikuchomi eno Alhou sükümsami lakhi Simeon ipikeu ache. Aghungú Kimthe no pa shou ache eno pa ye Alhou no Israel lokughuno tsüni keu khekulhoshi acheke. 26Pa ye Ampeu Alhouʼw Messiah ithulumo ke kutólo thimo nani ipi Aghungú Kimthe no pa lau pephe piye püake. 27Aghungú mijekütsü vechewo pa ye achineki khala lo ilo. Tishi akelo Jisü pù-azá no ayeza kukhuaye lo akeu kiqi lono shikupu niye anu Jisü sasü ighi, eno 28Simeon no pa u lono Jisü khapeluve eno pa no Alhou sheqhe ghi pi:
29“Akughushu Mipeu, nono piqhipüa keu toi,
itehi no ye oqeu pelo aloino ghi wove pelo;
30Kughengu inhethi no ow xakulu ithuluvea,
31tiye nono shiyeqo kümtsü zülo kutò pe qhitsü ke;
32tiye Jewkumomi ghenguno pekiphe küvü lakhi ke,
eno ow timi Israelmi ghenguno ajuküvü ke.”
33Anu papù ngò azá pama ye Simeon no pa ghili pikeu lo akümzave. 34Tisheno Simeon no panongu kümgha tsü eno pazá Mary vilo pi: “Julo, anu hipau ye Israel lo timi kutomo ikiqive eno ithughilu, eno timi no mujochile keu michipu shi penike puwu püani, 35tishi keu vechewo timi kutomo mulo kükümsü lhaphe tsü nani. Eno akihizüta no olikhi ongulho ghixü ketoi nani.”
36Asher shiayemi Panuel nonga tungkupuliu Anna ipikeu ghí tilehi ae. Li ye ighono kitemi shive, eno külave kethiu ampe tsünì likhi li kimi gholo xüke, 37eno tipathiu li ye ampe lhotache bidí kutólo chimemi shike. Li ye khilemu achineki phemo no putho-pucho akighini shi eno kümvü Alhou mülá ache. 38Tipau tüqhüdo lo, li no Simeon ngò Mary eno Joseph noqo lau ighino Alhou shikimthi eno Jerusalem xachile luni ke khe akemiqo kümtsü lau anu ghili pesü pitsü.
39Joseph ngò Mary pama ye Ampeu Yeza kiqi lo akeu kümtsü shikupuve kethiu pama ye Galilee lo pano phu Nazareth lo idewove. 40Jisü ye mutotoi thuwuve eno pa ye alokütsü no chhitoi shi no Alhouʼw küpükini pa shou ae.
Jisü Ití lo Achineki lo Wu
41Jisü pù-azá ye ampe atsütsǜ Israelmi Hechekulu ghulhu Tiqhitini lo sǘ nike Jerusalem lo wu ache. 42Jisü no ampe chighikini shi akelo, akukhuaye kiqi lono panongu ye aghulhu lo sǘ nike wue. 43Aghulhu kishekhave kethiu, Jisü pù-azá no ide woche kelo anu Jisü ye Jerusalem lo ngo chileve, ikemu pa pù-azá ye mütha no ae. 44Jisü ye pama gholo cheni küghashi kümsüve no pama ye ghulo lakhi lache lo wuve. Ikehu pama no abolomi eno aküsàmi dolo pa phujue. 45Kughou pama no Jisü ithumlave keno, Jerusalem lo pa phusü ideighi. 46Atsala küthü thiu pama no achineki khala lo Jisü no kükütsümiqo gholo iqa no panongu tsà iní eno panongu vilo iniju aghí keu phulu. 47Pa tsà chilu kemi kümtsü paw vethakulu eno pa no khochile keqo ju akümzave. 48Kughou pa pù-azá no pa ithulu keno, pama ye akichiqhive. Pazá no pa vilo pi, “Anu, no ye kushiye ningu lau hitoi shi ani kea? Opù nikujo ye amlosüsü shi ophu ae.”
49“Nokujo ye kushiye iphu akea? Ni ye I Pù ki lo aghí nani kepi nokujo ye mütha keshea?” ipi pa no iniju. 50Ikemu pama ye pa no kiu pama vilo piani keno vethamlave.
51Tisheno pa no pama sasü Nazareth lo iqive püzü pama ghokulu shi ache. Ikemu pazá no hi kümtsü li mulo lo akughupu shi qhiluve. 52Jisü ye Alhou eno timi lopu lono aphimpi eno alokütsü kinikujo lo thuwuve, eno Alhou ngò timi mulokiqipu shilue.
S'ha seleccionat:
Luke 2: STB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.