Ezekiel 17
17
1Naawen yaa biisi ale mi ayen, 2<<Saalɔ biiga, yaali wamagsini a magsi te Izirali demma. 3Weeni ba ayen, <Nyɔnɔwa Naawen ale biisi diila ale nna, Ayen jiiruk tanjaŋi ale kiŋkaŋ kpiema ale kɔbta nna ŋmiriŋmiri ale jam Lebanon a yaa yik nyunyoŋ ŋmai naŋsa. 4A yaa dari ŋmanni naŋsa a passi a ta jam geruŋdɔba tɛŋ, a yaa vuk geruŋdɔma tɛŋka. 5Jiirukku yaali ŋanbie yaa bori tɛŋ maŋ po a moata nyiam yegayega jigi. Wa bori ate di nyini a chim ase ka tiib buui ale bo nyiam jigi la. 6Bu yaa teeri ase tunuŋ la a lik tɛŋka. Vaataŋa yaa tulim tuk jiirukku nyiŋ, alege bu tɛŋka naŋsaŋa a bo jiirukku naŋsa tɛŋ. Ate binni yaa chim ase tunuŋ la ate naŋsaŋa a chim a ta vaata.
7<< <Alege jiiruk tanjaŋi ku choa ale kiŋkaŋ kpiema ale kɔbta nna ŋmiriŋmiri ale jam boro. Tiimu yaa gbeliŋ bu tɛŋ naŋsaŋa a tuk jiirukku nyiŋ. Bu yaa teeri bu ŋmanni naŋsaŋa a ta va kauk kuui ate ba vuk tuk jiirukku nyiŋla ayen ku baga a zaŋti bu. 8Ba vuk bu ka tɛŋ maŋ jigi nyiam yegayega jigi ate bu baga a waaŋ naŋsa a yɔni yɔna. Ate bu yaa chim tiib maŋ.>
9<<Weeni ba ayen, <Nyɔnɔwa Naawen ale biisi diila ale nna, Tiimu a kan kasim a chimu. Niŋ jiirukku ale dari bu naŋsaŋa a voori a cheri bu yɔnaŋa. Ate tiimu ale bu va paalitaŋa a jak a kpi. Ku kan pai daa ni pagrisa yaase nuruba yegayega ate ba dari bu naŋsaŋa a voori. 10Ba dan poom ŋman vuk bu, bu kan kasim a chim. Bu le jak kama a kpi meena ase kori geŋ vioku a nin fuk bu kauk kuui ate bu chim la.> >>
11Naawen yaa ŋman biisi ale mi ayen, 12<<Yɔgyɔgla de weeni nuru baai ale zɛri a kan zuli mi la ayen, <Ni sebi wieŋa de kiriya?> Weeni ayen, <Babilon naawa a jam ka Jerusalem a yik ba naawa ale ba nuru kpientaŋa a ta jam Babilon. 13Wa yaa yik Juda naawa dɔk denɔ wanyi a nye nɔiyeŋ ale wa ale fɛ wa ate wa pɛ. Naawa yaa ta Juda niŋdeerɔma mɛ a cheŋ. 14Ayen ba nye ate tɛŋka a wobsa ate ka kan ŋman pagra. Ate Juda tɛŋka yaa kasim a ta nɔiyeŋ ale Babilon naawa. 15Alege Juda naawa a yaa ŋman ta chaab ale Babilon naawa wa le tom nuruba ate ba cheŋ Ejipiti a bek a yaali wusuma ale tugurik tɔŋdɔba la. Juda naawa ale nya suik a nyini? Waai ale a nye wieŋa de chaab ale chali bɛ? Wa kan kaasi nɔiyeŋka ale chali bɛ.
16<< <Mi Nyɔnɔwa Naawen a weeni ayen: Mi ale vua la, fi le kpi Babilon tɛŋka po, tɛŋ kaai naab ale basi ate fi chim Juda naab la. Juda naawa a kisi pumpuulimaŋa ŋaai ate wa nye ale Babilon naawa la kama yaa yik nɔiyeŋka a kaasi. 17Ejipiti naawa ale wa tugurik tɔŋdɔ pagrisa ale nuruba yegayega a kan maari Juda kpaliŋka po. Babilon demma ale zɔk a nye wie ale ŋanta a siti tɛŋsaŋa a ko nuruba yega. 18Juda naawa a sak kama ayen wa kisi pumpuulimaŋa a yaa yik nɔiyeŋka ba nye la a kaasi. Wa puulim kama ayen wa le maari Babilon, alege nye wieŋa de meena. Dila wa kan bɛ.
19<< <Dila la Nyɔnɔwa Naawen ale biisi diila ale nna, wa ale vua la wa le tuni Juda naawa wa le kisi wa pumpuulimaŋa alege kaasi ba nɔiyeŋka la. 20M le yuk m ŋmiaka a vi wa zuk a yik wa. A yaa ta wa jam Babilon. Dula jigini m le namsi wa, wa le kan ta siaka a nye mi wieŋa meena a kaasi ŋa la. 21Wa tugurik tɔŋdɔba maŋ sii ale jam kan kpi la ba le ko ba ale gebi kpieŋ. Baai ale a vuuk la m le basi ate ba waaŋ jigi meena. Ate fi seba ayen ka mi Naawen ale weeni.
22<<Nyɔnɔwa Naawen ale biisi diila ale nna, Mi dek ale pai nyunyoŋ tiimu naŋ pɔli a vuk. M le gbesi va paalukku ale pusi a nyini naŋ pɔnni zuk la a ta ga vuk guuk kuui ale woŋŋa zuk. 23M le vuk ka Izirali guuk kpioŋku zuk. Ate ku yaa waaŋ naŋsa a yɔni yɔna a chim nyunyoŋ tiib kpioŋ. Nuinsa buuri ale yɔk tugta bu zuk a bo bu naŋsaŋa yɔgsummu po. 24Ate tiisaŋa meena ale bo tɛŋka po la a seba ayen mi ka Naawen. Mi a basi kama ate tiib buui ale woŋŋa a gela ate tiib buui ale gela a woŋŋa. A basi ate tiib yɔgsuk a ko ale a basi ate tiib kosik a yɔgsa. Mi ale Naawen. Mi abe le biisi. M bɛ le nye.> >>
S'ha seleccionat:
Ezekiel 17: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation