Luke 1
1
Kilekithitsa
1Timi kutomo no ningu gholo thime shikupuve keqo kihikülai yèpeqhi nikeu shiju ke. 2Inahuu thebei shi ithulu kemi eno asütsa pe veküpha kemi no kiu ningu vilo pi keno tipaqo panongu no yeluve. 3Akiqheu Theophilus, hipau amlo lo qhi no ni ghí oghenguno kithikiyi shi kiu shive keno yè nikeu shi xathaluvae, kughengu ni ampi no tsaqütsalei abothu lono kümtsü phujukhavea ke, 4tishianguno ovilo pive keu thimeqo ye kuchou kepi ithi peniye ke.
John Baptiz Kishiu Punú nikeu Ghili Azüu no Pi
5Herod no Judea ghakhu lo akükau shi ake ghuloki lo achinemi lakhi Zechariah ipikeu ache, pa ye achinemi kikijé lo Abijah muqo lo ke; pa nipu Elizabeth ghí Aaron#1:5 Aaron ye Moses pamu ke. tikughuko lono ighi kemi ke.#1:5 1Yeki 24:1‑19 6Pama kinikujo Alhou zülo achipiumikucho shi xüche eno Ampeu zakütsü ngò ayeza kümtsü kupukülai shi pape chekemi ke. 7Pama ye anu küha kughengu Elizabeth ye anuhami eno pama kinikujo ighono kitemi shive.
8Ghuthu lakhi Zachariah muqo no pano kikiphi tsalani kümlapu shia akelo Zechariah no Alhou zülo achine kümlà shiae, 9pa ye achinemi kukhuaye kiqi lono Ampeu chineki lo ilo no müsüghüta piti penike asaqhi ke lono kìshelu ke. 10Eno kughou müsüghüta piti kepu do ighi keno, kumqo pesü mülá akemiqo kümtsü khalau akighini shia.
11Tilehi Ampeuʼw kungumi lakhi no müsüghüta kümlá-khache ajeu küdau puthugho no pa lau ipeghi. 12Kughou Zechariah no pa ithulu keno pa ye akümsa no thüghüive. 13Ikemu kungumi hu no pa vilo pi: “Zechariah, müsà kevilo; Alhou no okighini chiluve tsüae. Onipu Elizabeth ye anu lakhi punú nani eno no ye pa je John kütsü nani. 14Pa ye oghenguno alokivi eno alokiqipu shi nani, eno pa punú keu ghenguno timi kutomo no alovishe nani, 15kughengu pa ye Ampeu zülo kijè shi nani. Pa ye khilemu atsaizü jeli momu atsaizü kümkaqo peithamo nani, eno pa ye punú miphi züu no Aghungú Kimthe no chhitoive nani. 16Pa no Israelmi kutomo panongu Mipeu Lhou lau saideghi nani. 17Pa no Ampeu ghenguno paw timi kutò pe qhini ke Elijah gholo achekeu küká eno ghungú vechewo apùnoqo pelo panongu nuliqo lau amlotsüqhiyilu eno agholumo kemiqo pelo achipiumikucho lokütsü lo ighilu penike Ampeu züu no wu nani.”
18Zechariah no kungumi vilo iniju, “Ni ye kíshi no hiye kuchou kepi ithini kea? Ni ye kichimi shivea eno inipu ghí ampe kutomo shivae.”
19Kungumi no pa vilo pi, “Ni ye Gabriel ke. Ni ye Alhou phivilo puthugho acheni eno ipelo opütsa eno asütsa kivi hipau ovilo pi penike ipuwu ke. 20Eno itehi no ye hipau shikupumo ke tsalà kutólo atsa pimlave no inaqhoive nani, kughengu nono itsà khikhi ado achipi lono shikupu niye ani keno tipau hu pülümo ke.”
21Tishi ake dolo timiqo ye achineki khalau Zechariah khea eno pa ye kushiye achineki lo ado kushuwa ngo auvea kepi akümza ae. 22Kughou pa no khalau ipeghi keno, pa ye panongu pütsa mülave. Panongu no pa ye achineki lo kungunhetsü ithulu kepi vethaluve, kughengu pa no pa u kulo pesü panongu piye-a ikemu atsa pimla no ae.
23Kughou pa kümlà kishekhave keno pa ye aki lo idewove. 24Hipathiu pa nipu Elizabeth ye mishiluve eno li ye aqhi pungu kutó aki lo akulhoqhi auve. 25Li no pi: “Ampeu no ighenguno mülave tsüae. Kughou pa no kimiyeqhiyi keu ishou jupuku keno tipau tsalà lono timi zülo no ikukujo ikhipeve tsüe.”
Jisü Kupunú Ghili Azüu no pi
26Elizabeth no mishí keu aqhi tsügho shi akelo Alhou no Galilee lo Nazareth mishiphu lo 27totimi athathe lakhi lau paw kungumi Gabriel puwu. Li ye David laghami Joseph ipikeu no küsükha püa. Ayiliu je ye Mary ke. 28Kungumi hu no li lau wu no pi, “Alovilo, no ye shishe müghavae! Ampeu no ogholo anie.”
29Mary ye kungumi tsà chilu püzü shishe amlo save eno kiutoi keu lokivi sütsa shi aghí nani kea ipi akümza ae. 30Ikemu kungumi no li vilo pi: “Mary, müsà kevilo. No ye Alhou mulokiqi shiluvae. 31No ye mishiluve no anu lakhi punú nani, eno no ye pa je Jisü kutsü nani. 32Pa ye kijè shi nani eno Alhou Akiqheu Nu ipi ku nani. Ampeu Alhou no papù David kükalakhü pesü pa tsü nani, 33eno pa no lhokta kutólo Jacob tikughukomiqo shou ka nani; pa yekipe ye khilemu ashekha shivemo nani.”
34Mary no kungumi vilo iniju, “Ni ye ilimi lakhi shiaphi ke kíshi no hi shilu nani kea?”
35Kungumi no khochile: “Aghungú Kimthe no oshou ikughi nani eno Alhou Akiqheu küká no oküzüluve nani. Eno akimthe ngá punú niye shi akeu ye Alhou Nu ipi ku#1:35 Momu Anu lakhi punú niye akeu ye Akimtheu ipi ku nani. nani. 36No sholokumi Elizabeth ghí kitemi shivemu anu lakhi punú niye ani. Timiqo no li ye anuhau ipi cheni ikemu li ye mishí keu hi aqhi akütsüghou lo cheni. 37Kughengu Alhou lau no ighi keu tsà ye khilemu tomla keu shimo nani.”
38Mary no khochile, “Ni ye Ampeu qeliu ke, nono ilau piqhi keu tsà shikupulu peniu.” Tisheno kungumi hu no li qhive no wuve.
Mary no Elizabeth Xuju
39Tipathiu Mary no aghili kutove püzü akìmighi shi Judea ghakhu lo naghuto küdau mishiphu lakhi lo chesü wu. 40Eno li no Zechariah ki lo ilo no Elizabeth sasü petha shi. 41Kughou Elizabeth no Mary sasü petha shi keno li po lo angá no paküta keu shi ithae, eno Elizabeth ye Aghungú Kimthe no chhitoive. 42Li no asütsa müghachhoi keu lono pi: “No ye totimiqo dolo akümghau ke, eno opo lo angá mishí niye akeu ye akümghapue! 43Ikemu ni ye khuu kepi I Mipeu pazá pelo ilau ighi pe kea? 44Nono petha shikeu sütsa ikìní lo iloghi kemtsa ipo lo angá no alokivi lau no paküta keu shi itha ke. 45Totimi khuu no Alhou no paw tushokiqhiqo li lau shikupu tsüní ipikeu lo pülü keno li ye müghae!”
Mary le
46Mary no pi:
“Ingulho no Ampeu sheqhe ani,
47eno ighungú no I Xakulu Lhou lau alovishe ani,
48Kughengu pa no
paw aqhokigheu qeliu kümsülue.
Hinguno hilau ye tiqhelimi kümtsü no ivilo akümghau ipi kuniae,
49kughengu akumto Lhou no ighenguno akümlà kijè mülàve tsüae,
pa je ye akimthe ke.
50Pa sümsa kemi kümtsü shou
tiqheli no tiqheli kutólo kikimiye piye cheni.
51Pa no Pa kumto u chhopuwo no akümzapu kümlà mülae;
pa no akükümsü lo qheza chekemiqo apanaghave tsüe,
52pa no ayekipemiqo panongu kükalakhü lono ikhiqhive,
ikemu aqhokighemi sünheqhepuku ke.
53Pa no thime kivi pesü müzüthi kemi ghapiqitsü,
ikemu kiními a-u kümsá puwove.
54Pa no küpüqhiyi nikeu kümsülu no
pa qeu Israel kuphu ke
55Pa no nipù-asü vilo tushoqhi püakeu toi
Abraham eno pa tikughukomi lau pülhapuju küpüqhiyi ke.”
56Mary ye Elizabeth gholo aqhi küthüa toi keu ngoa eno tithiu aki lo idewove.
John Baptiz Kishiu Punu
57Elizabeth no angá punú kepu do tove kelo, li no anu lakhi punú. 58Li kisüghümi eno abolomiqo no Ampeu no akümzapu li lau mülà keu chilu no panongu kümtsü li gholo alovi küqhae.
59Atsala tache thiu panongu no aphighüyiko-küghá ghenguno anu sasü ighi, eno panongu ye papù je paphi shi pa je Zechariah kutsü niye shiae, 60ikemu pazá no pi: “Moe! Pa je ye John ipi kunie.”
61Panongu no li vilo pi: “No sholokumi dolo aje titoi keu lakhimu küha aphie.”
62Tithiu panongu no a-u kukulo lono papù vilo anu je khuu kutsü penishi ani kea ipi iniju. 63Zachariah no yèpuku kepu atupha lakhi khu, eno pa no ishi yè, “Pa je ye John.” Ikelo panongu kümtsü no akümzave. 64Tipa mütsa Zachariah kichí eno amili xukho kitheluve eno pa no Alhou sheqhe ghi atsa pithuve. 65Tipa qhalo akemi kümtsü no akümzave eno Judea yeghi lo naghuto lo aphu akeqo kümtsü lo timiqo no hipau ghili kügha wove. 66Hi chilu kemi kümtsü no akümzave eno panongu no ishi iniju ghi pi, “Tishiaye anu hipau ye kiu shi nani kela?” Kughengu Ampeu küká no pa gholo ae.
Zachariah le
67John papù Zechariah ye Aghungú Kimthe no chhitoive no tungkupu tsà hitoi pi:
68“Israel Lhou Ampeu sheqhelo,
kughengu pa no paw timiqo lau ighino panoqo xachilelu ke.
69Pa no pa qeu David lagha lono
ningu ghenguno xakulu kükau kijè süqhe tsüke
70(pa no püzüu paw akimthe tungkupumi vechewo pipüa ke),
71pa no ni ghümi eno
ni mithi chekemi kümtsü lau no xaphelu nani—
72tiye nipù-asü lau küpüqhiyi keu piye niye ke,
eno pa kimthe shoqhi kümsüchilelu niye ke,
73ashoqhi tiye pa no ningu papù Abraham lau shikeu ke.
74Ni ghümi lau no ni xaphelu niye,
eno ningu pelo müsàmo no
75aküxü kupuju akimthe eno achipiumikucho lono pa qe peniye ke.
76“Eno inu, no ye Alhou Akiqheu wu tungkupu lakhi ipi ku nani;
kughengu no ye Ampeu züu no pa laghi ghepe qhini ke wu nani,
77tiye paw timiqo lau axiné qhikütsü vechewo
xakulu kighithi tsü niye ke.
78Kughengu Alhouʼw kimiyeqhiyi keu vechewo
kungugha lono khetsünhe ningu lau ighi nani
79tiye àküzǘ yeghi lo xü akemi
eno akìthí yekükhü lo akemi,
ni pukhu nepa kichesü aloino keu là lo sawu nikeu ghenguno ke.”
80John ye mutotoi thuwuve eno aghungú küxü lo mutotoive; eno pa ye Israelmi aqha zülo pephe piyemo ke tsalà kutólo yenguike-a lo xüache.
S'ha seleccionat:
Luke 1: STB
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Sümi Tiqhelimi Bible™| Copyright © 2023, 2026 by Biblica, Inc. |
Used with permission. All rights reserved worldwide.