ШӀошъхъуныгъэ зиӀэхэу Рим къэлэшхом дэсхэм апостол Паул тхылъэу афитхыгъэр 3
3
ЯЩЭНЭРЭШЪХЬ
1Ащыгъум уджуртыныр сыда зэрэнахьышӀур? Е сунэт уашӀыгъэмэ, сыд ишӀуагъэу къакӀорэр? 2Лъэныкъо пстэумкӀи ишӀуагъэу къакӀорэр бэу ины. Ыпэ рапшӀэу, Тхьэм игущыӀэхэр къызӀэкӀилъхьагъэхэр джуртхэр ары.
3Ахэмэ ащыщ пчъагъэхэр шъыпкъагъэ ямыӀэу къычӀэкӀыгъэхэмэ, ахэмэ ямышъыпкъагъэ Тхьэм ишъыпкъагъэ ыгъэкӀодышъущта? 4Хьау, ыгъэкӀодышъущтэп. Тхьэр сыдигъуи шъыпкъэ, ау хэтрэ цӀыфи пцӀыус, Тхьэм игущыӀэ тхыгъэхэм зэрарытым фэдэу#3:4 Тхьэм игущыӀэ тхыгъэхэм зэрарытым фэдэу – яплъ Орэд ЛъапӀэхэм 50:6.,
«О Тхьэ, гущыӀэхэу къапӀохэрэмкӀэ узаф,
уагъэмысэми, уишъыпкъагъэ атекӀощт».
5Тэ тибзэджагъэ Тхьэр зэрэшъыпкъэр нахь къегъэнафэмэ, сыд тӀона? Игубж къызыттырилъхьэкӀэ, Тхьэр мызафэу тӀона? ЦӀыфхэр къызэрэгущыӀэхэрэм фэдэу, ахэр къэсэӀох. 6Хьау, ар хъухэщтэп. Тхьэр зафэ. Тхьэр мызафэмэ, дунаим ицӀыфхэм сыдэущтэу хьыкум атыришӀыхьэшъущта? 7Зыгорэм моущтэу къыӀонкӀи мэхъу: «Сэ симышъыпкъагъэ Тхьэр зэрэшъыпкъэр нахь къыхигъэщэу, Тхьэм ищытхъушхо цӀыфхэм нахьышӀоу къаригъэлъэгъумэ, псэкӀод зышӀэрэм фэдэу Тхьэм сыда сызкӀигъэмысэщтыр?» 8ШӀугъи къыхэкӀыным пае, бзэджагъэ тшӀэна? А гущыӀэ дэдэхэр тыжэ къыдэкӀыгъэхэу аӀозэ, цӀыф заулэхэм ӀаекӀэ тигугъу ашӀы. Тхьэм ащ фэдэ цӀыфхэм яфэшъуашэр аригъэпщыныжьыщт.
Шъыпкъагъэ зиӀэ цӀыф зи щыӀэп
9Сыд етӀанэ, тэ, джуртхэр, нэмыкӀ цӀыфхэм танахьышӀуа? Хьау, тэ зыкӀи танахьышӀоп. Джурт пстэури, нэмыкӀ лъэпкъхэм ащыщ пстэури псэкӀодым ыӀэ зэрилъхэр къэдгъэнэфагъ, 10Тхьэм игущыӀэ тхыгъэхэм зэрарытым фэдэу#3:10-18 Тхьэм игущыӀэ тхыгъэхэм зэрарытым фэдэу – яплъ Орэд ЛъапӀэхэм 13:1-3; 5:10; 139:4; 9:28 Пегъымбар Ешайа тхылъэу ытхыгъэм 59:7-8; Орэд ЛъапӀэхэм 35:2. ,
«Шъыпкъагъэ зиӀэ цӀыф зи щыӀэп.
11ЗэхэшӀыкӀ зиӀэ цӀыфи щыӀэп, Тхьэм игъогу лъыхъурэ цӀыфи щыӀэп.
12ЗэкӀэри Тхьэм игъогу текӀыгъэх; зэкӀэми пкӀэ ямыӀэжь хъугъэ. ШӀу зышӀэрэ зи щыӀэп.
13Ачыйхэр шъхьэ зытемылъ къэ шӀоихэм афэдэх. АбзэгукӀэ цӀыфхэр агъапцӀэх. Блэм ищэнаут аӀупэхэм ателъ.
14Ажэхэми хъонэным идыдж адиз.
15Ахэр цӀыфым ылъ агъэчъэным лъэчъэх.
16Тыдэ кӀуагъэхэми, цӀыфхэр щагъэкӀодых, къин щарагъэщэчы.
17Зэзэгъыныгъэм игъогу ашӀэрэп.
18Тхьэм ишӀолӀыкӀ агухэм арылъэп».
19Тэурат хабзэм къыӀохэрэр Тэурат хабзэм ыӀэчӀэгъ чӀэт цӀыфхэм зэрариӀохэрэр тэшӀэ. Аущтэу цӀыф пстэуми ажэ аригъэубытыгъэу хъугъэ, дунаим тет цӀыф пстэури Тхьэм дэжькӀэ мысэ хъугъэ, 20сыда пӀомэ, цӀыф горэм Тэурат хабзэм итхэр зэригъэцакӀэхэрэмкӀэ Тхьэм дэжькӀэ шъыпкъагъэ иӀэ хъущтэп. Ау Тэурат хабзэм итхэр арых псэкӀод зэрэтшӀагъэр тэзгъашӀэхэрэр.
ЦӀыфхэм яшӀошъхъуныгъэкӀэ Тхьэм дэжькӀэ шъыпкъагъэ яӀэ зэрэхъурэр
21Джы Тэурат хабзэм иӀоф хэмылъэу, Тхьэм ежь дэжькӀэ цӀыфхэм шъыпкъагъэ яӀэу зэрилъытэрэ гъогур къыгъэнэфагъ. Тэурат хабзэм итхэмрэ пегъымбархэм къаӀуагъэхэмрэ#3:21 Тэурат хабзэм итхэмрэ пегъымбархэм къаӀуагъэхэмрэ – мыщ къикӀырэр джуртхэм ятхылъ лъэпӀэ пстэури ары. а гъогум шыхьат фэхъух. 22Исус ХристоскӀэ шӀошъхъуныгъэу яӀэм игъогу ары Тхьэм ежь дэжькӀэ цӀыфхэм шъыпкъагъэ яӀэу зэрилъытэрэ гъогур. ХристоскӀэ шӀошъхъуныгъэ зиӀэ пстэуми шъыпкъагъэ яӀэу елъытэ. ЦӀыф зэхэдз зи щыӀэп, 23сыда пӀомэ, цӀыф пстэуми псэкӀод ашӀагъ, Тхьэм дэжь къикӀырэ щытхъушхомкӀи Ӏахь яӀэп. 24Христос Исус ашъхьэ зэрищэфыжьыгъэм пае, Тхьэм ынэшӀу щыфэнымкӀэ уасэ амытэу ежь дэжькӀэ шъыпкъагъэ яӀэу елъытэ. 25ИсускӀэ шӀошъхъуныгъэ зиӀэхэр ащ ылъэу къащым щыкӀэкӀыщтымкӀэ Тхьэм ежь зэригъэшӀужьынхэм пае, Исус къурмэныпхъэу ыгъэнэфагъ. Тхьэм ишъыпкъагъэ къыгъэшъыпкъэжьынэу ары Исус къурмэныпхъэу зыкӀигъэнэфагъэр. Сыда пӀомэ, Тхьэм игушъэбагъэкӀэ пасэм цӀыфхэм япсэкӀодшӀагъэхэр аригъэпщыныжьыгъагъэхэп. 26Ащ нэмыкӀэу Тхьэм Исус къурмэныпхъэу зыкӀигъэнэфагъэр джырэ лъэхъаными ежь ишъыпкъагъэ къыгъэшъыпкъэжьыныр ары: ежь шъыпкъагъэ зэриӀэри, ИсускӀэ шӀошъхъуныгъэ зиӀэхэми ежь дэжькӀэ шъыпкъагъэ яӀэу зэрилъытэхэрэри ары Тхьэм ащ фэдэу къыгъэлъагъорэр.
27Ащыгъум тызэрэзыщытхъужьрэр щыӀэжьа? Хьау, щыӀэжьэп. Тара хабзэу ар зыӀорэр? Ӏофхэу тшӀэн фаехэр зыӀорэ хабзэр ара? Хьау, шӀошъхъуныгъэм ихабз ары. 28Сыда пӀомэ, цӀыфым шӀошъхъуныгъэ зэриӀэм пае, Тхьэм ежь дэжькӀэ ащ шъыпкъагъэ иӀэу зэрилъытэрэр тшӀошъ мэхъу. Тэурат хабзэм иӀоф ащ хэлъэп. 29Тхьэр джурт закъохэм я Тхьа, хьауми нэмыкӀ лъэпкъхэми я Тхьа? Ары адэ, нэмыкӀ лъэпкъхэми я Тхь. 30Сыда пӀомэ, зы Тхьэ закъо нахь щыӀэп. Сунэт ашӀыгъэхэм шӀошъхъуныгъэ зэряӀэм пае, Тхьэм ежь дэжькӀэ ахэмэ шъыпкъагъэ яӀэу ылъытэщтых, сунэт амышӀыгъэхэми яшӀошъхъуныгъэкӀэ Тхьэм дэжькӀэ шъыпкъагъэ яӀэщт. 31Аущтэу тӀомэ, шӀошъхъуныгъэмкӀэ Тэурат хабзэр тэгъэкӀода? Хьау, дгъэкӀодырэп, Тэурат хабзэр къэтэгъэшъыпкъэжьы нахь.
© Институт перевода Библии, 1991, 1992, 2014. Стокгольм