Romam 9
9
N Kwama a sutu Yisrela a kau ni̱bu ki̱m
1Mi̱n fwa bi̱yili̱mu di̱ne mi̱n wu Masiya, n ke ti̱kwani. Fi̱ki̱m Kwamamu ki̱ma mati̱n nweku ni̱r mi̱nitangu a yim mi̱n fwa bi̱yili̱m. 2Ni̱r mi̱nu a kaiyan nabwen, ni̱r mi̱ni kwadu ka ti̱kuran. 3Di̱ne ni̱bu mi̱mu ki̱tuum ni̱mu a fi wiinemu, mang kedu Kwama a yomi yii ki̱diya kwadu n kwala Yesu Masiya ka di̱ne ke n yu kebu mi̱mu. 4Ni̱bu bi̱bu nang Yisrela, n chi bi̱bu a sutu chi a kau ki̱dum bwesi̱m Kwamamu. N Kwama a kwa̱l chimi̱n dwiyen kitu. A ma bwa̱ki̱ ya̱m ki̱mu n ti chi a niti̱ chi yilang kangu. N chi a ya da wa siiku kange we Kan Kwamanu, a niti̱ chi, ti̱kantu chi ti̱tu a fwa n ti chitu.
5Bati̱tukebu m biu chi, nang ki̱kuwang Yesu bwiye wu n ki̱n nang Kwama chiti kwange, delaku n di̱ki̱n ki̱diya kwadu. Amin.#9:5 Masiya wu ki̱n Kwama wu ki̱ma mati̱n chiti kwange a ya delaku ki̱diya kwadu. Amin. Ka N ki̱n Kwama wu a chiti kwange, a yiu delaku ki̱diya kwadu. Amin.
6Ti̱kuran Kwamatu we ni̱bu ki̱mu a kabu ti̱kusi. Di̱ne n ke ka nang wuwule niye wu tile ko siin naba Yisrela m bi̱u Kwama. 7Ti̱nti̱ne, n ke ka nang wuwule niye wu a chire a ki̱kuwang Yibrayimange, bwesi̱m Yibrayim. Di̱ne ya̱m Kwamamu fwa ko, “Mwang ya bukebi̱bu mang bwa̱u n ti muni̱mu a di̱Yichaku we. Kasi ki̱ku n Yibrayim ki̱ni bi̱kam bwesi̱m ti̱nti̱nangu.”
8Kanang chikiye, bwesi̱m Kwamamu a chirebu a bi̱be niye aya bi̱bu ki̱chiredu a riku ya̱m bwa̱ki̱mangu nang kasi bwesi̱mi siini̱mu. 9Nangki̱n, n Kwama fwa we ki̱dangu a bwa̱u ya̱mu n ti Yibrayimangu ko: “Ka ki̱swi a lame, mang ki̱ladu, n Saratu ka bi̱u bwe.”#9:9 Mwe 18:10; 18:14.
10Kaang ki̱swerang we. Bwesi̱m Rebekamu ki̱ni te wiin, ka nang chikiye, n tuke chire n Yichaku. 11Aya yo a tibu bi̱u bwesi̱mi burabi̱me, yo a tibu ma chi a le ka leebite, a ya di̱yal a di̱Kwama (Ya̱m bi̱bu a yungi siin sutuki̱ Kwamangu ki̱bunti̱nu a doki̱ kang) 12A yi naye ko, “Bwe wusele beka si wuti̱re.”#9:12 Mwe 18:10; 18:14.
13Yinanga a mwal we ya̱m Kwamamu ko, “N mi̱la Yakubu aya n ko Yichuwa.” 14Yoye ni yidu ko wule? N Kwama ki̱swaduswaba? “Ko bayim!” 15N Kwama a yi Musa ko, “Mang nwe ki̱bune wu mang sute ti̱nti̱ne, mang yo ni̱r ki̱bunen mi̱nu we wu mang sute.”
16Di̱ne yiko, a bunti̱ba a chi ni a kur a ni̱r ki̱ne ka funti̱ku bwiyang kange a ti̱ya ki̱bune Kwama. 17We ya̱m Kwamamu, n Kwama a yi Firauna ko, “N sutu mun ke n yung dukan mi̱nu a di̱ mune, yinu ke di̱n mi̱nu a ti̱ran we ti̱ti̱niti kwang.”
18Di̱ne yiko, n Kwama ki̱nwe ki̱bune ka wuwule niye wu n ki̱n a ku diye. Ki̱ yo bi̱kamu mi̱n ni̱ri ki̱ngki̱ng bi̱bu n ki̱n a ku ka yo chimi̱ndi̱mu.
Ki̱fwini Kwama n ti ki̱bune ko
19Aya we tibe chi̱n wuka ka medu ka yidu ko, “Yinu yo yiko, a mayire n Kwama we ki̱ku ki̱le chire chike? N chi a mabu chi n ki̱n ki̱baddita? 20Ko bayim, m mun n wure, mun nii duri ki̱liye, nang wu mwang bi̱u Kwama we chi ki̱madita? Ke ti̱mubritu a bi̱u chitu ko a mayire mwang muyi yaa?” 21We swaanku kawurengu, naba muke a newe ki̱ni da, ka muddu we di̱swani̱ni dini̱nu kubi ti̱tu ka ma ki̱mi̱n ki̱duli n ti ti̱tu a ka kani̱n fwali̱n tuiyenga?
22Kanodu ka n Kwama ka yung ki̱fwini ko n ti dukan ki̱ne, a dabi ki̱ni ne riye wu, ki̱na no do di̱ne ni̱bu bwilame.
23Yiko ti̱nti̱n, n ki̱n a ke ka kure kuli ki ti̱tu a nabwe dwiyen kitu we bi̱bu n ki̱n a do ka nwe ki̱bune chimu. Bi̱bu n ki̱n a do feredi ka ya dwiyen kiti̱mu. 24Kanang chikiye n chi̱ni bi̱bu Kwama a yali̱mu aya a newe kana ni̱bu Yafudam n ti kuuti yikayi kwang.
25Yinanga fwa we Yosiya ko,
bi̱bu n ke ni̱bu mi̱mu,
mang yidu mi ni̱bu mi̱m.
Ti̱nti̱ne ku wu mang mi̱labe,
mang yalu mi, “Wu mi̱lare.”
26Ti̱nti̱ne, we finu a fwa mi̱ni siin ko,
“N ti̱n ke ni̱bu mi̱me,
we fiko ni̱bu ka yidu ko,
‘Bwesi̱m Kwamamu wukure.’ ”
27We Ya̱m Yisrelamu, fa̱ku Yichaya a kuku keru a yi ko,
“Kasi ki̱ku nabwe Yisrela
yinang yane langu
bayim we bi̱bu a kulen we
Yisrelamu ka ya yuku.
28Nangki̱n, n Tewuduwe ka
kaba ti̱ti̱nitu mi̱nu ki̱ni kwang.
A ne kai ki̱swi
ka mwatadu kwang.”
29Yinangu n Yichaya a fwangu, “A du bi̱kam chi̱remu tuule, a no ni kadu yinang Sodom n ti Komara.”
Kwalan keku bi̱yili̱mang Yisrela
30Yoye ni fwadu ko wule? Yiko, yikayu kuuti yiyu a bunti̱bu yile a yati̱ yile wa niku bi̱yili̱mange. 31Aya Yisrela a funtbwi ki̱bau wa̱re yile a bunti̱ku yili̱nang a yabu. 32Wure ni a yo? N chi a babu a wa̱re wa keku bi̱yili̱mange. A bunti̱ funti̱ku bwiyang chiyang. We yiko n chi a yar we kale yare.
33Yinanga mwalmwale ko,
Ti̱da̱ng n yo kale a Siyona kale yare,
ka yo ni̱bu nabwen ka yaru.
Aya wu a ke bi̱yili̱m a di̱ki̱ne
a ne nwe dibwi.
S'ha seleccionat:
Romam 9: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.