Romam 7
7
Sweram ki̱ni ya̱m ki̱naam
1N yim kebu mi̱m ta swaan ya̱mu yamang fwadi̱mu di̱ne n ti̱n ti̱swaan chi ni yalu ko yilangitu. Yilangu ki̱ma nangangu we nii wu ki̱ni ti̱kurite. 2Ni da̱di ying, yilangu a tau naye wu a ma ki̱na ka lami̱nti̱ yo bwa ka yarka chide. Aya ka kwarta a bwange, yilanga kiyan, ki̱na ko a fi̱r ki̱dang kangu. 3Ka a mwintuwe n ki̱n a na wuka ni yo kwarta we ki̱ni ti̱kurite, n ki̱n ki̱ma ti̱kuli. Aya ka kwarta a bwange, yilangu a kiyan n ki̱na mabu ti̱kuli, kasi ki̱ku a na wuka niyangu.
4Kebi̱ mi̱m, ti̱tu mi̱n ma chimi̱n ki̱swerang. Ti̱bwa we yilangu ke ti̱kau wuko, n ki̱n wu a kun we bwa ke ni̱n tu ti̱kulan we di̱Kwama. 5Ki̱dangu da bwiye a tikakangu, kubeki̱ku ki̱kunedu ki̱ni yilang we yichireyu bwiti, ki̱yo nangi̱n chi̱retu ki̱kau ti̱bwari. 6Aya ki̱ka̱ngu ni ya da we yilangu niyang bwa we chi a kwau niye. Di̱ne yiko, ki̱ka̱ngu niin si Kwama a wa̱re wu fwiye wu a Fi̱ki̱m ki̱me. Ka̱bitu niyang ma a yili̱n Musatu a suu.
Yilang Kwamangu a kwa̱l ki̱leti chireyu
7Yoye ni fwadu ko wule? Yilang Kwamangu ki̱lenga? Kwako, a newe yiko. A no ne da mang yim chi ni yalu ko ki̱le we ka n ke a yilang ki̱ke. A no ne mang yindu mi, “Kubeki̱ku ki̱le.” 8Aya ki̱letiyu a ya da di̱ne yili̱ntu ki̱butiyu, ki̱yomi ka nang bi̱bi̱le duum kubeke. Ka ne yilangu wenge bwila a bwa. 9Feredi mi̱n wu kure, no mang yimbu yilange. Aya yo mang yimiye, ki̱letiyu a kau yi kuri, mi̱n n kau wubware.
10Aya yilangi siin a no ka bedu ki̱ni ti̱kuriyangu, a ki̱la be ki̱ni bwa. 11Ki̱letiyu a ya da we a yilangu a buti̱ chi ti̱n. 12Di̱ne ye, yilangu i wauwadu, yili̱ntu wauwadu a leti̱n. 13Kanodu yilangu ki̱fwan nang chi mi̱n bwaanda? Aram! Chi mi̱n bwaande nang ki̱le mi mi̱n made. Yingku Yilangu nang chi a yo mang yim ki̱le wu mi̱n bwaande. N yim yinangu ki̱le we mi̱nangu. Ki̱letiyu a chire fi̱lang ki̱ni bwila ko di̱ne Yilangu a yung ni.
Yinangu bwiyu ki̱makadu n ti ki̱letiyangu
14Ni yim yilangu nang fi̱ki̱mu, a ya fi̱ki̱mu a newe di̱mi̱ne, n kau ka̱be we ki̱letiyu. 15Mang swaanbu chi mi̱n maditu. Di̱ne chi mi̱n baddu mang maditu n ke chi mi̱n made. Chi a dakabu mang made ki̱la nang chi mi̱n maditu. 16Ka chi mi̱n baddu mang maditu nang ti̱tu ki̱la mi̱n madite, a yung n ke mi yilangu chi a le. 17Yinangu wemi̱nangu, m mi̱n n ke wu mi̱n ma ki̱chituwe aya ki̱le a swe a bwimiye nang naba ki̱kwabi̱re.
18N yim a ne chi ti̱yili we ni̱r mi̱nu, we da niye. Kasi ki̱ku we ni̱r mi̱nu mi̱n baddu mang ma chi a da turitangu aya di̱ne a ma bwar we bwiyu. 19Mang mabu chi ti̱yili ti̱tu mi̱n baddu mang maditu. Ki̱la n ya ti̱tu mi̱n kodu mi a lebitu nang ti̱tu mi̱n maditu. 20Yinu ka mi̱n ma chi mang babu ma madite, a yung ni ki̱made n ke mi̱n. Ki̱letiyu a bwimiye nang wu ki̱made.
21N swaanin meme, ka mi̱n baddu mang ma chi ti̱yilite, bwila a duibu. 22We ni̱r mi̱nu m mi̱la, yilang Kwamangu a lemi, 23Mi̱n ku kaang yilang ki̱makadu n ti chi ti̱kuran mitu a ke. Ti̱tu a yo dami a swe we wu a ki̱letiye wu a swe we di̱mi̱ne. 24A noi, yinu n fuktani ya. N wure ka yuiyu we wu bwa.
25Kwama a mabe di̱ne a yu mi̱n a di̱n Yesu Masiya Tewuduwe! Di̱ne yiko,
M mi̱n m mi̱fwan mi̱n bunti̱ yilang Kwamang ki̱ni ni̱r mi̱nu. Aya we da niye, n kau ka̱be ki̱letiye.
S'ha seleccionat:
Romam 7: Tula
Subratllat
Copia
Compara
Comparteix
Vols que els teus subratllats es desin a tots els teus dispositius? Registra't o inicia sessió
© 2015, The Nigeria Bible Translation Trust and Wycliffe Bible Translators, Inc. All rights reserved.