Ezekiel 31
31
1Ba le jam yik ti ta cheŋ la bena pi ale dinyi wa po chiisa sitawa po ka piilimka dai ate Naawen yaa biisi ale mi ayen, 2<<Saalɔ biiga, weeni sak Ejipiti naawa Faaro ale wa nuruma ayen, <Nuru karo a magsi chaab ale fu ale fi naamu. 3Assiria jam a nye ase ka Lebanon nyunyoŋ la. Ate bu naŋsaŋa a nala a te gɔnni yɔgsum. Bu jam wɔŋa kama, a jueli a bo chiŋmaaŋa po. 4Nyiam yegayega ale jam basi ate tiimu a chim. Nya tii ale nyini tɛŋ a jueli a basi ate bu naŋsa a te ti sinsila ale bo tɛŋka nakpaasaŋa la. 5Dila nyiŋ tiimu jam wɔŋa kama a gaam nakpaasaŋa tiisaŋa meena. Bu suŋsuŋ naŋsaŋa a wɔŋa kama ale biga nyiamu yegayekka nyiŋ. 6Wenzuk nuinsaŋa meena yaa yɔk si tugta tiimu suŋsuŋ naŋsa zuk. Gɔi duŋsaŋa meena a jam bu tɛŋ a biak. Tɛŋ kpieŋsa meena a jam bo ka tiimu yɔgsummu po. 7Tiimu jam zuak kama ale nala ale bu naŋ woŋsaŋa, dii nyiŋla bu tɛŋ naŋsaŋa a siŋ paari ka tɛŋ a nya nyiam yegayega. 8Nyunyoŋta tiisaŋa ale jam bo Naawen talimu po la an jam soa ase tiimu dɛ ale soa diila. Damɔnta tiisaŋa a jam ka suŋsuŋ naŋ kpieŋsa dila. Dapeelita tiisaŋa a jam ka naŋ sila chaaba. Tiib a jam ka Naawen tiisaŋa po a nala ase tiimu dɛ la. 9Mi basi kama ate bu nala ale naŋsa yega, ate Eden tiisaŋa ale bo Naawen tiisaŋa po la a yaali ayen si nye ase bu la.
10<< <Dila la Nyɔnɔwa Naawen ale biisi diila ale nna. Tiimu chim kama wɔŋa. Ate bu ŋmanni paari chiŋmaaŋa. Ate bu yaa ta kanjanta bu woglimmu nyiŋ. 11Mi yaa pai bu te tɛŋsaŋa kpagi kpienni ayen wa namsi bu. Bu le bie la nyiŋ, mi yaa yeeri bu. 12Tɛŋ kaai nyeka ale tua la po yaa che bu lɔnsi a basi bu ate bu doa. Tiimu naŋsaŋa a yaa lo guutaŋa zuima ale vaasaŋa po meena, ate bu suŋsuŋ naŋsaŋa ale wɛ la a bo tɛŋka va sii ale limisa la po meena. Tɛŋsaŋa meena deri basi bu yɔgsummu. 13Wenzukku nuinsaŋa a yaa bo tiimu ale lo la zuk. Gɔi duŋsaŋa a bo tiimu naŋsaŋa ale lo la po. 14Dila nyiŋ ti sii ale za nyiamu nɔi a chim la a kan ta kanjanta ayen si ale wɔŋa. Si ŋmaaŋa a kan paari chiŋmaaŋa. Ti sii buuni ale a nya nyiam la a kan chim a wɔŋa dila, dii nyiŋla si meena a magsi ka si kpi a siŋ tɛŋ. Si meena ale bo ale ka nuru baai ale kpi a cheŋ kpiluŋ la.
15<< <Nyɔnɔwa Naawen ale biisi diila ale nna. Da dii danni ate tiimu a cheŋ kpiluŋ la, mi basi kama ate bulisaŋa meena a kaari ate ku a jueli. Mi lik si kama alege yik belaŋa nyaataŋa ate nyaataŋa a kan chali. Mi yaa jo Lebanon ale garuk sobluk ayen ku sak wa sui ale kaasi ale tiib kpiemu la. Tiisaŋa meena ale bo nakpaasaŋa la sui a kaasi dila nyiŋ. 16Tɛŋsaŋa ale wom mi ale basi ate tiimu a lo a cheŋ kpiluŋ la, yɔgsum yaa yik si ate si a choa. Bu cheŋ a ga gum ka baai ale siŋ kpiluŋ la po. Ate Eden tiisaŋa meena ale Lebanon tiib maŋsaŋa meena, ale ti sii meena ale a nya nyiam nalimnyiini la sui a yɔk kpiluŋ ale bo tɛŋ la. 17Tiisaŋa de meena a maa siŋ ka kpiluŋ ale tiib kpiemu. Ba gum ka baai ate ba ko kpaliŋ po la ale baai ale bo tɛŋsaŋa po a jam bo tiib kpiemu de yɔgsummu po la.
18<< <Dila la tiib a ka Eden a magsi chaab ale fu. Ejipiti fi le fi zuaka ale fi zulaŋa meena fi siŋ kpiluŋ a gum Eden tiisaŋa po. Fi le duak ale nuru daŋtisa ate ba ko ba kpaliŋ po la. Faaro wie ale nna. Mi Nyɔnɔwa Naawen ale weeni.> >>
S'ha seleccionat:
Ezekiel 31: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation