Romam 8
8
Ti̱kuri a Fi̱ki̱m Kwamam
1Di̱ne yiko, ki̱ka̱ngu a ne kaiyakuwe bi̱bu ki̱bunti̱ Yesu Masiya. 2Di̱ne we di̱n Yesu Masiyanu, da wu a Fi̱ki̱m ki̱ni ti̱kurime a chakii we da ki̱letiye wu a bwa. 3Aya chi yilangu a mebu a mabe di̱ne ki̱taka a da bwiyangu, nang chitu a mantu. N Kwama tume Bwe ko ki̱kun yi wiine ki̱ni di̱ten bwi chi̱renu a ki̱letiye, ke a be bwa di̱ne ki̱leti chireyu, we yiko a yung ki̱letiyu ne di̱kan dukan we ni̱bu. 4N ki̱n a ma ti̱tu ko ke chi yilang ki̱badditu a ri we di̱chire, bi̱bu a yabu yayu we da bwiye aya ki̱ya yayu a Fi̱ki̱m Kwamam.
5Bi̱bu ki̱ tum ki̱ke bwiyemu, ki̱ma chitu bwi chiyu ki̱badditu aya bi̱bu a yo ni̱tu a chi Fi̱ki̱m Kwamam ki̱baddite, ki̱ma chi Fi̱ki̱mu ki̱badde. 6Yo ni̱re we da bwiye ki̱yikadu ki̱ni ni a wa̱re wa bwa̱ke aya yo ni̱re we wa̱re Fi̱ki̱me ki̱ni ti̱kuri n ti li̱mang. 7Kanang wuwule niye wu ki̱yadu a da bwiye, a kau fakware Kwama di̱ne a yabu yayu we ki̱ke Kwama we bi̱yili̱mu, n ki̱n a ne me yayu we yilang Kwamangu n ki̱n a ne medu ka madu. 8N Kwama a nwebu ta̱ma̱ng ki̱ni bi̱bu ki̱bunti̱ da bwiyemu.
9Aya n ti̱n ta bunti̱bu chi bwiyu ki̱ badditu. Ti̱bunti̱ chi a ki̱ke Fi̱ki̱me, ka Fi̱ki̱m Kwamamu ki̱swedu we di̱ chi̱ne, ka nang wuwule niye wu a newe ki̱ni Fi̱ki̱m Yesumu, a newe kwa̱l Masiya. 10Ka m Masiya we ware n ti mune, bwi mwiyu ki̱bwadu di̱ne bwila aya Fi̱ki̱m mumu a ne bwadu di̱ne n Kwama a yo chi̱n a ni̱bu yilem. 11Ka Fi̱ki̱m Kwamamu bi̱bu a kuku Yesu a furumu, nang bi̱bu a bwi chiyime, n ki̱n wa kuku Yesu we fure, ka ni kwa̱mi chiyu ti̱kuri ki̱ni Fi̱ki̱m ki̱mu ki̱ swedu ti chini̱mu.
12Di̱ne yiko kebu mi̱m, n chi̱ni ki̱ni ki̱dada̱ku. Aya n ke wu yayu wu a da bwiye ki̱badde. 13Di̱ne ka ni ya yayu a da bwiye, ni bwadu. Aya ka ta du nangang bwiyangu ta yadu a Fi̱ki̱me, ta swidu. 14Nangki̱n, bi̱bu Fi̱ki̱m Kwama a ti chimi̱n kaki̱mu, bwesi̱m Kwamam. 15Di̱ne Fi̱ki̱m a bwi chi̱reme, A dakabu ta wul tayu yinang ka̱bii. Fi̱ki̱mu a bwi chini̱mu a yo chi̱n bwesi̱m bi̱suti̱ri̱m we di̱Kwama, tani̱n ma di̱yalu a di̱Kwama ko, Tete, 16Fi̱ki̱m Kwamamu ti bi̱chiremu ki̱yungdu ko n chini bwesi̱m Kwamam. 17Yo kwer ki̱ka̱ngu n chi̱ni bi̱u Kwama, ni chau kula wa delaku Kwamange, ni kau fati̱bu Yesu Masiya we kula Kwama. Yo niyang nwe riye n ti Yesuwe, ni yati̱ dwiyentu ware we kakku Kwamangu.
Dwiyen ti̱tu a kakki
18We da̱ngki̱ mangu, riye ni nwedu ki̱ka̱nge, a mwatanbu chi n ti dwiyentu yani yaditu. 19Chi n Kwama yoti̱ kwang, a yo ni̱ri ki̱ng chi ku di wu n Kwama ka wudu bwesi̱m ki̱mu mi̱n dwiyen kite. 20Nangki̱n, chi a ti̱ti̱niye a nwe riye n ke di̱ne ki̱ke ti̱ti̱niye, aya n Kwama a ke yiko. A ma ying, 21ko ke ti̱ti̱nitu a chir we ka̱bi ti̱ta fwikitu, a ya dwiyen ti̱ta yo ni̱re bwesi̱m Kwamami. 22Ni yim ki̱ka̱ngu ti̱ti̱nitu ki̱ tinadu yinang yo bi̱be a lam naye mi̱ne lanta ki̱ka̱ng.
23N ke kana chi̱ni bi̱bu Fi̱ki̱m Kwamamu a ri ni̱mu, ni tinadu we ni̱ru ti̱n, ni ya mi̱n da wu niyang ya, a yo ni bwesi̱m Kwamame, tuku bwi chireyang. 24Nangki̱n, ni ya yuki̱ku di̱ne yo ni̱re. Aya yo ni̱re ni ku ti̱ne, n ke wu yile ko bayim. N wure ki̱yo ni̱ru we chi n ki̱n, a tu a ya? 25Aya ka ni yo ni̱ru a chi niyang tibu yade, ni swedi ki̱ri̱ngching, ni yandu.
26Yiko ti̱nti̱n, Fi̱ki̱m Kwamamu ki̱maka nidu yo dukana newe. N chi̱ni niyang yimbu chi a no dakan niing twa̱ba̱n bunite aya Fi̱ki̱m Kwamamu we ware n ti chi̱ni bobu ki̱ twa̱ba̱ ni mi̱nu, ki̱tinadu ki̱ni ti̱kwa̱litu ne ni yim fwaditu. 27N ki̱n wu a yim chi a ni̱r niine, a yim chi a ti̱kuran Fi̱ki̱m me. Di̱ne Fi̱ki̱mu ki̱twa̱ba̱ ni̱bu Kwamamu mi̱n chi a ki̱ke Kwama.
28Ni tu ni yim ko, kanang chi kiye n Kwama ki̱ma bi̱bu a mi̱la ki̱ni̱mu mi̱n ti̱yili, ka nang chi kiye, bi̱bu a yal a ki̱ke komu.#8:28 Yikayu tatti̱ki̱dai yika̱ri a mwal ko, kanang ti̱ti̱le chiye ki̱yadu a fi wiine. 29Nangki̱n, bi̱bu n Kwama tu a sutu chimu, nang bi̱bu n ki̱n a so chi ka da̱u di̱mwal bwin Bwe Kwaman, di̱ne ko ke n ki̱n a kau bwe kake we kebi̱bu nabwen. 30Bi̱bu n ki̱n a sutumu, n ki̱n a yal. Bi̱bu n ki̱n a yali̱mu, a mar chi ni̱bu yilem. Bi̱bu n ki̱n a chaki̱mu, a ni chi dwiyen.
A ne chi ka yarkani n ti mi̱laki̱ Yesungu we
31Ni fwadu ko wule we wu nabwe chi ya̱r yii wu ye? Ka n Kwama a di̱chi̱niye, n wure a lwe ka katadu n ti chi̱niye? 32Yo n Kwama a dubu wuko Bwe, a yo bwa bwe ko di̱ne chi̱ni kwange, n Kwama wu a tu a ni chi̱ni Masiya, ka bwin wureni wu a ne ka ni nide? 33N wure a lwe ka fwa ya̱m we bi̱bu n Kwama a sutumu? Di̱ne n Kwama n ki̱fwan nang wu a yo chi a kau ni̱bu yilem we kakku kange. 34Yinu n wure ka kai nidu, ko bayim! Di̱ne m Masiya nang wu a bwa di̱ne chiniye, a kun ki̱ni ti̱kuri di̱ne chi̱ni, a swe a fa̱la̱ng ki̱yilang Kwamangu, ki̱twa̱ba̱ buni di̱ne chi̱ni. 35Kano wureni ka medu ka yarka ni n ti mi̱laku Masiya ma a nimi̱nangu? Riyenga, fumaka, chuna, kwalanna ka bwanga? 36Ko no nang ya̱m Kwamamu, a mwal ko,
“Ditiyu ki̱da̱ng ni̱n bwadu
di̱ne mune n chi ki̱bita
ni̱nu yinang kwanti.”
37Ko bayim, a kuteng ti̱chitu wuwangi kwang, n chi̱ni ni̱bu ki̱lam a di̱n Yesun wu a mi̱la niye. 38Ki̱kumang, n ke bi̱yili̱mu ka bwa ka ti̱kuriye, ka ni̱bu ti̱tumbi̱rime, ka ki̱fi̱bti yi bwilaye, ka da wu ki̱ka̱nge ka wu ki̱bede, ka kasi bi̱bi̱le ki̱duum dukani̱m mati̱n ne, 39Ka sa̱re ka bwange kasi no ti̱ti̱le we chi Kwama yo, a ne yarkayu n ti mi̱laku Kwamangu a mami a di̱Yesu Tewuduwe chirengu. A ne chi ka yarka nide we.
S'ha seleccionat:
Romam 8: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.