Ezekiel 32
32
1Ba le yik tama ta cheŋ la, bena pi ale ŋayewa chiisa pi ale siyewa piilimka danni ate Naawen yaa biisi ale mi ayen, 2<<Saalɔ biiga, pai Ejipiti naawa Faaro a siak kuun yiili. Weeni wa ayen, <Fi a nye ase ka gbeŋli biik la tɛŋsaŋa po. Fi a nye ase ka ŋauk la nyakpientaŋa po. Fi kasim a fɔbi ka nanpansa belaŋa po, ale a damu nyiamu ale fi naŋsaŋa. A basi ate belaŋa a chim bagta.
3<< <Nyɔnɔwa Naawen ale biisi diila ale nna, ayen m le yuk m ŋmiaka a vi fi zuk, a yaa basi ate nuru boari a dari fu ale ŋmiaka a ta jueli. 4Ate m yaa yuk fu ate fi jueli lo kunkɔŋni. M le basi ate wenzuk nuinsaŋa a vuusi fi zuk abe tɛŋzuk duŋsaŋa a dɛ fu a ga chak. 5M le zarinti fi nyiŋ lammu guutaŋa zuima abe kab tii ale tali m pai sueri vaasaŋa. 6M le basi ate fi ziimu a nyini a chali yɔk tɛŋka ale guutaŋa meena, ate va sii ale limisi la fi nyiŋ lammu a sueri. 7Mi dan basi ate fi muriŋ bɛ, m yaa le lik wenni abe m basi ate chiŋmarisaŋa a lik. M le lik wenbinni ale chiŋmanni ate chiika a kan ŋma nyaksi. 8M le lik ŋan baai meena ale bo wenzukku a nyaksi la. A basi ate legi a jam tɛŋka zuk. Nyɔnɔwa Naawen ale weeni. 9M dan basi ate ba yik ni ta cheŋ tɛŋ yonsa sii ate ni zɛ si la yɔgsum ale yik nuruba yega. 10M le basi ate ni wie a cha nuruba. Nama nyiŋ ba nalimaŋa nyiŋsa ale kasim a gɔk ase m nin yuk m gebika ba niŋ. Da dii dai ate fi a lo la, ba nyiŋsa ale kasim a gɔk kama. Naab meena ale kasim a chali ka yɔgsum wadek nyuvuri nyiŋ.
11<< <Dila Nyɔnɔwa Naawen ale biisi diila ale nna. Babilon naawa ale siti ni ale wa gebika. 12M le basi ate tugurik tɔŋdɔ pagrisa a ko fi nuruma ale gebisa a dueni. Wa dii ale di bie tɛŋka po. Ba le kaasi Ejipiti kanjantaŋa ale ka nuruma meena. 13M le ko Ejipiti niiŋa meena ale bo nyiam yegayega nɔi la. Nurubiik naŋ a kan damu nyiamu, naab mɛ naŋsabi a kan pɔti nyiamu ŋmana. 14Dila la m le basi ate Ejipiti demma nyiamu a nye cheri. M le basi ate ba nyiamu a chali nalimnyiini ale kpaam. Nyɔnɔwa Naawen ale biisi. 15M dan basi ate Ejipiti a chim tɛŋ koruk alege pai jaab meena ale bo tɛŋka po la, ale ko baai meena ale bo Ejipiti la, ba yaa le seba ayen Mi ale Naawen.>
16<<Kuun yi dii ate nuruba ale yi te Ejipiti la ale nna. Tɛŋsaŋa nipooma ale ba yi di. Ba le yi kuun yiili a te Ejipiti ale ka nuruma. Nyɔnɔwa Naawen ale weeni.>>
17Ba le yik tama a ta cheŋ la, bena pi ale ŋaye po, chiika da pi ale ŋanu danni ate Naawen a biisi ale mi ayen, 18<<Saalɔ biiga, kum a te Ejipiti nuruma. Ta Ejipiti a jam ale tɛŋ pagrisaŋa nipooma meena. Ta ba siŋ jam kpiluŋ ate ba gum kpiema po. 19Weeni ba ayen, <Nama a nala a gaam nuru yonta kama? Ni le cheŋ kpiluŋ a ga duak gum baai ale kan seba Naawen la po.> 20Ejipiti demma ale lo a gum baai ate ba ko kpaliŋka po la. Gebik ale gomsi magsi ayen ka ko ba. 21Niŋdeerɔma ale baai ale kpaliŋ a maari Ejipiti la a te Ejipiti demma tia ba le cheŋ kpiluŋ la. Ba yaa kaari weeni, ayen biem nyama ate ba ko ba kpaliŋka po la a jam kama a dua dela.
