Ezekiel 18
18
1Naawen yaa weeni mi ayen, 2<<Fi le biisi wanni de a magsi chaab ale Izirali la kiri ale boa, <Koba a de yɔn miisinsa, ate bisa nyina a miigi.>
3<<Mi ale vua la, fi kan ŋman weeni wamagsini dɛ Izirali. Ku ka wensie ate mi Nyɔnɔwa Naawen a weeni. 4Ja vuk meena ka mi ale soa. Kowa nyuvunni ka mi ale soa, biika mɛ nyuvunni ka mi ale soa. Waai ale a nye biem la ale a kpi. 5Ase nuru a dan chim nuru maŋ a nye dii ale nala. 6Wa kan dɛ guuta zuima juijui ate ba a kaabi. Wa kan zak a nya Izirali bɔgtaŋa a yaali maarika. Wa kan goa ale wa vaanchoa powa yaase nipok waai ale a lo chiaga. 7Wa kan nye waai gaasa alege wa le puulim a peem jabuui la wa a te kama. Wa kan vari waai ya, alege a te baai ate kɔm ta ba la ŋandiinta, ale baai ale ta chaboala la gatta. 8Wa kan peem ligra a te waai ale a yaali nyuenta yega. Wa kan pai wa nisa a tom wa kaasima. Nuruba baye a dan ta chaab wa bo ba buusa a magsi kama. 9Wa a va m ŋmarisika kama ale ta siaka ale m buusaŋa. Waai le a nye wieŋa de la ka nuru maŋ, wa be le vua a boro. Mi Nyɔnɔwa Naawen ale weeni.>>
10<<Alege da dii dai nuruwa de a dan ta biik kaai nyeka ale toa ate wa a ko nuruba ale a nye wieŋa de gela. 11Alege kowa dek an nye wieŋa de dii diiya. Ate biika a dɛ guuta zuima ate ba a kaabi la, alege a goa ale wa vaanchoa pok. 12A namsi ŋanjaksa. A zu ale kan ta va wa le puulim a peem jabuui la a ŋmani. A zak a nya bɔgta, a yaali maarika. A nye wie ŋaai ate m kisa. 13A peem ligra a te nuruba ale a yaali nyuenta yegayega. Biika de choa ale boro? Aaya, wa kan boro. Wa nye wieŋa de meena kama ate mi kisa. Dila nyiŋ ba le ko wa. Wadek ale soa wadek kummu.
14<<Yɔgyɔgla biika de a dan ta biik ate wa nya wa kowa wabaataŋa alege kan nye ŋa, 15wa kan dɛ ŋan baai ate ba kaab guuta zuima. Wa kan nya Izirali bɔgtaŋa a yaali maarika. A kan goa ale wa vaanchoa powa. 16Wa kan nye waai gaasa. Waai a dan peem wa jaab wa kan beki yaase wa a zu. Kɔm ale ta baai la wa a te ba ŋandiinta, ale a te baai ale kan ta gatta a jo la ate ba a jo. 17Wa kan pai wa nisa a nye wabiowa. Waai a dan peem wa ligra wa kan tuesi nyuenta yega. Wa boka a nala ale a chali m buusaŋa ale a va m ŋmarisika. Wa kan kpi wa kowa biemu nyiŋŋa, wa le sum boro. 18Alege wa kowa a tuesi nuru yonta ligra kun nala ale vari wa suok ale tom wa kaasima wa nuruma suŋsuŋ. Wa le kpi wadek wabaataŋa nyiŋ.
19<<Alege waai ale bek ayen, <Ka boa ale soa ate biika a kan nam wa kowa wabaataŋa nyiŋŋa?> Biika a nye ka dii ale magsi la. Wa va m ŋmarisika meena. Dila wa le sum boro. 20Nuru waai ale a nye biem la wala ale wa kpi. Biika a kan nam wa nyɔnɔwa wabaata nyiŋŋa. Nyɔnɔ mɛ a kan nam wa biik wabaata nyiŋŋa. Baai ale nye a magsi la ale nya ba nyemagsika masim. Nuru baata ale nam badek biemu nyiŋ.
21<<Alege wabaata nyama a dan basi ba biemu nyeka alege a va m ŋmarisika a tom dii ale magsi ale nala, ba kan kpi, ba le boro. 22M le baŋ ba wabaataŋa. Dii nyiŋla ba nye ka dii ale magsi la, ba be kan kpi. 23Mi an potim a yaali ayen wabaata nyɔnɔ a kpi. Mi Nyɔnɔwa Naawen ale a weeni. Mi a yaali ayen ba basi ka ba wabaataŋa a boro.
24<<Alege nuru maŋsa a dan basi wamaŋsa nyeka ale a nye wie ŋaai ate mi kisa ate wabaata nyam a nye la, ba le boro? Ba wamaŋsaŋa meena m le baŋ, dii nyiŋla ba ŋman ka siaka. Ba nyeka wabaata, dila nyiŋ ba le kpi ba wabaataŋa nyiŋ.
25<<Alege ni le weeni ayen, <Nyɔnɔwa ale a nye diila an nala.> Nama Izirali demma ni wom, m nye a magsi kama. Ka nama ale a nye diila ale kan nala. 26Nuru maŋsa a dan basi wamaŋsa nyeka ale a nye biem, ba le kpi ku nyiŋ. Ba le kpi, dii nyiŋla ba nye ka wabaata. 27Wabaata nyama a dan basi gaasa alege a nye dii ale magsi ale nala, ba te vari ba nyuvooŋa a basi. 28Dii nyiŋla ba poli kama a pai biemu nyeka a basi. Ba kan kpi, ba le boro. 29Alege Izirali demma a diem a weeni ayen, <Nyɔnɔwa ale a nye diila an nala.> Izirali demma, mi ale a nye diila a nala kama. Ka nama ale a nye diila ale kan nala.
30<<Dila nyiŋ, Izirali demma, m le bo waai meena buusa a magsi chaab ale wa le nye diila. Mi Nyɔnɔwa Naawen ale weeni. Ni tagri ni suiniimaŋa a basi wabaata nyeka ate wabaataŋa kan kaasi ni. 31Ni basi waba tii meena ate ni tom la abe ni ta suiniim paala ale popola paala. Ka boa ale soa ate ni a yaali ayen ni kpi, Izirali demma? 32Mi Nyɔnɔwa Naawen ale weeni ayen m kan yaali ayen waai kpi, dila nyiŋ ni tagri ni suiniimaŋa ale ni nyeka ate ni boro.
S'ha seleccionat:
Ezekiel 18: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation