ШӀошъхъуныгъэ зиӀэхэу Рим къэлэшхом дэсхэм апостол Паул тхылъэу афитхыгъэр 4
4
ЯПЛӀЭНЭРЭШЪХЬ
Ибрахьимэ икъэбар шӀошъхъуныгъэм къикӀырэр къызэригъэнафэрэр
1Тятэжъышхо Ибрахьимэ ехьылӀагъэу сыда тӀощтыр? Ежь-ежьырэу сыд ыгъэхъагъэр? 2Ибрахьимэ ышӀэгъэ Ӏофхэм апае, Тхьэм ежь дэжькӀэ шъыпкъагъэ иӀэу ылъытагъэмэ, Ибрахьимэ зызэрызыщытхъужьынэу горэ иӀэщтыгъ – ау Тхьэм дэжьыкӀэп. 3Сыда пӀомэ, Тхьэм игущыӀэ тхыгъэхэм сыда арытыр?#4:3 Тхьэм игущыӀэ тхыгъэхэм арытыр – еплъ Пегъымбар Мусэ апэрэ тхылъэу ытхыгъэм (УблапӀэм) 15:6. «Ибрахьимэ ТхьэмкӀэ шӀошъхъуныгъэ иӀэ хъугъэти, Тхьэм ежь дэжькӀэ ащ шъыпкъагъэ иӀэу ылъытагъ».
4Зыгорэм Ӏоф зишӀэкӀэ, лэжьапкӀэр тынэу къыратырэп, ифэшъуашэшъ къыраты нахь. 5Ау шӀушӀагъэхэм ащымыгугъырэ цӀыфэу ТхьэмкӀэ шӀошъхъуныгъэ зиӀэм иӀоф зытетыр мары. А цӀыфым ТхьэмкӀэ шӀошъхъуныгъэ зэриӀэм пае, ащ къикӀырэр Тхьэу псэкӀод зышӀэгъэ цӀыфхэм ежь дэжькӀэ шъыпкъагъэ яӀэу зылъытэн зылъэкӀырэмкӀэ шӀошъхъуныгъэ зэриӀэм пае, Тхьэм ежь дэжькӀэ а цӀыфым шъыпкъагъэ иӀэу ылъытэщт. 6Джары пачъыхьэ Даути зытегущыӀагъэр, шӀушӀагъэхэм яӀоф хэмылъэу, Тхьэм ежь дэжькӀэ шъыпкъагъэ иӀэу ылъытэрэ цӀыфыр гъогу мафэ зэрэтеуцуагъэр къызеӀом#4:6-8 Даути… къызеӀом, – яплъ Орэд ЛъапӀэхэм 31:1-2.:
7«ЗибзэджэшӀагъэхэр Тхьэм зыфигъэгъугъэхэу,
зипсэкӀодхэр зыфигъэкӀодыгъэ цӀыфхэр гъогу мафэ теуцуагъэх.
8Зиусхьаным зипсэкӀодхэр зыфимылъытэрэ цӀыфыр гъогу мафэ теуцуагъ».
9А гъогу мафэр зыгъотхэрэр сунэт ашӀыгъэхэм язакъоу ара, хьауми сунэт амышӀыгъэхэри ара? Сунэт амышӀыгъэхэри ары, сыда пӀомэ, Ибрахьимэ шӀошъхъуныгъэ иӀэ зэрэхъугъэм пае, Тхьэм ежь дэжькӀэ ащ шъыпкъагъэ иӀэу зэрилъытагъэр къэтӀуагъ. 10Тхьэм ежь дэжькӀэ Ибрахьимэ шъыпкъагъэ иӀэу зилъытагъэр Ибрахьимэ сунэт ашӀыным ыпа, хьауми ыужа? Ыужэп, ып. 11Ибрахьимэ сунэт ашӀыным ыпэкӀэ, шӀошъхъуныгъэ зэриӀагъэм пае, Тхьэм ежь дэжькӀэ ащ шъыпкъагъэ иӀэу зэрилъытагъэр къэзгъэлъагъорэ мыхъурэу е тамыгъэу сунэт шӀыныр ащ къыфигъэнагъ. А Ӏофыр ащ зытеткӀэ, Ибрахьимэ сунэт амышӀыгъэ цӀыфхэу шӀошъхъуныгъэ зиӀэхэм ятэ фэдэу афэхъу, Тхьэм ежь дэжькӀэ ахэми шъыпкъагъэ яӀэу ылъытэным пае. 12Ибрахьимэ сунэт ашӀыгъэ цӀыфхэми ятэм фэдэ афэхъу. Ахэми ты фэдэу зыкӀафэхъугъэр сунэт зэрашӀыгъэхэм изакъоп, ахэр Ибрахьимэ илъэужхэм атехьагъэхэу, ар сунэт ашӀыным ыпэ, шӀошъхъуныгъэм игъогоу зэрыкӀуагъэм ахэри зэрэрыкӀохэрэри ары.
Ибрахьимэ Тхьэм зэрэщыгугъыгъэм пае, Тхьэм къызэригъэгугъагъэр иӀэ хъугъэ
13Тхьэм Ибрахьимэрэ ащ къытекӀыщт цӀыфхэмрэ къыгъэгугъагъэх чӀылъэр яӀахьышӀоу къызэралъыӀэсыщтымкӀэ. Ибрахьимэ Тэурат хабзэм итхэр ыгъэцэкӀагъэхэу арэп Тхьэм а ӀахьышӀумкӀэ зыкӀигъэгугъагъэр, ау Ибрахьимэ шӀошъхъуныгъэ зэриӀагъэм пае, Тхьэм ежь дэжькӀэ ащ шъыпкъагъэ иӀэу зэрилъытагъэр ары нахь. 14Тэурат хабзэм итхэр зыгъэцакӀэхэрэр арыгъэмэ, Тхьэм цӀыфхэр къызэригъэгугъэгъэ ӀахьышӀур къызылъыӀэсыщтхэр, ащыгъум шӀошъхъуныгъэр хьаулые хъущтыгъ, Тхьэм къызэригъэгугъагъэми пкӀэ иӀэщтыгъэп. 15Сыда пӀомэ, Тэурат хабзэм Тхьэм игубж къехьы, ау хэбзэ унашъо зыдэщымыӀэм хэбзэ укъони щыӀэп.
16Арышъ, Тхьэм къыгъэгугъагъэхэр шӀошъхъуныгъэ зиӀэхэр ары. Аущтэу зыкӀэхъугъэр Тхьэм тыкъызэригъэгугъэгъэ Ӏофхэр ынэшӀу щыфэныгъэкӀэ къызэрэтитырэр нафэ хъунри ары, шӀошъхъуныгъэ зиӀэхэу, Ибрахьимэ къытекӀыгъэ цӀыф пстэуми Тхьэм къызэригъэгугъэгъэ Ӏофхэр агъотышъунри ары. Ибрахьимэ къытекӀыгъэ цӀыфхэу зыфасӀохэрэр Тэурат хабзэм тетхэм ямызакъоу, Тэурат хабзэм темытхэу Ибрахьимэ шӀошъхъуныгъэу иӀагъэм фэдэ шӀошъхъуныгъэ зиӀэхэри ары. Шъыпкъэ, Ибрахьимэ тэ пстэуми тятэм фэд, 17Тхьэм Ибрахьимэ риӀуагъэу, Тхьэм игущыӀэ тхыгъэхэм зэрарытым фэдэу#4:17 Тхьэм игущыӀэ тхыгъэхэм зэрарытым фэдэу – еплъ Пегъымбар Мусэ апэрэ тхылъэу ытхыгъэм (УблапӀэм) 17:5. , «Лъэпкъ Ӏаджыми ты уафэхъунэу узгъэнэфагъ». Тхьэм дэжькӀэ Ибрахьимэ тэ пстэуми тят. Тхьэр ары Ибрахьимэ шӀошъхъуныгъэ зыфыриӀагъэр – Тхьэу лӀагъэхэр къэзгъэхъужьрэр, илъэкӀыкӀи щымыӀэ Ӏофхэр къэзгъэхъурэр.
18ГугъапӀэ зыщэмыӀэжьым, Ибрахьимэ Тхьэм щыгугъэу, шӀошъхъуныгъэ иӀагъ. Аущтэу, «О къыптекӀыщт цӀыфхэр уашъом ижъуагъохэм афэдизхэу бэ хъущтых» ыӀуи, Тхьэм ащ къызэрэриӀогъагъэм фэдэ къабзэу#4:18 Тхьэм ащ къызэрэриӀогъагъэм фэдэ къабзэу – еплъ Пегъымбар Мусэ апэрэ тхылъэу ытхыгъэм (УблапӀэм) 15:5., Ибрахьимэ лъэпкъ Ӏаджыми ты афэхъугъ. 19ИшӀошъхъуныгъэ зи къыщымыкӀэу, ыпкъ лӀэныгъэм пэблагъэ зэрэхъугъэм еплъыгъэп, сыда пӀомэ, илъэсишъэм пэгъунэгъугъэти ары – Сарэ сабый къызэрэхэмыкӀыщтми еплъыгъэп. 20ШӀошъхъуныгъэ иӀэу Тхьэм къызэригъэгугъагъэмкӀэ гуцафэ ышӀыгъэп Ибрахьимэ. ИшӀошъхъуныгъэ нахь пытэ хъуи, Тхьэм щытхъу фишӀыгъ. 21Тхьэм къызэригъэгугъагъэр ыгъэцэкӀэн зэрилъэкӀыщтым гугъэпӀэшхо фыриӀагъ ащ. 22ТхьэмкӀэ ащ фэдизэу шӀошъхъуныгъэ зэриӀагъэм пае, Тхьэм ежь дэжькӀэ ащ шъыпкъагъэ иӀэу ылъытагъ. 23«Тхьэм ежь дэжькӀэ ащ шъыпкъагъэ иӀэу ылъытагъ» зыфаӀорэ гущыӀэхэр зэхьылӀагъэхэр Ибрахьимэ изакъоп, 24тэри ары. Тхьэм ежь дэжькӀэ шъыпкъагъэ тиӀэу ылъытэщт – тэ, Исус Христосэу ти Зиусхьан лӀагъэхэм къахэзгъэтэджыкӀыжьыгъэ ТхьэмкӀэ шӀошъхъуныгъэ зиӀэхэр. 25Тэ псэкӀод зэрэтшӀагъэм пае, Тхьэм Исус лӀэныгъэм ӀэкӀигъэфагъ, ежь дэжькӀэ шъыпкъагъэ тиӀэу тилъытэным паий, Тхьэм ар лӀагъэхэм къахигъэтэджыкӀыжьыгъ.
© Институт перевода Библии, 1991, 1992, 2014. Стокгольм