ШӀошъхъуныгъэ зиӀэхэу Рим къэлэшхом дэсхэм апостол Паул тхылъэу афитхыгъэр 2
2
ЯТӀОНЭРЭШЪХЬ
Тхьэм цӀыфхэм хьыкум зэратыришӀыхьэрэр зафэ
1О хэт ущыщми, нэмыкӀ горэ бгъэмысэмэ, зызэрэбгъэхыежьын зи щыӀэп. Ар зэрэбгъэмысэрэмкӀэ о зыогъэмысэжьы, сыда пӀомэ, адрэр зэрыбгъэмысэрэ Ӏофхэр ори ошӀэх. 2Ащ фэдэ Ӏофхэр зышӀэхэрэм Тхьэм шъыпкъэм тетэу хьыкум зэратыришӀыхьащтыр тэшӀэ. 3Ау а Ӏофхэр зышӀэхэрэр о бгъэмысэхэзэ, ори ахэмэ ашӀагъэм фэдэ пшӀэу, Тхьэм ихьыкум къыптыримышӀыхьанэу огугъа? 4Хьауми Тхьэм ишӀугъэшхо, ыгу ишъэбэгъэшхо, ищэӀэгъэшхо зэмыпэсхэу ара? Тхьэм ишӀугъэшхокӀэ уипсэкӀодхэм уафыкӀэгъожьынэу игъо узэрэригъафэрэр къыбгурыӀорэба?
5Ау уигуркъагъэкӀи, угукӀэ уипсэкӀодхэм узэрафыкӀэмыгъожьырэмкӀи Тхьэм игубжырэ ихьыкум зафэрэ къызылъэгъощт мафэм Тхьэм губжэу къыптырилъхьащтым хэогъахъо. 6Тхьэм хэти Ӏофэу ышӀагъэхэм яфэшъуашэ ригъэгъотыжьыщт. 7ШӀушӀэным ыуж имыкӀхэу, щытхъушхом, лъытэныгъэшхом, мылӀэныгъэм ауж итхэм мыкӀодыжьын щыӀэныгъэ аритыщт. 8Ау зызгъэкъаигъэхэу, шъыпкъэм фэмыӀорышӀэхэу, бзэджагъэм ыӀэ зизылъхьэрэ цӀыфхэм Тхьэм игубжышхо къалъигъэӀэсыщт. 9Тхьэм хэти бзэджагъэ зышӀэрэм гузэжъогъурэ гухэкӀрэ къылъигъэӀэсыщт, апэу – джуртым, етӀанэ – мыджуртым. 10Ау Тхьэм хэти шӀу зышӀэрэм щытхъур, лъытэныгъэр, гупсэфыр къылъигъэӀэсыщт, апэу – джуртым, етӀанэ – мыджуртым. 11Сыда пӀомэ, ятеплъэ емыплъэу, цӀыф пстэури Тхьэм изэфэд.
12Пегъымбар Мусэ и Тэурат хабзэ зимыӀэхэу, псэкӀод зышӀэгъэ цӀыф пстэури хэбзэнчъэхэу кӀодыжьыщтых, Тэурат хабзэр ямыӀагъэ пэтми. Тэурат хабзэм ыӀэчӀэгъ чӀэтхэу, псэкӀод зышӀэгъэ цӀыф пстэури Тэурат хабзэм тетэу Тхьэм ыгъэмысэщтых. 13Сыда пӀомэ, Тэурат хабзэм итхэр зэхэзыххэрэр арэп Тхьэм дэжькӀэ шъыпкъагъэ зиӀэхэр, Тэурат хабзэм итхэр зыгъэцакӀэхэрэр ары нахь. 14Хымэ лъэпкъхэм#2:14 хымэ лъэпкъхэр – мыджуртхэр ары. ащыщхэу Тэурат хабзэр зимыӀэхэм гурыӀоныгъэу ахэлъымкӀэ Тэурат хабзэм итхэр загъэцакӀэхэкӀэ, Тэурат хабзэр ямыӀэ пэтми, хабзэр зыфэдэр зэрашӀэрэр къагъэлъагъо, 15сыда пӀомэ, Тэурат хабзэм иунашъохэр агухэм арытхагъэхэу зэрарылъхэр а цӀыфхэм къагъэлъагъо. Аущтэу зэрэхъугъэр агухэми къаушыхьаты, а цӀыфхэм ягупшысэхэмкӀи зэ загъэмысэ, зэ загъэхые. 16А Ӏофыр ащ зэрэтетыр нафэ хъущт, къэбарышӀоу згъэӀурэм тетэу, цӀыфхэм агухэм арылъ шъэфхэм Тхьэм Исус Христос иӀэмыркӀэ хьыкум зыщатыришӀыхьащт мафэм.
Джуртхэмрэ Тэурат хабзэмрэ
17Мары – «сэ сыджурт», – оӀо. Тэурат хабзэм ущэгугъы, «Тхьэр сэшӀэ» пӀозэ, узщэтхъужьы. 18Тэурат хабзэм итхэр зэрэуагъэшӀагъэм пае, Тхьэр зыфаер ошӀэ, дэгъур зыфэдэри зэхэпшӀыкӀын плъэкӀыщт. 19ШӀэныгъэ пстэури шъыпкъэ пстэури зэрыт Тэурат хабзэр о пӀэ илъэу, нэшъухэм уряпэрытэу, шӀункӀым хэтхэми урянэфынэу узщэгугъыжьы. 20ШӀэныгъэ зимыӀэхэм агурызгъэӀощтыр орэу, ныбжьыкӀэхэми Ӏофхэр язгъэшӀэщтыр орэу узщэгугъыжьы. 21НэмыкӀ цӀыфыр огъасэ, ау ор-орэу зыогъаса? 22ЦӀыфхэм мытыгъонхэу яоӀо, о пшъхьэкӀэ отыгъуа? «Зинэ шъумышӀы» цӀыфхэм яоӀо, о пшъхьэкӀэ зинэ ошӀа? ӀэрышӀ тхьэ нэпцӀхэр зэмыпэсхэзэ, ахэр зычӀэт унэхэр охъункӀэха? 23Тэурат хабзэр зэрэуиӀэм пае узщэтхъужьы, ау Тэурат хабзэм итхэм узэратекӀырэмкӀэ Тхьэр огъэпыута? 24Тхьэм игущыӀэ тхыгъэхэм зэрарытэу#2:24 Тхьэм игущыӀэ тхыгъэхэм зэрарытэу – еплъ Пегъымбар Ешайа тхылъэу ытхыгъэм 52:5.: «Шъощ пае хымэ лъэпкъхэм ащыщхэр Тхьэм ыцӀэ ехъоных».
25Сунэт#2:25 сунэт – Еплъ Пегъымбар Мусэ апэрэ тхылъэу ытхыгъэм (УблапӀэм) 17:9-14. уашӀыным пкӀэ иӀ, Тэурат хабзэм итхэр зыбгъэцакӀэхэкӀэ. Ау Тэурат хабзэм итхэм уатекӀымэ, сунэт уашӀыгъэ пэтми, сунэт уамышӀыгъэм фэд. 26Сунэт амышӀыгъэ цӀыфым Тэурат хабзэм иунашъохэр ыгъэцакӀэхэмэ, сунэт амышӀыгъэми, Тхьэм ар сунэт ашӀыгъэ цӀыфым фэдэу ылъытэнба? 27Ащыгъум пкъымкӀэ сунэт амышӀыгъэ цӀыфэу Тэурат хабзэм итхэр зыгъэцакӀэрэм, о, сунэт ашӀыгъэр, уигъэмысэщт. Сыда пӀомэ, Тэурат хабзэу тхыгъэр о пӀэ илъэу, сунэт уашӀыгъэ пэтми, Тэурат хабзэм итхэм уатекӀы. 28Сыда пӀомэ, итеплъэкӀэ джуртым фэдэу къэлъагъорэр арэп джурт шъыпкъэр, сунэтэу пкъым къыхэщэу ашӀырэри арэп сунэт шъыпкъэр. 29Ау джурт шъыпкъэр ыгукӀэ джуртыр ары. Сунэт шъыпкъэр сунэтэу гум илъыр ары. Ар зыпкъ къикӀырэр тхыгъэ горэп, Тхьэм ы Псэ ЛъапӀ ары нахь. Ащ фэдэ цӀыфым ищытхъу цӀыфым дэжь къикӀырэп, Тхьэм дэжь къекӀы нахь.
© Институт перевода Библии, 1991, 1992, 2014. Стокгольм