22<<Assiria dua ka dela, ate ba tugurik tɔŋdɔma boositaŋa a gilim jigi meena. Ba ko ba meena kama kpaliŋka po, 23ate ba boositaŋa a bo kpiluŋ kauk kuui ale limisa la. Ka tugurik tɔŋdɔma meena a kpi kama kpaliŋka po ate ba boositaŋa a gilim ka boosuku. Ba le bo tɛŋzuk la, ba nyigsi nuruba, alege yɔgyɔgla de ba ko ba meena kpaliŋka po.
24<<Iilam a bo ka dula ate ka tugurik tɔŋdɔma boositaŋa a gilim ka. Ba ko ba meena kama kpaliŋka po. Ba nyigsi nuruba kama tɛŋzuk ale daŋm, dila nyiŋ se ba siŋ kpiluŋ tɛŋ. Ba le siŋ kpiluŋ ale chivie. 25Iilam a dua kama ale baai meena ate ba ko kpaliŋ ka po la. Ka tugurik tɔŋdɔma boositaŋa meena a gilim ka kama. Iilam nuruma a daŋ kama, ate ba ko ba. Ba jam nyigsi nuruba ba le diem jam bo tɛŋzuk la. Alege yɔgyɔgla de ba le cheŋ kpiluŋ ale chivie. Ba boositaŋa a bo le ka baai ate ba jam ko la.
26<<Mesek ale Tubal a bo ka dula ate ka tugurik tɔŋdɔma boositaŋa a gilim ka. Ba meena a daŋ kama ate ba ko ba kpaliŋka po. Ba mɛ jam nyigsi nuruba ba le jam bo tɛŋzuk de la. 27Alege ba an gu ba ale tugurik tɔŋdɔba baai ate ba jam ko kpaliŋka po dipodipo la. Ba la jam cheŋ ka kpiluŋ ale ba kpiluŋ kɔlimaŋa. Tugurik tɔŋdɔma dɛ nyiem kpagli ba gebisaŋa alege pai ŋan baai ate ba ta a chɔgsi peema la a vi pai zuk. Tugurik tɔŋdɔba pagrisaŋa de ale jam bo tɛŋzuk la jam a nyigsi ka nuruba.
28<<Fi Faaro ba le kaasi fu ate fi dua ale biem nyam baai ate ba ko ba kpaliŋ po la.
29<<Edom mɛ bo ka dula ale ka nalimaŋa ale niŋdeerɔma meena. Ba jam pagra kama alege yɔgyɔgla de ba kpi kama dua ale baai ate ba ko kpaliŋka po la, baai ale ka biem nyam, baai ale cheŋ kpiluŋ.
30<<Wiiluk geŋka kpaŋŋa meena ale Saidon demma a bo ka dula. Ba pagrimu a nyigsi ka nuruba alege ba cheŋ ale baai ate ba ko la ale chivie. Ba ka biem nyam, a dua ale baai ate ba ko kpaliŋka po la. Ba ta ba chivieŋa a cheŋ ale baai ale siŋ kpiluŋ la.
31<<Ejipiti naawa Faaro ale wa tugurik tɔŋdɔma ale nya baai ate ba ko kpaliŋka po la. Ate wa sui yaa yɔk ale wa tugurik tɔŋdɔma meena ate ba ko kpaliŋka po la. Nyɔnɔwa Naawen ale weeni. 32Mi basi kama ate nuruba a chali Ejipiti naawa yɔgsum wa le diem bo tɛŋzuk la. Alege wa ale wa nuruma meena ale duak gum biem nyama po, baai ate ba ko ba kpaliŋka po la. Nyɔnɔwa Naawen ale weeni.
S'ha seleccionat:
Ezekiel 32: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation