Ezekiel 33
33
1Naawen wanni yaa jam mi jigi ayen, 2<<Saalɔ biiga, biisi a te fi tɛŋka demma a weeni ba ayen, <M dan ta gebika jam ta chaab ale tɛŋ, ate tɛŋka demma a lueri ba nidoama wanyi ate wa chim limisidɔ, 3ate wa nya gebika a cheen ka ta chaab ale tɛŋka ate wa peeri damuniŋ a kaam nuruma, 4ate waai yaa wom damuniŋka alege an siak kaamka ate gebika a jam ko wa, wa ziimu ale bo ka wadek zuk. 5Wa le toalim wom damuniŋka kumsa alege an siak kaamka la, wa ziimu ale bo ka wadek zuk. Wa dan siak kaamka kama, wa ti vari wadek a basi kama. 6Alege limisidɔwa a dan nya gebika a cheena alege an peeri damuniŋka a kaam nuruma ate gebika a jam pa ba wanyi nyuvuri, nuru wala ba pa wa ta cheŋ ka wa biemu nyiŋ, alege mi le yik limisidɔwa a bek nuruwa ziimu nyiŋ.>
7<<Saalɔ biiga, mi nye fu ka limisidɔ a te Izirali yenni. Dila nyiŋ wom wa dii ate mi a biisi la a pa kaamka mi jigi a te ba. 8Mi a dan weeni gaasa nyɔnɔwa ayen, <Gaasa nyɔnɔ, fi le sum kpi,> ate fi an biisi ate ku nyini a yeeri wa wa suitaŋa po, gaasa nyɔnɔ wala ale kpi wa biemu nyiŋ, ate m yik fu a bek wa ziimu nyiŋ. 9Alege fi dan kaam gaasa nuruwa ayen wa basi wa suitaŋa ate wa an nye ya, wa le kpi wa biemu nyiŋ, ale fi vari dek a poom basi kama.
10<<Saalɔ biiga, weeni Izirali yenni, ayen fi ale a weeni diila ale nna. <Ti nye kaasika ale ti biemu a duŋ ti a basi ka tɛŋ, ate ti muriŋ a bɛ ti nyiŋ. Ti be ti nye ka sɛ a boro?> 11Weeni ba ayen, <Mi ale sum boro la, Nyɔnɔwa Naawen ale a weeni, Mi an mariŋ gaasa nyɔnɔ kummoa, alege ka ba goanti basi ba biemu suitaŋa a boro. Ni tulim, ni tulim a basi ni biemu suitaŋa. Ka boan le soa ate ni a kpi, Izirali yeri demma?>
12<<Dila nyiŋ, saalɔ biiga, weeni fi tɛŋka demma ayen, <Wayɔrisima nyɔnɔwa wayɔrisimaŋa a kan vari wa a basi ase wa nin zɛri mi nɔiya. Biem nyɔnɔwa biemu abe kan basi ate wa lo ase wa nin basi wa biemu wayɔrisima nyiŋŋa.> 13M dan weeni wayɔrisima nyɔnɔwa ayen wa le sum boro, alege ate wa ta sebchakka ale wa wayɔrisimaŋa a nye biem wayɔrisimaŋa dinyi mɛ la m kan teeri, wa le kpi biem buui ate wa nye la nyiŋ. 14Mi be dan weeni gaasa nyɔnɔwa ayen, <Fi le sum kpi,> alege ate wa basi wa biemu ale nye dii ale wensie ale magsi la, 15ale pa jabuui ate wa puulim a piem la a te, a pa jabuui ate wa zu la a te, a va sinsak ŋaai ale a te nyuvuri la, a kan nye biemmoa, wa kan sum kpi. 16Biem buui meena ate wa nye la m kan teeri bu buui buui ya ta chaab ale wa. Wa nye ka dii ale wensie ale magsi la. Wa kan sum kpi.
17<<Alege fi tɛŋka demma a weeni ayen, <Nyɔnɔwa suiku daa wensie.> Alege ka ba suiku ale kan daa wensie. 18Wayɔrisima nyɔnɔ a dan basi wa wayɔrisimaŋa ale nye biem wa le kpi bu nyiŋ. 19Gaasa nyɔnɔ a dan basi wa gaasaŋa ale nye dii ale wensie ale magsi, wa le boro dila nyeka nyiŋ. 20Alege, Izirali yeri demma, ni a weeni ayen, <Nyɔnɔwa suiku daa wensie.> Alege, mi le bo ni wanyi, wanyi buusa a va wadek suitaŋa.>>
21Ba le yik tama a ta cheŋ la bena pi ale ŋayewa po, chiisa piika po ka daa ŋanu danni nuru yaa vari nyini Jerusalem a jam mi jigi a weeni ayen, <<Tɛŋka a lo kama.>> 22Yɔgyɔgla de junɔi ale taam alege ate nuruwa a paari la, Naawen nisa yaa jam bo mi zuk, ate wa lak mi nɔnni alege ate nuruwa a jam mi jigi saluiku. Dila nyiŋ mi nɔnni yaa lagri mi ŋman sina.
23Naawen wanni yaa jam mi jigi ayen, 24<<Saalɔ biiga, nuruma ale bo yie luemaŋa po Izirali tɛŋka po la a weeni kama ayen, <Abrayam jam ka nuru yeŋ alege wa ta tɛŋka. Alege tama piisi kama, chekki wa pa tɛŋka a te ti kama ase nitalim la.> 25Dila nyiŋla weeni ba ayen, Nyɔnɔwa Naawen ale biisi diila ale nna. Ni le a ŋɔbi lam ate ziim a diem bo bu po la, ale zak a nya ni bɔgtaŋa a basi ate ziim a nyini la ni le tuesi tɛŋka a ta? 26Ni yiila a bo ka ni gebika zuk, ni a nye ka wie ŋaai ale a kisi la, alege ate waai meena a taŋ vaanchoa pok. Ni be le tuesi tɛŋka a ta?>
27<<Weeni kude a te ba, <Nyɔnɔwa Naawen ale biisi diila ale nna, Mi ale sum boro la, baai ale tali bo yie luemaŋa po la ale kpi ale gebika, baai ale bo tɛŋka peelim la m le pa ba a tɛŋ gɔi duŋsa ate si ŋɔbi ba, abe baai ale bo yie pagrisa po ale pina vie po la a kpi ale nyiŋtuila. 28M le basi ate tɛŋka a doa kinla, ate ka kanjanta pagrim a jam kpeglimka jigi, ate Izirali guuta a doa koruk ate waai a kan va ti po taamu. 29Ate ba yaa seba ayen Mi ale Naawen, m le basi ate tɛŋka a doa koruk ale kinla dii nyiŋla ba le nye wie ŋaai ale a kisi la.>
30<<Alege fi saalɔ biiga, fi tɛŋka demma a biisi ale ka chaab fi wie parisaŋa kie ale yeeŋa tuataŋa nɔi, a weeni chaab ayen, <Ni jam wom biika ale nyini Naawen jigi a jam la.> 31Mi nuruma a jam fi jigi kama, ase ba nyiem ale a nye diila, a kali fi niŋ a wom fi wieŋa, alege ba kan pa ŋa a tom tuima. Ba pa ba noaŋa kama a biisi ba le pa badek a te diila, alege ba suiniimaŋa ka butuem ale sueri a yaali venta nyuenta. 32Ba jigi fi daa jaab a gaam waai ale a yi yeŋka yiila ale lueluk masiga ale a nak ŋannaŋta nalimnyiini, diila ba a wom fi wieŋa kama ale kan pa ŋa a tom tuima.
33<<Kude meena a dan jam chim wensie, ku be le chim mɛ, ba yaa le seba ayen biisiteerɔ a bo ba suŋsuŋ.>>
S'ha seleccionat:
Ezekiel 33: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation