Ezekiel 19
19
1<<Leni kuun yiili a te Izirali niŋdeerɔma. 2Leni ayen, ni mawa a nye ase ka gbeŋ nubi la. A doa gbeŋ bisaŋa suŋsuŋ. Di ta ka bisa yegayega. 3Di ni wuuk di bisaŋa dinyi la, di yaa pak a pagra. Di zamsi di ni di yik duŋsa a dari a passi diila, ale a ŋɔbi nuruba. 4Tɛŋ kpieŋsaŋa a wom di wari kama. Ate ba bari yik di, ba golukku po, a yaa ta di ale gɔtik a jam Ejipiti.
5<<Gbeŋ nubini yaa limisi a nya ayen yiila ŋman ka gbeŋ biika jigi ya. Di yaa ŋman pai di biika dinyi a nye ate di pagra. 6Gbeŋ biika de yaa nyiem gbeŋmaŋa suŋsuŋ. Di yaa ka gbeŋ pagrik. Di zamsi duŋsaŋa yikka ale a ŋɔbi nuruba mɛ. 7Di kaasi ba jigi pagrisaŋa meena ale kaasi ba tɛŋ pagrisaŋa meena. Tɛŋka ale jaab meena ale bo ka po la yɔgsum yik ba ale gbeŋli nuemka. 8Tɛŋ sii meena ale gilim ka la a ta chaab ale ka, a yaa yuk ba ŋmiaka a vi ka zuk. A yik ka ba golukku po. 9Ba yaa bobi ka a pai nyo jaab po a ta jam Babilon. A yaa pai wa nyo likka dɔk po ate ba kaa wom ka nuemka Izirali guutaŋa zuima.
10<<Fi mawa a nye ase ka tiib la a bo kaduksaŋa po a moata nyiam. Tiimu yaa ta naŋsa yegayega a yɔni yɔna piisi dii nyiŋla nyiam yega ale boro. 11Tiimu yaa ta naŋ pagrisa, a nala mɛ a magsi naab tachek. Tiimu yaa wɔŋa tiisaŋa meena po. Ate ba a nya bu dii nyiŋla bu wɔŋa kama ale ta naŋsa yega. 12Alege ba dari bu voori ale suipuurum a pai bu yuk basi tɛŋ. Kori geŋ vioku yaa fuk bu a ko. Ba gbesi bu yɔnaŋa meena. Ba wɛ bu naŋsaŋa meena a ju bolim. 13Yɔgyɔgla ba vuk tiimu ka tɛŋ kaai ate ŋmoruk a kan ni. Ate ka ko alege nyanyuila mɛ a boro. 14Bolim yaa dɛ tiimu suŋsuŋ naŋka a kaasi bu yɔnaŋa. Naŋ pagrik an ŋman tali bu zuwa a magsi naab tachega. Kuub yiili ale nna. Ni pai di a lenni kuun yiili.>>
S'ha seleccionat:
Ezekiel 19: BWU
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2023, Ghana Institute of Linguistics, Literacy and Bible Translation